ރައްޔިތުންގެ މަޖިލީހުގެ އިދާރާއިން ކަރަންޓު ކެނޑި މިއަދު ބާއްވަން ތާވަލު ކުރި ޖަލްސާ ފެށުން ލަސް ވެއްޖެ އެވެ.
ހަފުތާއަކަށް މެދު ކެނޑުމަށް ފަހު މަޖިލީހުގެ ޖަލްސާތައް މި ހަފުތާ ފަށަން ނިންމައި، މިއަދުގެ ޖަލްސާ ތާވަލު ކުރީ ހެނދުނު 11:00 އަށެވެ. މި ހަފުތާގެ ޖަލްސާތައް ވެސް ކުރިއަށް ގެންދަން ނިންމާފައި ވަނީ ވެބް ކޮންފެރެންސް މެދުވެރިކޮށެވެ.
މަޖިލީހުގެ އިދާރާއިން ދެންމެ ކުރި ޓްވީޓެއްގައި ބުނީ، އެ އިދާރާއިން ކަރަންޓު ކެނޑުމާ ގުޅިގެން ޓެކްނިކަލް މައްސަލައެއް ދިމާވެފައިވާތީ މިއަދު ބާއްވަން ހަމަޖެހިފައިވާ ޖަލްސާ ފެށުން ލަސްވެފައިވާ ކަމަށެވެ. މައްސަލަ ހައްލު ކުރެވުނުހާ އަވަހަކަށް މިއަދުގެ ޖަލްސާ ފަށާނެ ގަޑި އިއުލާން ކުރާނެ ކަމަށް ވެސް ޓްވީޓްގައި ބުނެފައިވެ އެވެ.
މިއަދުގެ ޖަލްސާގައި ގިނަ ކަންތައްތަކެއް އެޖެންޑާކޮށްފައިވެ އެވެ. އޭގެ ތެރެއިން ލޯކް ކައުންސިލް އިންތިހާބު ފަސް ކުރުމާއި މިހާރު ތިބި ކައުންސިލަރުންގެ ދައުރާ ގުޅޭ ގޮތުން ހުށަހަޅާފައިވާ ބިލު ވެސް ހިމެނެ އެވެ.
ކޮވިޑް-19 ގެ ސަބަބުން މަޖިލީހުގެ ޖަލްސާތައް ވަނީ ހަފުތާއަކަށް ވެބް ކޮންފެރެންސް މެދުވެރިކޮށް ބާއްވާފަ އެވެ. އޭގެ ފަހުން މިދިޔަ ހަފުތާގައި ޖަލްސާތައް މެދުކަނޑާލި އެވެ. އޭރު ޖަލްސާތައް މެދުކަނޑާލީ ކޮމިޓީގެ މަސައްކަތްތައް ގިނަވެފައި އޮތުމުންނާއި އާންމުކޮށް މަޖިލީހަށް މެންބަރުން އެއްވެ ޖަލްސާ ބޭއްވުމާ ގުޅޭ ގޮތުން މަޝްވަރާ ކުރުމަށެވެ.