ފްރާންސްގެ ލީގް ބާކީބައި ކުރިއަށް ނުގެންގޮސް ލީގް ނިންމާލުމުން، އޮލިމްޕިކް ލިޔޯއިން ކޯޓަށް މައްސަލަ ހުށަހަޅަން ތައްޔާރު ވެއްޖެ އެވެ.
ލީގް ކުރިއަށް ނުގެންދާން ނިންމުމާއެކު، ފްރާންސް ލީގުން ވަނީ ޕޮއިންޓް ތާވަލުގައި ޓީމުތަކުގެ ތަރުތީބު ހުރިގޮތަށް ބަލައި، ލީގްގެ މަގާމުތައް ކަށަވަރު ކޮށްފަ އެވެ. ލީގް ޗެމްޕިއަންކަން ޕީއެސްޖީއަށެވެ. އެންމެ ފުލުގައި އޮތް ދެ ޓީމު ރެލިގޭޓް ވީ އެވެ.
އެގޮތަށް ނިންމުމުން ލިޔޯން އަށް ވަނީ، 23 އަހަރު ފަހުން ޔޫރަޕްގެ މުބާރާތުން ޖާގަ ހޯދުމުގެ ފުރުސަތު ފުރަތަމަ ފަހަރަށް ގެއްލިފަ އެވެ. ލީގް މެދުކަނޑައި ލިއިރު ލިޔޯން އޮތީ ހަތް ވަނައިގަ އެވެ. ދެ ވަނަ ޑިވިޝަނަށް ރެލިގޭޓްވި އެމިނެސް ވަނީ މައްސަލަ ކޯޓަށް ހުށަހަޅާނެ ކަމަށް ބުނެފަ އެވެ.
ލިޔޯންގެ ރައީސް ޖޯން މިޝޭލް އައުލަސް ވިދާޅުވީ، ޔޫރަޕްގެ މުބާރާތަށް ކޮލިފައި ވުމުގެ ފުރުސަތު އެ ޓީމަށް އޮތް ކަމަށާއި އެހެން ނަމަވެސް ލީގް ކެންސަލް ކުރުމުން ބޮޑު ގެއްލުމެއް ކުރިމަތި ވެފައިވާ ކަމަށެވެ. އޭނާ ވިދާޅުވީ ގެއްލުމުގެ ބަދަލު ހޯދަން ކޯޓަށް ދާނެ ކަމަށެވެ.
ފްރާންސްގެ ސްޕޯޓްސް މިނިސްޓަރު ރޮކްސަނާ މާޗިއުނޫ ވިދާޅުވީ، ކޯޓަށް ދިއުމުގެ ހައްގު ކޮންމެ ފަރާތަކަށްވެސް އެބައޮތް ކަމަށެވެ.