ކުރިއަށް އޮތް ޔުއެފާ ނޭޝަންސް ލީގުގެ މެޗުތަކަށް ނެގި އިނގިރޭސި ސްކޮޑުން 8 ކުޅުންތެރިން ވަކިވެއްޖެ އެވެ.
މިގޮތުން އަނިޔާ އާއި ފިޓްނަސްގެ ސަބަބުން ވަކިވި ކުޅުންތެރިންނަކީ ލިވަޕޫލްގެ ޓްރެންޓް އަލެކްސަންޑަ އާނޯލްޑް، ޗެލްސީގެ ކޯލް ޕާމާ އާއި ލީވައި ކޯލްވިލް، އާސެނަލްގެ ބުކާޔޯ ސަކާ އާއި ޑެކްލަން ރައިސް، މެންޗެސްޓާ ސިޓީގެ ފިލް ފޯޑެން އާއި ޖެކް ގްރީލިޝް އަދި ސައުތެމްޓަންގެ އާރޮން ރަމްސްޑޭލް އެވެ.
މީގެ ތެރެއިން ގްރީލިޝް އިނގިރޭސި ސްކޮޑުން ވަކިވި ގޮތާ ގުޅިގެން އަދި އިނގިރޭސި ޓީމުގެ ނިންމުންތަކަށް މެންޗެސްޓާ ސިޓީގެ ކޯޗު ޕެޕް ގާޑިއޯލާ ވަނީ ފާޑުކިޔާފަ އެވެ. ސްކޮޑުން މި ފަހަރު ވަކިވި ގިނަ ކުޅުންތެރިން އެ ގޮތަށް ނިންމީ ކްލަބްގެ މެޑިކަލް ޓީމާ މަޝްވަރާ ކުރުމަށްފަހު އެވެ.
ނޭޝަންސް ލީގުގައި އަޔަލެންޑާއި ގްރީސްއާ އެކު ކުޅޭ މެޗަށް ނެގި ސްކޮޑުން ވަކިވި ކުޅުންތެރިންގެ ބަދަލުގައި ދެން ސްކޮޑުގައި އަލުން ހިމެނި ކުޅުންތެރިންނަކީ އެސްޓަން ވިލާގެ މޯގަން ރޮޖާސް، ވެސްޓް ހޭމްގެ ޖެރަޑް ބޮވެން، އެވަޓަންގެ ޖަރަޑް ބްރަންތުވެއިޓް، ނިއުކާސަލް ޔުނައިޓެޑްގެ ޓީމޯ ލިވްރަމެންޓޯ އަދި ބާންލީގެ ކީޕަރު ޖޭމްސް ޓްރަފޯޑް އެވެ.
އިނގިރޭސި ޓީމަށް މި ފަހަރުގެ މެޗުތަކުގައިވެސް ކޯޗުކޮށްދޭނީ ލީ ކާސްލީ އެވެ. މިއީ ކާސްލީގެ ކޯޗުކަމުގައި އިންގިރޭސި ޓީމުން ކުޅޭނެ ފަހު މެޗުތަކެވެ. އިނގިރޭސި ޓީމާ ހަވާލުވި ތޯމަސް ޓުޗެލް ވަޒީފާގެ މަސައްކަތްތައް ފަށާނީ ޖެނުއަރީ 1 ގައެވެ.