ރޯޝަނީ ބަޑޯރިޔާ ކޮންމެ ދުވަހަކު ކިޔަވަން ސްކޫލަށް ދާން ކުރަން ޖެހުނީ ވަރަށް ބުރަ މަސައްކަތެކެވެ. އޭނާގެ ގެއާއި ސްކޫލާ ދެމެދުގައި 12 ކިލޯ މީޓަރުގެ ދިގު ރާސްތާއެއް ވެއެވެ. އޭނާ ބައިސްކަލުގައި ކޮންމެ ދުވަހަކު ސްކޫލަށް ގޮސް އައިސްވުމަށް 24 ކިލޯ މީޓަރު ދުއްވަ އެވެ. މިހާ ދިގު ރާސްތާއެއް ކަޑައްތު ކުރަން ޖެހުނަސް 15 އަހަރުގެ މިކުއްޖާ ކިޔެވުމަށް އޮތް ލޯތްބަކަށް ބަދަލެއް ނައެވެ. ނަތީޖާއެއްގެ ގޮތުން ގްރޭޑް 10 ނިންމައި އޭނާ ހެދި ސްޓޭޓް ބޯޑު އެގްޒޭމުން ރޯޝަނީއަށް އެވްރެޖް 98.5 ޕަސެންޓް މާކްސް ލިބިފައި ވެއެވެ.
އިންޑިޔާގެ މަދިޔަ ޕްރަދޭޝްގެ ބިންޑް ޑިސްޓްރިކްޓްގައި އޮންނަ ކުޑަކުޑަ އަވަށެއްގައި ދިރިއުޅޭ ރޯޝަނީއަށް ކިޔެވުމަށް ކުރަން ޖެހުނު ދަތުރު ދިގުވުމުގެ އިތުރުން އެހާމެ އުނދަގޫވެސް މެއެވެ. ހޫނު ގަދަ އިރެއްގައި އޭނާއަށް ދަތުރު ކުރަން ޖެހެނީ ގަދަ އަވީގަ އެވެ. އަދި ވިއްސާރަ މޫސުމުގައި ފެނާއި ޗަކަގަނޑު ތެރެއިންނެވެ. ބައެއް ދުވަސްދުވަހު އޭނާއަށް ސްކޫލުން ގެއަށް ނާދެވިފައި ވެސް ހުންނަން ޖެހެ އެވެ. އޭނާ ދަތުރުކުރާ މަގާއި އަވަށުގައި ފެންބޮޑުވުމުގެ ސަބަބުން ބައިސްކަލް ނުދުއްވިގެންނެވެ.
ރޯޝަނީ ބުނި ގޮތުގައި އެފަދަ ދުވަސްދުވަހު އޭނާ ސްކޫލާ ކައިރީގައި ހުންނަ ތިމާގެ މީހެއްގެ ގޭގައި މަޑު ކުރަނީ އެވެ. ބައެއް ފަހަރު ފެންގަނޑު ނުހިނދިގެން އެތައް ދުވަހަކު ވެސް ގެއަށް ނުދެވިފައި އޭނާއަށް ހުންނަން ޖެހޭ ކަމަށް މި ކުއްޖާ ބުންޏެވެ.
ރޯޝަނީގެ ބައްޕަ އަކީ ދަނޑުވެރިއެކެވެ. ދަރިފުޅަށް މި ލިބުނު މަތީ ވަނައިގެ ސަބަބުން އޭނާ ހުރީ ވަރަށް އުފަލުންނެވެ. އަދި ރޯޝަނީގެ ވާޙަކަ ނޫސްތަކުގައި ޖަހާފައިވާތީ ވެސް އޭނާގެ ބައްޕަ ވަރަށް އުފާވި އެވެ.
ދަރިފުޅާ ދޭތެރޭ ރޯޝަނީގެ ބައްޕަގެ އުންމީދުތައް ވެސް ވަރަށް މައްޗެވެ. ކިޔަވައިގެން ބޮޑެތި ބޮޑެތި ޑީގްރީތައް ނަގައިގެން ބޮޑެތި ބޮޑެތި ކުންފުނިތަކުގައި ދަރިފުޅު މަސައްކަތްކުރާތަން ދެކެން ބޭނުންވާ ކަމަށް ރޯޝަނީގެ ބައްޕަ ބުންޏެވެ.
ކިޔަވާ ނިމިގެން ރޯޝަނީ ބޭނުންވަނީ ކަލެކްޓަރެއްގެ ވަޒީފާ އެވެ. ރޯޝަނީ ބުނި ގޮތުގައި އިމްތިހާނުން އޭނާއަށް ހިސާބާއި ސައިންސް މާއްދާއިން 100 ލިބިފައި ވެއެވެ.
ކުޑަ ބިންކޮޅެއްގައި ދަނޑުވެރިކަން ކޮށްގެން ރޯޝަނީ އާއި އޭނާގެ ދެ ފިރިހެން ކޮއްކޮގެ ތައުލީމަށް ޚަރަދުކުރަން އެ ކުދިންގެ ބައްޕައަށް ވަރަށް ދައްޗެވެ. ނަމަވެސް ހުރިހާ ކުދިންނަށް ވެސް ކިޔަވައިދިނުމަށް އޭނާ އަޒުމު ކަނޑައަޅާފައިވާ ކަމަށް އޭނާ ބުންޏެވެ.
ރޯޝަނީ ބުނީ ސްކޫލު އަލުން ހުޅުވުމާއެކު ގްރޭޑް 11 ގައި އޭނާ ކިޔަވަން ފަށާނެ އެވެ. އޭރުން އަނެއްކާވެސް އެއް ކަހަލަ ދިގު ދަތުރު ކޮންމެ ދުވަހަކު ބައިސްކަލްގައި ކުރަން އޭނާއަށް ޖެހޭނެ އެވެ. ނަމަވެސް ކިޔަވާހިތްވާތީ އެއީ އޭނާއަށް އެހާ ބޮޑު މައްސަލައެއް ނޫނެވެ.