ޓޫރިޒަމް މިނިސްޓަރު އަލީ ވަހީދު އެހެން ބަޔަކާއެކު ދެއްކެވި ކަމަށް ބުނާ ވާހަކަތަކެއްގެ އޯޑިއޯ ލީކު ކޮށްލާފައިވާއިރު އެ އޯޑިއޯގައި ޓްރާންސްޕޯޓް މިނިސްޓަރު އައިޝަތު ނަހުލާއާ ގުޅޭ ގޮތުން ދައްކަވާފައިވާ ވާހަކަތަކުގެ މައްސަލަ ބައްލަވައި ދެއްވުމަށް އެކަމަނާ އެދިވަޑައިގެންފި އެވެ.
ނަހުލާ އެކަމަށް އެދިވަޑައިގެން ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ އަރިހުގައި ވަނީ ދަންނަވާފަ އެވެ. އަދި ރައީސް އޮފީހުގެ އިސް ބޭފުޅަކު ވަނީ އަވަސްއަށް އެކަން ކަށަވަރު ކޮށްދީފަ އެވެ.
ލީކް ކޮށްލާފައިވާ އާ އޯޑިއޯގައި އަލީ ވަހީދު ކަމަށް ބުނާ މީހާ ވަނީ ޓްރާސްޕޯޓް މިނިސްޓަރު އައިޝަތު ނަހުލާއަށް ބޮޑެތި ތުހުމަތުތަކެއް ކޮށްފަ އެވެ. އެގޮތުން ނަހުލާ އޭނާގެ ކިބައިން ޖިންސީ އަމަލަކަށް އެދިފައިވާ ކަމަށާ އިތުރު ބަޔަކާއެކު އެކަން ކުރަން ވެސް އެންމެ ރަނގަޅު ކަމަށް ބުނާ އަޑު އިވެއެވެ.
އެ ވާހަކަތަކަށް ކައިރީގައި ތިބި މީހުން ހީނ، ފުރައްސާރަ ކުރާ އަޑު ވެސް އިވެ އެވެ. މީގެ އިތުރުން ދީނުގައި ހުއްދަ ނޫން ބައެއް ކަންކަން ކުރަން ރިސޯޓަކަށް ދާންޖެހޭ ކަމަށް ބުނެފައި ވެއެވެ.
މިއީ އޯޑިއޯތަކުގެ މައްސަލަ ބަލަން، އެ އޯޑިއޯތައް އަމާޒުވި މިނިސްޓަރުންގެ ތެރެއިން ބޭފުޅަކު އެދިވަޑައިގެން ފުރަތަމަ ފަހަރެވެ. މި އޯޑިއޯތަކުގައި ހެލްތު މިނިސްޓަރު އަބްދުﷲ އަމީނާއި، އެޑިއުކޭޝަން މިނިސްޓަރު ޑރ. އައިޝަތު އަލީއަށް ވެސް ވަރަށް ބޮޑަށް ފުރައްްސާރަކޮށް ފާޑު ވިދާޅުވެފައިވެ އެވެ. އަދި އެ ބޭފުޅުންނަކީ މަގާމުގެ މަސްއޫލިއްޔަތު އަދާ ނުކުރައްވާ ބޭފުޅުން ކަމަށް ވިދާޅުވެ ހުތުރު ބަހުން އެ ބޭފުޅުންނާ މުހާތަބު ކުރެ އެވެ.
ވަޒީރެއްގެ މަގާމުގައި ހުންނެވި ބޭފުޅަކު، އެހެން ވަޒީރު ބޭފުޅުންނަށް ހުތުރު ބަހުން ވާހަކަދައްކާ، ޖިންސީ ފުރައްސާރަކުރި ނަަމަވެސް އެކަމަށް ސަރުކާރުން ވެސް އަދި ރައްޔިތުންގެ މަޖިލީހުން ވެސް މިހާތަނަށް އެއްވެސް އެއްޗެއް ބުނެފައެއް ނުވެ އެވެ. ޖިންސީ ގޯނާއާ ފުރައްސާރައިގެ އަމަލުތަކަށް ދޭނީ ޒީރޯ ޓޮލަރެންސް ކަމަށް ސަރުކާރުން ބުނާއިރު، އަދި ރާއްޖޭގައި ހިނގާ ހުރިހާ ކަމަކަށް ރައްޔިތުންގެ މަޖިލީހުން އިސްވެ ބަސް ބުނަމުންދާއިރު، މިފަދަ މައްސަލައެއްގައި ސަރުކާރާ، މަޖިލީސް ހިމޭނުން އޮތުމުން ގިނަ ބަޔަކު ވަނީ އެކަމަށް ވަރަށް ބޮޑަށް ފާޑު ކިޔާފަ އެވެ.
ނަމަވެސް އޯޑިއޯތަކުގައި ޖިނާއީ ކަމެއް އުޅޭކަމަށް ބެލެވިގެން އެކަން ބަލަން ފަށާފައިވާ ކަމަށެވެ. ނަމަވެސް އޭގެ ތަފުސީލެއް ނުދެ އެވެ.
އޯޑިއޯތަކެއް ލީކުވި މައްސަލައިގެ ތަހުގީގެއް ހިންގަން އެދި ވަޑައިގަންނަވާ ކަމަށާއި ފުރިހަމަ ތަހުގީގަކުން ހަގީގަތް ސާފުވާނެ ކަމަށް ޓޫރިޒަމް މިނިސްޓަރު އަލީ ވަހީދު ވަނީ ވިދާޅުވެފަ އެވެ.
ލީކްވެފައިވާ އޯޑިއޯތަކުން ބަރީއަ ވަޑައިގަންނަވަމުން އަލީ ވަހީދު ވިދާޅުވީ ސޯޝަލް މީޑިއާގައި ދައުރު ކުރަމުން ގެންދަނީ ސައްހަ އޯޑިއޯތަކެއް ނޫން ކަމަށާއި އެ އޯޑިއޯތަކަކީ އެކި އަޑު އެކި ގޮތަށް ގެނެސް ރޭވިގެން ހިންގާ ދަށު ދަރަޖައިގެ ހުތުރު ޖަރީމާއެއް ކަމަށެވެ. އެ މައްސަލާގައި ފުރިހަމަ ތަހުގީގެއް ކުރުމުން ހަގީގަތް ސާފުވާނެ ކަމަށާއި އެގޮތުން އޭނާގެ މައްޗަށް ވެސް ތަހުގީގެއް ހިންގަވަން އެދޭ ކަމަށް އަލީ ވަހީދު ވިދާޅުވި އެވެ.