ސްޕެނިޝް ސުޕަ ކަޕްގެ ސެމީ ފައިނަލްގައި ރެއާލް މެޑްރިޑް މަޔޯކާ އަތުން 3-0ގެ ނަތީޖާއަކުން މޮޅުވެއްޖެ އެވެ.
މި މުބާރާތުގެ ފައިނަލްގައި ރެއާލް ވާދަކުރާނީ އަަބަދުވެސް އެޓީމާ އެންމެ ވާދަވެރި ކްލަބް ބާސެލޯނާއާ ދެކޮޅަށެވެ.
އިނގިރޭސި މިޑްފީލްޑަރު ޖޫޑް ބެލިންހަމް މި މޫސުމުގައިވެސް ވަނީ އޭނާގެ މޮޅު ފޯމު ދައްކުވައިދީފަ އެވެ.
މިދިޔަ އަށް މެޗުގައި ހަތް ލަނޑު ޖަހާފައިވާ ބެލިންހަމް ވަނީ ރޭގެ މެޗުގައިވެސް ފާހަގަކޮށްލެވޭ ކުޅުމެއް ދައްކާފަ އެވެ.
މެޗުގެ 63 ވަނަ މިނެޓާ ހަމައަށް ދިޔައިރުވެސް އެއްވެސް ޓީމަކަށް ލަނޑެއް ނުޖެހުނެވެ. މައްލޯކާގެ ވަރުގަދަ ދިފާއީ ލައިން ފޫއަޅުވާލުމަށް މެޑްރިޑަށް ދަތިވެފައި އޮއްވާ، މެޗުގެ ފުރަތަމަ ލަނޑު ޖެހީ ބެލިންހަމް އެވެ. ރޮޑްރީގޯ ޖެހި ވަރުގަދަ ޝޮޓެއް ޕޯސްޓުގައި ޖެހި އެނބުރި އައުމުން، އެމްބާޕޭ ޖެހި ޝޮޓު ގޯލްކީޕަރު ސޭވްކުރި އެވެ. ނަމަވެސް އަނެއްކާވެސް އެނބުރި އައި ބޯޅަ ބެލިންހަމް ވަނީ ތިން ޑިފެންޑަރުންނާއި ގޯލްކީޕަރު ކައިރީގައި ތިއްބާ ގޯލަށް ވައްދާލާފަ އެވެ.
އިތުރު ވަގުތުގެ ތެރޭގައި މާޓިން ވަލްޖެންޓްގެ އަމިއްލަ ލަނޑަކާއި ރޮޑްރީގޯ ޖެހި ލަނޑުން މެޗު ނިމުނީ ރެއާލް މެޑްރިޑް މޮޅުވެގެންނެވެ. ރެފްރީ މެޗުގެ ފަހު ކަށިގަނޑު ފުމެލުމާއެކު ކުޑަ ހަމަނުޖެހުމެއް ހިނގި ނަމަވެސް އެކަން ވަރަށް އަވަހަށް ކޮންޓްރޯލް ކުރެވުނެވެ.
މެޗު ބެލުމަށް ސްޓޭޑިއަމަށް ހާޒިރުވި މަޝްހޫރު ފަރާތްތަކުގެ ތެރޭގައި މިހާރު ސައުދީ ލީގުގައި ކުޅެމުންދާ، މެޑްރިޑްގެ ކުރީގެ ތަރި ކަރީމް ބެންޒެމާވެސް ހިމެނެވެ.
މިއީ 2019 ވަނަ އަހަރުން ފެށިގެން ސައުދީ އަރަބިއާގައި ބާއްވަމުން އަންނަ މުބާރާތެކެވެ. މި މުބާރާތް ރާވައި ހިންގަނީ ސްޕެނިޝް ފުޓްބޯޅަ އެސޯސިއޭޝަނުންނެވެ.
މި މުބާރާތް ސައުދީ އަރަބިއާގައި ބޭއްވުމަށް ހަމަޖެއްސުމާ ގުޅިގެން މުބާރާތުގައި ވާދަކުރާ ޓީމުތަކަށާއި އެސޯސިއޭޝަނަށް ބޮޑު އާމްދަނީއެއް ލިބެން ފަށާފައިވެއެވެ.
މުބާރާތުގެ ފައިނަލް މެޗު ބާއްވާނީ މިއަންނަ އާދީއްތަ ދުވަހު އެވެ. އެ މެޗުގައި ރެއާލް މެޑްރިޑް ކުރިމަތިލާނީ ސްޕެނިޝް ފުޓްބޯޅައިގެ އެންމެ ވާދަވެރި ބާސެލޯނާއާ ދެކޮޅަށެވެ.