ދިގު މުއްދަތަށް ފައިސާ ދައްކާ ގޮތަށް ފިޝަރީޒް މިނިސްޓްރީން ދޫކޮށްފައިވާ ދޯނި ފަހަރަށް ފައިސާ ދައްކާ ހަލާސް ކުރަން އަންގައިފި އެވެ.
ފިޝަރީޒް މިނިސްޓްރީން ބުނީ 1997-2002 ވަނަ އަހަރުގެ ނިޔަލަށް 10 އަހަރުން ފައިސާ ދައްކާ ހަލާސްކުރާ ގޮތަށް މިނިސްޓްރީން ދޫކުރި މަސްދޯނިފަހަރުގެ އަގުގެ ގޮތުގައި ދައުލަތަށް ދައްކަންޖެހޭ ފައިސާ ނުދައްކާ ފަރާތްތަކުން އަންނަ މަހުގެ އެކެއްގެ ކުރިން ފިނޭންސް މިނިސްޓްރީއަށް ފައިސާ ދައްކަން އިލްތިމާސް ކުރާ ކަމަށެވެ.
ނަމަވެސް، ފައިސާ ނުދައްކަ ހުރީ ކިތައް ދޯނިކަމެއް މިނިސްޓްރީން ނުބުނެ އެވެ.
"އަދި މި މުއްދަތުގައި ދޯނީގެ އަގުގެގޮތުގައި ދައުލަތަށް ދައްކަންޖެހޭ ފައިސާ ދައްކައި ހަލާސްނުކޮށްފިނަމަ މި މިނިސްޓްރީއާ އެ ފަރާތްތަކާ ދެމެދު ވެފައިވާ އެއްބަސްވުމުގެ 15 ވަނަ މާއްދާގެ (ހ) ގައިވާގޮތުގެ މަތިން އަމަލުކުރެވޭނެކަމުގައި ވެސް ދަންނަވަމެވެ،" ފިޝަރީޒް މިނިސްޓްރީން ބުނެފައިވެ އެވެ.
ދިގު މުއްދަތުގައި އަގު ދައްކައި ނިންމާގޮތަށް ފިޝަރީޒް މިނިސްޓްރީން ދޫކުރި މަސް ދޯނިފަހަރުގެ އަގުގެ ގޮތުގައި ދައުލަތަށް ދައްކަންޖެހޭ ފައިސާ ދެއްކުމަށް ދަތިތަކާއި ކުރިމަތިވަމުންދާ ފަރާތްތަކަށް ލުޔެއް ހޯދައިދިނުމުގެ ގޮތުން 2009 ވަނައަހަރު ދޯނީގެ އަގުގެ 50 ޕަސެންޓް ދައްކަވާފައިވާ ފަރާތްތަކަށް މަސްވެރިކަން ނޫން އެހެން ބޭނުންތަކަށް ދޯނި ބޭނުންކުރުމުގެ ފުރުސަތު ވެސް ދީފައިވާނެ އެވެ.
ފިޝަރީޒް މިނިސްޓްރީން ވަނީ އަގު އަދާކުރުމަށް ދަތިވާ ފަރާތްތަކަށް، އެފަދަ ފަރާތްތަކާއި އެމިނިސްޓްރީއާ ދެމެދު ވެފައިވާ އެއްބަސްވުން އެހެން ފަރާތަކަށް ބަދަލުކުރުމުގެ ފުރުސަތުވެސް ކުރިން ދީފަ އެވެ. މީގެ އިތުރުން އަގަށް މިހާރު ނުދެއްކި ހުރި ޖުމުލަ އަދަދު ދެއްކޭނެ މުއްދަތެއް ދިނުމުން އެ މުއްދަތަކީ ސަރުކާރުން ގަބޫލުކުރެވޭ މުއްދަތަކަށްވާނަމަ އެގޮތަށް އެފަދަ ފަރާތާއި އެ މިނިސްޓްރީއާ ދެމެދު ވެފައިވާ އެއްބަސްވުން އިސްލާހު ކޮށްދިނުމުގެ ފުރުސަތު ވެސް 2010 ވަނަ އަހަރު ދީފައިވެ އެވެ.
ފިޝަރީޒް މިނިސްޓްރީން ބުނީ އެހެންކަމުން ފައިސާ ދެއްކުމަށް މިހާރު އަންގާފައިމިވަނީ އެއްވެސް ފުރުސަތެއްގެ ބޭނުން ހިފާފައިނުވާ، ގަވާއިދުން ފައިސާ ނުދައްކާ ފަރާތްތަކަށެވެ.