ހަޔާތުގެ ބައިވެރިޔަކަށް މީހަކު ހޮވާއިރު ކޮންމެ މީހަކުވެސް ވަރަށް ގިނަ ކަންތައްތަކާ މެދު ވިސްނާނެ އެވެ. ދެ މީހުންގެ ދިރިއުޅުމުގައި ދާން ބޭނުންވާ މިސްރާބާއި ހާސިލު ކުރަން ބޭނުންވާ ކަންތައްތައް އެކަންޏެއް ނޫނެވެ. އެކަކު އަނެކަކު ދެނެގެން އެކުގައި އުޅެވިދާނެތޯ އާއި އެކަކު އަނެކަކަށް އެއްބާރުލުން ދޭނެ މިންވަރެއް ވެސް ވަޒަން ކުރާނެ އެވެ.
ވަރަށް ވިސްނާފައި ކައިވެނި ކޮށްގެން ވެސް ބައެއް މީހުންނަށް އެމީހުންގެ ހަޔާތުގެ ބައިވެރިންނާއެކު އުޅެވެނީ މަދު ދުވަސްކޮޅަކު އެވެ. ނަސީބުގަދަ ބައެއް މީހުންނަށް އެމީހުންގެ "ސޯލް މޭޓް" ނުވަތަ ފުރާނައިގެ ބައިވެރިޔާ އާ ބައްދަލުވެ މުޅި ހަޔާތް އެމީހަކާ އެކު ފަސޭހަ ކަމާއި އުފަލާއެކު ހޭދަ ކޮށްލުމުގެ ފުރުސަތު ލިބެ އެވެ.
ސޯލް މޭޓުންނާ ބައްދަލުވުމަކީ ވަރަށް މަދު މީހަކަށް ނޫނީ ދިމާވާ އިއްތިފާގެއް ނޫނެވެ. ނަމަވެސް އިންޑިއާގެ މީރަތުގެ ދަވާއީ ނަގަރްގައި ދިރިއުޅޭ ފީރޯޒް، 25، އާއި ޒައިނަބް، 22، އަށް އެކަކު އަނެކަކާ ވަރަށް ފަސޭހައިން ބައްދަލުވެ މިހާރު ވަނީ ކައިވެނި ވެސް ކޮށްފަ އެވެ. މި ދެ މީހުން ވަރަށް ގުޅޭ ޖޯޑަކަށްވާ ސަބަބުތައް ގިނަ އެވެ. ހަމަ ގައިމު ވެސް އެ މީހުން ފެނުމުން އޭގެން އެއްވެސް މީހަކާ އެހެން މީހަކާ ގުޅުވަން އެހާ ރަނގަޅު ނުވާނެކަން ވިސްނޭނެ އެވެ. އެ ދެ މީހުންނަކީ އެކަކު އަނެކަކަށް ޓަކައި އުފައްދަވާފައިވާ ބައެއް ކަމުގެ އިހްސާސް މި ދެމަފިރިން ފެންނަ ކޮންމެ މީހަކަށް ވެސް ކުރެވޭނެ އެވެ.
ސަބަބުތައް ބައިވަރެވެ. ފުރަތަމަ ކަމަކީ ދެ މީހުންގެ ވެސް އިސްކޮޅުގައި ހުންނަނީ އެންމެ ތިން ފޫޓެވެ.
މިދިޔަ ހޮނިހިރު ދުވަހުގެ އެމީހުންގެ ނިކާހް (މުސްލިމް ގޮތަށް ކުރާ ކައިވެނި)ގައި 25 މީހުން ފިރިހެންމީހާގެ އާއިލާގެ ފަރާތުން ބައިވެރިވި އިރު ޒައިނަބުގެ އާއިލާއިން ވެސް ހަމަ މި އަދަދަށް މީހުން ބައިވެރިވި އެވެ. ކޮރޯނާވައިރަހުގެ ވަބާގެ ބިރު އޮތުމުން މި ކައިވެނީގެ ހުރިހާ އިންތިޒާމެއް ވެސް ހަމަޖައްސާފައި އޮތީ ކަނޑައެޅިފައިވާ ގައިޑްލައިންތަކަށް ފުރިހަމައަށް އަމަލު ކޮށްގެންނެވެ.
ސޯލް މޭޓް ލިބުމުން އުފަލުން ހުރި ފީރޯޒް ކައިވެންޏަށްފަހު އިންޑިއާގެ ނޫހަކަށް ދިން އިންޓަވިއު އެއްގައި ބުނީ ދުވަހަކުވެސް ކައިވެންޏެއް ކުރެވިދާނެ ކަމަށް ހީނުކުރާ ކަމަށެވެ. ސަބަބަކީ އޭނާގެ އިސްކޮޅު ކުރުކަމުން ކައިވެނި ކުރާނެ މީހަކު ލިބިދާނެ ކަމަށް ގަބޫލު ނުކުރެވޭތީ އެވެ.
"އަހަރެންގެ ބައްޕަ އަހަރެން ކައިރީގައި ޒައިނަބްގެ ވާހަކަ ބުނުމުން އަހަރެން ވަރަށް އުފާވި. އަހަރެންނަށް ދެން އެއްވެސް ހިތްހަމަނުޖެހުމެއް ނެތި ވަރަށް އުފާވެރި ހަޔާތެއް ހޭދަކުރެވިދާނެކަމަށް އުންމީދު ކުރެވޭ. ސަބަބަކީ އަހަރެންނާއެކު މިހާރު އަންހެނުން ޒައިނަބު ހުރީމަ،" ފީރޯޒް ބުންޏެވެ.
ފީރޯޒްގެ ބައްޕަ ރިއާޒުއްދީން ބުނި ގޮތުގައި މި ގުޅުމަކީ "ﷲގެ ހަދިޔާއެއް" ގެ ގޮތުގަ އެވެ.
ކޮންމެވެސް ގޮތަކުން ފީރޯޒްގެ ޚަބަރު ލިބިގެން އޭނާއާ ކައިވެނި ކުރަން ޕްރޮޕޯޒަލް ހުށަހެޅީ ޒައިނަބްގެ އާއިލާއިންނެވެ. މި ކައިވެނީގެ ދައުވަތު ލިބުމުން ފީރޯޒްގެ އާއިލާއަށް ގަބޫލުކުރަން ވެސް ދަތިވި އެވެ. ސަބަބަކީ ފީރޯޒް އާ އެހާ ގުޅޭ ބައިވެރިއަކު ދުވަހެއް ކޮޅުން ވެސް ލިބިދާނެކަމަށް އެމީހުން ހީކޮށްފައި ވެސް ނެތީމަ އެވެ.
ވަގުތުން އެމީހުން މި ކައިވެންޏާ އެއްބަސްވީ ޒައިނަބު ކަހަލަ އަންބެއް އޭނާގެ ދަރިފުޅަށް ނުލިބޭނެކަމަށް ފީރޯޒްގެ ބައްޕަ އަށް ގަބޫލު ކުރެވޭތީ އެވެ. ފީރޯޒް އާއި ޒައިނަބުގެ ހަޔާތުގެ ވާހަކައިން ލިބޭ އިބުރަތަކީ ދުނިޔެއަށް އުފަންވާ ކޮންމެ މީހަކަށް ވެސް އޭނާއާ ގުޅޭ ބައިވެރިޔަކު ވާނެ ކަމެވެ.