ވޯލްވާހެމްޓަން ވޮންޑާސްގެ ފޯވަޑް އެޑަމާ ޓްރައޯރޭ، އިދިކޮޅު ޓީމުގެ ޑިފެންޑަރުންގެ އަތްދަށު ނުވާން ވެގެން އަތާއި އޮޅަނބޮށީގައި ބޭބީ އޮއިލް އުނގުޅައިގެން މެޗަށް ނުކުންނަ ކަމަށް ވޯލްވްސްގެ އޮފިޝަލަކު ބުނެފި އެވެ.
ވޯލްވްސްގެ ހަލުވި ފޯވަޑް ވަނީ މި ސީޒަންގައި މޮޅު ކުޅުމެއް ދައްކާފަ އެވެ. އޭނާ ފާހަގަ ކުރެވިފައި ވަނީ މި ސީޒަންގައި ޕްރިމިއާ ލީގްގައި އިދިކޮޅު ޓީމުތަކުގެ ޑިފެންޑަރުންނަށް ހުއްޓުވަން އުނދަގޫ ކުޅުންތެރިޔެއްގެ ގޮތުގަ އެވެ.
"ދަ ސަން" ނޫހުގައި ބުނެފައި ވަނީ، ޑިފެންޑަރުން އޭނާ ހިފަހައްޓަން މަސައްކަތް ކުރިޔަސް ފަސޭހައިން ނެއްޓިގެން ދިއުމަށްޓަކައި ކޮންމެ މެޗެއްގެ ކުރިންނާއި ހާފް ޓައިމްގައި އަތުގައި ބޭބީ އޮއިލް އުނގުޅައިގެން ނުކުންނަ ކަމަށެވެ.
މިިދޔަ ހަފުތާގައި ކްރިސްޓަލް ޕެލަސްއާ ދެކޮޅަށް 2-0 ން މޮޅުވި މެޗަށް ވެސް ޓްރައޯރޭ ނުކުތީ އަތުގައި ބޭބީ އޮއިލް އުނގުޅައިގެނެވެ.
ތެޔޮ އުނގުޅައިގެން ނުކުންނަ އަނެއް ސަބަބަކީ، އޭނާއަށް ކުރިމަތިވާ އިންޖަރީ ކުޑަ ކުރުމެވެ. ޓްރައޯރޭ ފާހަގަ ކުރެވިފައި ވަނީ ކޮނޑަށް ގިނަ މައްސަލަތަކެއް ކުރިމަތިވާ ކުޅުންތެރިޔެއްގެ ގޮތުގަ އެވެ. ޑިސެމްބަރު މަހު ޓޮޓެންހަމް ހޮޓްސްޕާސް އާ ދެކޮޅަށް ކުޅުނު މެޗުގައި ވެސް އޭނާގެ ކޮނޑަށް އަނިޔާވި އެވެ.
މިހާރު ތެޔޮ އުނގުޅައިގެން ނުކުންނާތީ އިދިކޮޅު ޓީމުގެ ޑިފެންޑަރުން އޭނާ ހުއްޓުވުމުގެ ގޮތުން އަތުގައި ހިފެހެއްޓި ނަމަވެސް ޑިފެންޑަރުން ކައިރިން ފަސޭހައިން އޭނާއަށް ދޫވެގެން ދެވޭނެ އެވެ. އެހެންވެ ކޮނޑަށް ކުރިމަތިވާ ބާރު ކުޑަ އެވެ.
"އެއީ އަހަރެމެން އެޑަމާ ހިމާޔަތް ކުރުމުގެ ގޮތުން ކުރާ ކަމެއް،" ވޯލްވްސްގެ ޓީމުގެ އޮފިޝަލެއް ދަ ސަން އަށް ބުނެފައި ވެއެވެ. "ޑިފެންޑަރުން ވަރަށް ޖެހިލުންވޭ އޭނާ ދެކެ، އޭނާގެ ފިޒިކަލްގެ ސަބަބުން އޭނާ ހުއްޓުވަން އުނދަގޫވާތީ، ޑިފެންޑަރުން އޭނާ ހުއްޓުވަން ކުރާ ކަމަކީ އޭނާގެ އަތުގައި ހިފެހެއްޓުން، އެކަމުގެ ސަބަބުން އޭނާގެ ކޮނޑަށް އަނިޔާވޭ."
"ތެޔޮ އުނގުޅުމުން އިދިކޮޅު ޓީމަށް އޭނާ ހުއްޓުވަން އުނދަގޫ ވެގެންދޭ، އަދި އިތުރު އަނިޔާއަކުން ދުރުވެ ހުރުމަށް ފުރުސަތު ބޮޑުވޭ."