ރައްޔިތުންގެ މަޖިލީހުގައި މިއަދު ބާއްވަން ތާވަލު ކުރި ޖަލްސާ ބޭއްވޭ ގޮތް ނުވެ ކެންސަލް ވެއްޖެ އެވެ.
ހަފުތާއަކަށް މެދު ކެނޑުމަށް ފަހު މަޖިލީހުގެ ޖަލްސާތައް މި ހަފުތާ ފަށަން ނިންމައި، މިއަދުގެ ޖަލްސާ ތާވަލު ކުރީ ހެނދުނު 11:00 އަށެވެ. މި ހަފުތާގެ ޖަލްސާތައް ވެސް ކުރިއަށް ގެންދަން ނިންމާފައި ވަނީ ވެބް ކޮންފެރެންސް މެދުވެރިކޮށެވެ.
ނަމަވެސް އެ އިދާރާއިން ކަރަންޓު ކެނޑުމާ ގުޅިގެން ޓެކްނިކަލް މައްސަލައެއް ދިމާވެފައިވާތީ މިއަދު ބާއްވަން ހަމަޖެހިފައިވާ ޖަލްސާ އެ ގަޑިއަށް ނުފެށި ލަސްވެގެން ދިޔަ އެވެ. މަޖިލީހުގެ އިދާރާއިން ފުރަތަމަ ބުނީ މައްސަލަ ހައްލު ކުރެވުނުހާ އަވަހަކަށް މިއަދުގެ ޖަލްސާ ފަށާނެ ގަޑި އިއުލާން ކުރާނެ ކަމަށެވެ.
ފަހުން މަޖިލީހުގެ މީޑިއާ ޑިރެކްޓަރު ހަސަން ޒިޔާއު ވިދާޅުވީ ކަރަންޓު ކެނޑުމާ ގުޅިގެން ދިމާވި ޓެކްނިކަލް މައްސަލަ ހައްލު ކުރަމުންދާތީ މިއަދު ބާއްވަން ހަމަޖެހިފައިވާ ޖަލްސާ މިއަދު ނުބާއްވައި މާދަމާއަށް ފަސް ކޮށްފައިވާ ކަމަށެވެ.
މިއަދުގެ ޖަލްސާގައި ގިނަ ކަންތައްތަކެއް އެޖެންޑާކޮށްފައިވެ އެވެ. އޭގެ ތެރެއިން ލޯކް ކައުންސިލް އިންތިހާބު ފަސް ކުރުމާއި މިހާރު ތިބި ކައުންސިލަރުންގެ ދައުރާ ގުޅޭ ގޮތުން ހުށަހަޅާފައިވާ ބިލު ވެސް ހިމެނެ އެވެ. އަދި ކުރިން މަޖިލީހަށް ހުށަހެޅި ނުނިމި ހުރި ބައެއް ބިލުތަކުގެ މަސައްކަތް ވެސް އެޖެންޑާ ކޮށްފަ އެވެ.
ކޮވިޑް-19 ގެ ސަބަބުން މަޖިލީހުގެ ޖަލްސާތައް ވަނީ ހަފުތާއަކަށް ވެބް ކޮންފެރެންސް މެދުވެރިކޮށް ބާއްވާފަ އެވެ. އޭގެ ފަހުން މިދިޔަ ހަފުތާގައި ޖަލްސާތައް މެދުކަނޑާލި އެވެ. އޭރު ޖަލްސާތައް މެދުކަނޑާލީ ކޮމިޓީގެ މަސައްކަތްތައް ގިނަވެފައި އޮތުމުންނާއި އާންމުކޮށް މަޖިލީހަށް މެންބަރުން އެއްވެ ޖަލްސާ ބޭއްވުމާ ގުޅޭ ގޮތުން މަޝްވަރާ ކުރުމަށެވެ.
ސަރުކާރުން މި ހާލަތުގައި ތައާރަފުކުރި އިކޮނޮމިކް ޕެކޭޖްގެ އުފެއްދުންތެރިކަން އިތުރުކުރުމަށް އެމްޑީޕީގެ ޕާލިމެންޓްރީ ގްރޫޕްގެ ލީޑަރު އަލީ އާޒިމް ހުށަހެޅުއްވި މައްސަލަ ކޮމިޓީތަކުގައި ދިރާސާ ކުރަމުންދާތާ ދެ ހަފުތާ ވެއްޖެ އެވެ. މަޖިލީހުގެ ތަޅުމަށް އަދި އެއްވެސް ކޮމިޓީއެއްގެ ރިޕޯޓު އައިސްފައެއް ނުވެ އެވެ.