ދިވެހިރާއްޖެ ސިއްހީ ކުއްލި ނުރައްކަލުގެ ހާލަތުގައި
NUMBER OF CASES
ގާސިމް އިބްރާހިމް

ރަށްތައް ދިނީ ރައްޔިތުންގެ ސަލާމަތަށް: ގާސިމް

ވިލާ ގުރޫޕުން ރިސޯޓް ހިންގަމުންދިޔަ ދެ ރަށް ކަރަންޓީ ފެސިލިޓީއަށް ސަރުކާރާ ހަވާލުކުރީ ދިވެހި ރައްޔިތުންނާ ގައުމުގެ ސަލާމަތާ ރައްކާތެރިކަމަށްޓަކައި ކަމަށް ވިލާ ގުރޫޕްގެ ބާނީ އަދި އެ ކުންފުނީގެ ޗެއާމަން ގާސިމް އިބްރާހިމް ވިދާޅުވެއްޖެ އެވެ.

ގާސިމްގެ ވިލާ ގުރޫޕުން ރިސޯޓް ހިންގަމުންދިޔަ ރަށްތަކުގެ ތެރެއިން ފަން އައިލެންޑް އަދި ހޮލިޑޭ އައިލެންޑް ރިސޯޓް ވަނީ ކަރަންޓީ ފެސިލިޓީއަށް ސަރުކާރާ ހަވާލުކޮށްފައެވެ. މިވަގުތު ހަތް ރިސޯޓެއް ކަރަންޓީ ފެސިލިޓީއަށް ސަރުކާރާ ހަވާލުކޮށްފައިވާއިރު ވިލާގެ ފަން އައިލެންޑަކީ މިގޮތަށް ކަރަންޓީ ފެސިލިޓީއަށް ސަރުކާރާ ހަވާލު ކުރެވުނު ފުރަތަަ ރިސޯޓެވެ.

އދ އަތޮޅުގައި ހިންގަމުންދާ ހޮލިޑޭ އައިލެންޑް ރިސޯޓް ކަރަންޓީ ފެސިލިޓީއަށް ސަރުކާރާ ހަވާލުކުރުމަށްފަހު ގާސިމް ވިދާޅުވީ އެ ނިންމުން ނިންމީ ކަރަންޓީ ފެސިލިޓީއަށް އިތުރު ތަންތަން ބޭނުންވާކަން ސަރުކާރުން ހާމަކުރުމާ ގުޅިގެން ކަމަށެވެ. ހޮލިޑޭ ސަރުކާރާ ހަވާލުކުރީ އެ ރިސޯޓްގައި ތިބި ފަތުރުވެރިން ވިލާގެ ޕެރަޑައިސް އައިލެންޑް ރިސޯޓަށް ބަދަލު ކުރުމަށްފަހުއެވެ.

ގާސިމް ވިދާޅުވީ ހޮލިޑޭގައި ހުރި ހުރިހާ ފެސިލިޓީއަކާ މުވައްޒިފުންވެސް ހިމެނޭގޮތަށް އެ ރަށް ކަރަންޓީ ފެސިލިޓީއަށް ބަދަލުކޮށްފައިވާއިރު އެއީ އޭގެ ބަދަލުގައި އިތުރު ޗާޖެއް ސަރުކާރުން ވިލާ ކުންފުންޏަށް ދައްކަން ޖެހޭ ގޮތަށް ނިންމާފައިވާ ނިންމުމެއް ނޫން ކަމަށެވެ. އަދި ހޮލިޑޭގައި މިވަގުތު ހުރި ހުރިހާ ފެސިލީޓީއެއް ކަރަންޓީން ކުރާ މީހުންނަށް ބޭނުން ކުރެވޭނެ ކަމަށް ގާސިމް ވިދާޅުވިއެވެ.

ކުޑަބަނޑޮހާއި ހޮލިޑޭ، ދިއްގިރި ރިސޯޓާއި ބިޔާދޫ އައިލެންޑް ރިސޯޓްގެ އިތުރުން ވެލިދޫ، ވެލިވަރު އަދި ފަން އައިލެންޑް ރިސޯޓް އޮތީ ކަރަންޓީނު ރަށްތަކެއްގެ ގޮތުގައި ހަމަޖައްސާފަ އެވެ.

ކޮވިޑް-19އާ ގުޅޭ ސަރުކާރުގެ ތަރުޖަމާނު މަބުރޫކު އަޒީޒު ވިދާޅުވީ ކަރަންޓީނު ރަށްތަކެއްގެ ގޮތުގައި މި ރިސޯޓްތައް ދޫކޮށްފައިވަނީ ސަރުކާރުން އެއްވެސް ކުއްޔަށް ދައްކަން ޖެހޭ ގޮތަށް ނޫން ކަމަށެވެ. އެއީ އެ ރިސޯޓްތައް ހިންގާ ފަރާތްތަކުން ގައުމުގެ ހާލަތަށް ބެލުމަށްފަހު ސަރުކާރަށް ދޫކޮށްފައިވާ ރަށްތަކެއް ކަމަށެވެ.

ސަރުކާރުން މިހާރު ވަނީ ރާއްޖެއިން ބޭރުން އަންނަ ކޮންމެ މީހަކު ވެސް 14 ދުވަހު ކަރަންޓީނުގައި ބަހައްޓަން ނިންމާފަ އެވެ. އެހެންވެ، ގިނަ ކޮޓަރިތަކެއް އެކަމަށް ބޭނުންވެ އެވެ. އެ އަދަދަށް ކޮޓަރި ހަމަކުރުމަށް ޓޫރިޒަމް މިނިސްޓްރީއިން ވަރަށް ބުރަކޮށް މަސައްކަތް ކުރަމުންދާ ކަމަށް މަބުރޫކު ވިދާޅުވި އެވެ.

ކޮވިޑް-19 އަށް ރާއްޖޭގައި މިހާތަނަށް ޕޮޒިޓިވްވީ 13 މީހެކެވެ. އެއީ މުޅިން ވެސް ބިދޭސީންނެވެ. އޭގެ ތެރެއިން ތިން މީހަކު ވަނީ ބަލިން ރަނގަޅުވެފަ އެވެ.

ރާއްޖޭގައި ކޮވިޑް-19 އަށް ގިނަ ޓެސްޓްތަކެއް މިހާރު ދަނީ ހަދަމުންނެވެ. ކިރިޔާ އަލާމާތެއް ފެނުނަސް އެމީހެއްގެ ސާމްޕަލްތައް ނަގަ އެވެ. އެގޮތުގެ މަތިން މިހާރު ވެސް 500 އަށްވުރެ ސާމްޕަލްތައް ނަގައިފި އެވެ. ނަމަވެސް ގިނަ ސާމްޕަލްތަކުގެ ނަތީޖާ ނެގެޓިވްވެފަ އެވެ. މިހާރު ރާއްޖެއިން މި ބަލީގެ މީހަކު ނުފެންނަތާ ހަ ދުވަސް ވަނީ ވެފަ އެވެ.

ސަރުކާރުން ގެންދަނީ ރާއްޖޭގައި ކުއްލި ނުރައްކަލުގެ ހާލަތު އިއުލާންކޮށް ގިނަ ފިޔަވަޅުތަކެއް އަޅަމުންނެވެ. އެގޮތުން ސްކޫލްތަކާއި ޔުނިވާސިޓީތަކާއި ސަރުކާރު އޮފީސްތައް ވެސް ވަނީ ބަންދުކޮށްފަ އެވެ. ކޮންމެހެން ބޭރަށް ދާން ޖެހުގެން ނޫނީ ނުދިޔުމަށް ދަނީ އިލްތިމާސްކުރަމުންނެވެ. ޖަމާއަތުގައި ނަމާދު ކުރުމާއި ޕާކްތަކާއި ރެސްޓޯރެންޓްތައް ވެސް ވަނީ ބަންދުކޮށްފަ އެވެ.

ގިނަ ގައުމުތަކުން ރާއްޖެއަށް އައުން މަނާކޮށްފައިވާއިރު ރާއްޖެއިން ބޭރުން އަންނަ ކޮންމެ ދިވެއްސެއް ވެސް 14 ދުވަހު އެކަހެރިކުރުމަށް ވަނީ ނިންމާފަ އެވެ. އަދި، ގެސްޓްހައުސްތަކަށް ގެސްޓުން ގެނައުން މަނާކޮށް ސްޕާތައް ވެސް ވަނީ ބަންދުކޮށްފަ އެވެ. ސަފާރީތަކާއި ޔޮޓްތައް ރާއްޖެ އައުން ވެސް މަނާކޮށްފައިވެ އެވެ.