އިންޑިޔާގެ ކެރެލާގެ ދެމަފިރިއަކު އެމީހުން ނިސްބަތްވާ މައްލަޕުރަމް އަވަށުގެ މީހުންނަށް ނަމޫނާ ދައްކައިފި އެވެ. އެމީހުންގެ ފިރިހެން ދަރިފުޅާއެކު 12 ވަނަ ގްރޭޑުގެ އިމްތިހާނުގައި ބައިވެރި ވެގެންނެވެ. މި ދެމަފިރިން މިހާ ހިސާބުން ވެސް ކިޔެވުން ހުއްޓާލާކަށް ބޭނުމެއް ނޫނެވެ. ކުރިޔަށް އޮތް ތާނގައި ވެސް ދަރިފުޅާއެކު ކިޔެވުން ކުރިޔަށް ގެންދަން މި މީހުން ވަނީ ނިންމާފަ އެވެ.
މުހައްމަދު މުސްތަފާ އާއި އޭނާގެ އަންހެނުން ނުސައިބާ ވަރަށް ޅަ އުމުރުގައި ކިޔެވުން ހުއްޓާލަން ޖެހުނީ މާލީ ހާލަތު ގޯސް ވެގެންނެވެ.
މުސްތަފާ، 43، އަކީ ވިޔަފާރިކުރާ މީހެކެވެ. އޭނާ އާއިލާ ގޮވައިގެން ޔޫއޭއީގައި ވަރަށް ގިނަ ދުވަހު ދިރިއުޅުނެވެ.
މުސްތަފާ މަސައްކަތް ކުރީ އަބޫ ދާބީގައި ހުންނަ ޖަނަވާރުންނަށް ފަރުވާ ދޭ ކްލިނިކެއްގަ އެވެ. ނުސައިބާ އާ ކައިވެނިކޮށް އޭނާ ގޮވައިގެން ގޮސް ވެސް ވަރަށް ގިނަ ދުވަހު ޔޫއޭއީގައި ދިރިއުޅުނެވެ. ނަމަވެސް 2015 ގައި މި ދެމަފިރިން އަނެއްކާވެސް އިންޑިޔާއަށް ދިރިއުޅުން ބަދަލު ކުރީ އެވެ.
ކެރެލާގެ ލިޓެރަސީ މިޝަން އިން ބޮޑެތި މީހުންނަށް ޚާއްސަކޮށް ބާއްވާ އިމްތިހާނެއްގެ ޚަބަރު މުސްތަފާގެ ދަރިފުޅަށް ލިބުމުން މައިންބަފައިންނަށް މި އިމްތިހާނުގައި ބައިވެރިވުމުގެ ހިޔާލު ދިނުމުން އެމީހުން ވެސް އެކަމާ އެއްބަސްވީ އެވެ. މި އިމްތިހާނުގައި ބައިވެރިވުމަށް މި ދެމަފިރިން ކިޔަވަމުން ދިޔައީ އާދިއްތަ ދުވަހު އެކަނި ބޭއްވި ކްލާހެއްގަ އެވެ. ހަފުތާގެ ދުވަސްތަކުގައި ވަޒީފާ އަދާ ކުރަމުން ބަންދު ދުވަސްތަކުގައި ކިޔަވާނެ ފުރުސަތު މި ދެމަފިރިންނަށް ލިބި އެމީހުން ކިޔެވޭ އެގޮތަށެވެ.
ބުރަކޮށް މަސައްކަތް ކުރަމުން ލިބޭ ޗުއްޓީ ދުވަސްތަކުގައި ކިޔަވަމުން ވެސް ދެމަފިރިން ވަނީ 12 ވަނަ ގްރޭޑުގެ އިމްތިހާނާ އެއް ފެންވަރުގެ އިމްތިހާނަކުން ވަރަށް ރަނގަޅަށް ފާސް ވެފަ އެވެ. ނުސައިބާ އަށް 80 ޕަސެންޓް ލިބުނުއިރު މުސްތަފާ ވެސް ރަނގަޅަށް ފާސްވި އެވެ.
އަދި އެމީހުންގެ ދަރިފުޅު ޝަމާސް ވެސް ވަނީ އެ ދެމަފިރިން ފާސްވިތާ ހަތަރު މަސް ފަހުން 12 ވަނަ ގްރޭޑް ނިންމާފައި ސްކޫލުތަކުންދޭ އިމްތިހާނުން ފާސް ވެފަ އެވެ.
މުސްތަފާ ބުނީ ދެމަފިރިން ވެސް ވަރަށް ބުރަކޮށް އެމީހުން ކުރާ ވިޔަފާރީގެ މަސައްކަތުގައި އުޅެން ޖެހޭތީ ކިޔެވުމަށް މާ ގިނަ ވަގުތެއް ނުދެވެ އެވެ. ނަމަވެސް ކިޔެވުމުގައި އެމީހުންނަށް އެހީތެރިވަނީ ދަރިފުޅު ކަމަށް މުސްތަފާ ބުންޏެވެ.
"އަހަރެމެންނަށް ނޭނގޭ އެއްޗެހި ދަރިފުޅު ބުނެދޭ. އަދި އަހަރެމެންނާ ސުވާލު ކޮށްގެން ފިލާވަޅު ރަނގަޅަށް އެނގޭތޯ ވެސް ދަރިފުޅު ބަލާނެ،" މުސްތަފާ ބުންޏެވެ.
މުސްތަފާގެ ދަރިފުޅަކީ ކިޔެވުމަށް ވަރަށް މޮޅު ކުއްޖެއް ކަމަށާއި ގްރޭޑް 11 އަދި 12 ގައި ހުރިހާ މާއްދާއަކުން އޭ ޕްލަސް ގެނައި ކަމަށް ވަރަށް ފަޚުރުވެރިކަމާއެކު މުސްތަފާ ބުންޏެވެ.
"ނަމަވެސް ކޮރޯނާވައިރަހުގެ ސަބަބުން ކިޔެވުމަށް ބުރޫ އަރައިގެން ބޯޑު އެގްޒޭމުން އެއް މާއްދާއިން ދަރިފުޅަކަށް އޭ ޕްލަސް އެއް ނުލިބުނު. އެ ވެސް އެންމެ ތިން މާކްސް މަދުވެގެން،" މުސްތަފާ ބުންޏެވެ.
މިހާރު މުސްތަފާ އާއި އަންހެނުން އަދި ދަރިފުޅު ވެސް ދަނީ ޑިގްރީ އަށް ކިޔެވުމަށް ތައްޔާރު ވަމުންނެވެ. އެންމެންވެސް ކޮމާސްގެ ރޮނގުން ކިޔަވަން ގަސްތުކުރާއިރު ޝަމަސް ކިޔަވަން ބޭނުންވަނީ ޗާޓާޑް އެކައުންޓެންސީ އެވެ. މުސްތަފާ އާއި އޭނާގެ އަންހެނުން ހަދާނީ ކޮމާސްގެ ބެޗްލާޒް ޑިގްރީ އެކެވެ.