އިނގިރޭސި ޕްރިމިއަ ލީގުގެ ކުލަބު އެވަޓަންގެ ކޯޗުކަމަށް ޑޭވިޑް މޮއިސް ގެނައުމަށްޓަކައި އެ ކުލަބުން އޭނާއާއެކު ވާހަކަ ދައްކަން ފަށައިފި އެވެ.
މިކަން މީޑިއާއަށް ތިލަވެފައިވަނީ އެވަޓަން އިން މޮއިސްއާއެކު ވާހަކަދައްކަން ފަށާފައިވާ ކަމަށް ބީބީސީ އިން ރިޕޯޓްކުރުމާ ގުޅިގެންނެވެ.
މިވަގުތު ރެލިގޭޝަން ޒޯނުގައި އޮތް އެވަޓަންގެ ކޯޗު ކަމަށް ގެނައުން އެންމެ ގާތް ފަރާތަކީ މޮއިސް ކަމަށް މީޑިއާ ރިޕޯޓްތައް ބުނެ އެވެ.
އެވަޓަން އިން އާ ކޯޗަކު ހޯދަން މަސައްކަތް ފަށާފައި މިވަނީ މިދިޔަ ބުރާސްފަތި ދުވަހު އެ ޓީމުގެ ކޯޗު ޑައިޗް މަގާމުން ވަކިކުރުމާ ގުޅިގެންނެވެ.
މޮއިސްއަކީ މީގެ ކުރިންވެސް އެވަޓަންއަށް ކޯޗުކޮށްދީފައިވާ ފަރާތެކެވެ. އޭނާ 2002 އިން 2013 އަށް އެވަޓަންގެ ކޯޗުކަން ކުރުމަށްފަހު، މެންޗެސްޓަ ޔުނައިޓެޑްގެ ކޯޗުކަމާ ހަވާލުވި އެވެ. އެންމެ ފަހުން އޭނާ ކޯޗުކަން ކޮށްދިން ވެސްޓް ހޭމް ޔުނައިޓެޑަށް އޭނާ ވަނީ 2023 ވަނަ އަހަރު ޔުއެފާ ޔޫރޮޕާ ކޮންފަރެންސް ލީގުގެ ޗެމްޕިއަންކަން ހޯދައިދީފަ އެވެ.
ނަމަވެސް މިކަމާ ގުޅޭގޮތުން ދާދި ފަހުން ދިން އިންޓަވިއުއެއްގައި މޮއިސް ބުނެފައިވަނީ އޭނާ، ރެލިގޭޝަނުން ސަލާމަތްވާން އުޅޭ ޓީމަކަށް ކޯޗުކޮށްދިނުމުގެ ވިސްނުމެއް ނެތް ކަމަށެވެ.
އެވަޓަން މިހާރު އޮތީ ތާވަލުގެ 16 ވަނައިގައި، ރެލިގޭޝަން ޒޯނާ ވަރަށް ކައިރީގަ އެވެ. އެހެންކަމުން މި މަގާމު މޮއިސް ބަލައިގަންނާނެތޯ އަދި ސުވާލު އުފެދެ އެވެ.