މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން 100 ރުފިޔާގެ ނޫޓު، ސްޓޮކް މަދުވުމުން އަލުން ޗާޕްކޮށްފި އެވެ.
އެމްއެމްއޭ އިން މިއަދު ބުނީ އަލަށް ޗާޕް ކުރި ނޫޓުތައް ބާޒާރަށް ދޫކޮށްލާނީ މިމަހުގެ 19 ވަނަ ދުވަހު ކަމަށެވެ.
ދިވެހި ފައިސާގެ ތެރޭގައި ހިމެނޭ ނޫޓުތަކުގެ ތެރެއިން ދައުރުވާ ނޫޓު މަދުވެއްޖެނަމަ މީގެކުރިންވެސް ޗާޕް ކޮށްގެން ބާޒާރަށް ނެރެފައިވެ އެވެ. އެގޮތުން ސެޕްޓެމްބަރު 2018 ގައިވެސް 100 ރުފިޔާގެ އާ ނޫޓުތަކެއް ނެރުނެވެ.
ބާޒާރަށް މިމަހު ނެރޭ ނޫޓުތަކުގައި ސޮއި ކުރައްވާފައިވަނީ ކުރީގެ ގަވަރުނަރު އަލީ ހާޝިމް އެވެ. ނޫޓުގައި ޖަހާފައިވާ ތާރީހަކީ ޖުލައި 7، 2024 އެވެ.
ބާޒާރަށް ނެރޭ 100 ރުފިޔާގެ އާ ނޫޓުގެ ޑިޒައިނަށް ބަދަލެއް ގެނެސްފައިވެ އެވެ. އެގޮތުން 100 ރުފިޔާގެ ނޫޓުގެ ދެފުށުގައ،ި ދިވެހި ރުފިޔާގެ ނިޝާން ހިމަނާފައިވާނެ އެވެ.
ރާއްޖޭގެ މިނިވަންކަމަށް 50 އަހަރު ފުރުމާ ދިމާކޮށް ރައީސް އަބްދުﷲ ޔާމީންގެ ވެރިކަމުގައި ބާޒާރަށް ނެރުނު ދިވެހި ފައިސާ "ރަން ދިހަ ފަހެއް"ގެ ނޫޓު ސީރީޒްގައި ހިމެނެނީ 5، 10، 20، 50، 100، 500 އަދި 1،000 ރުފިޔާ އެވެ.