ހުޅުމާލޭގައި އާއްމުންނަށް ދަނޑުވެރި ހެއްދޭ ގޮތަށް "އާބަން ދަނޑުވެރިކަން" ފަށަން ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ތައްޔާރު ވާން ފަށައިފި އެވެ.
ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) އިން ބުނެފައިވާ ގޮތުގައި ފަށަން ނިންމާފައިވާ "ކޮމިއުނިޓީ ގާޑެނިން" ޕްރޮގްރާމަށް ބަދަލު ގެނެސް، ފުރަތަމަ ފިޔަވަހީގައި ކާބޯތަކެތި ހެއްދޭނެ އިންތިޒާމު ތަކެއް ހަމަޖައްސަން ނިންމާފައިވާ ކަމަށެވެ. މިގޮތުން އެ ކުންފުނިން ވިސްނަމުން ބަދަލުކޮށްފައިވަނީ ކޮވިޑް-19 އާ ގުޅިގެން ކާނާގެ ޔަގީންކަން ކަށަވަރު ކުރުމާއި އާއްމުން ބާރުވެރި ކުރުވާށެވެ.
އެޗްޑީސީ އިން ބުނެފައިވާ ގޮތުގައި އާބަން ދަނޑުވެރިކަމަށް ދޫކުރާ ބިންތަކުގައި ކުރަން ޖެހޭ އިމާރާތް ކުރުމުގެ މަސައްކަތްތައް ޖުލައި މަހުގެ 13 އިން ފެށިގެން ކުރަމުންދާ ކަމަށާ، އެ މަސައްކަތް ހަ މަސް ތެރޭ މަސައްކަތް ނިންމާލެވޭނެ ކަމަށެވެ.
އެ ކުންފުނިން ބުނެފައިވާ ގޮތުގައި މި ޕްރޮގްރާމުުގެ ދަށުން 40 ދަނޑުވެރިންނަށް ފުރުސަތު ދޭނެ ކަމަށެވެ. މިގޮތުން ދޫކުރަން ހަމަޖެހިފައިވަނީ 600 އަކަފޫޓުގެ ބިން ތަކެވެ. އެ ސަރަހައްދުން ބިން ދިނުމުގެ އިތުރުން ދަނޑުވެރިކަމުގެ ސާމާނު ލިބޭނެ ފިހާރައަކާއި ފާހާނާ އަދި ދަނޑުވެރިކަމުގެ ބޭސް ތަކެތި ލިބޭނެ ތަނެއް ވެސް ހުންނާނެ އެވެ.
އެޗްޑީސީ އިން ބުނެފައިވާ ގޮތުގައި މި ޕްރޮގްރާމުގެ 40 ޕަސެންޓް ހާއްސަ ކުރާނީ އަންހެނުނަށެވެ. އަދި 30 ޕަސެންޓު ޒުވާނުންނާއި ހާއްސަ އެހީއަށް ބޭނުންވާ މީހުންނަށް ދޭއިރު، ބާކީ އޮތް 30 ޕަސެންޓް އާއްމުންނަށް ދޫކުރާނެ ކަމަށް ބުނެފައިވެ އެވެ.