ޔޫރަޕާ ލީގްގެ އެންމެ ކާމިޔާބު ޓީމަށް ސެވިއްޔާ ހަދައިދިނުމުގެ ފަހަތުގައި ސްޕޯޓިން ޑައިރެކްޓާ ރާމޮން ރޮޑްރިގޭޒް (މޮންޗީ) ދައުރު ބޮޑެވެ. ޔޫރޮޕާ ލީގާއި ސެވިއްޔާގެ ގުޅުން މޮންޗީ ސިފަ ކުރީ "ލޯބީގެ ވާހަކައެއް" ގެ ގޮތުގަ އެވެ. އެ ވާހަކައިގެ ބަތަލަކީ މޮންޗީ ކަމަށް ބެލިދާނެ އެވެ. ކުރިން ސެވިއްޔާއަށް ކުޅުނު ކީޕަރާއި އެ ކުލަބާ ދެމެދު އުފެދިފައިވާ ގުޅުމަކީ ލޯބީގެ ހިޔާލީ ވާހަކައަކަށް ވުރެވެސް، ކިޔާލަން މާ ރީތި ވާހަކަ އެވެ. ތިރީގައި މި ވަނީ އެ ވާހަކަ އެވެ.
ސްޕެއިންގެ ފުޓްބޯޅައިގައި ރެއާލް މެޑްރިޑާއި ބާސެލޯނާއިން ދެމެހެއްޓި ދެ ކުލަބުގެ ޑޮމިނެންސް ފުޅާކޮށް ތިން ވަނަ ކުލަބަކަށް އެތުލެޓިކޯ މެޑްރިޑް ވެގެންދިޔައިރު ވެސް، އެވަރުގެ ޖާގައެއް އެހެން ކުލަބަކަށް އުފެއްދޭ ގޮތެއް ނުވި އެވެ. އެއް އަހަރު ސެވިއްޔާ ގަދަ ހަތަރެއްގައި ހިމެނިއްޖެނަމަ އަނެއް އަހަރު ވިޔަރެއާލް ގަދަ ހަތަރަކަށް ވަދެ އެވެ. ނުވަތަ ވެލެންސިއާ ރެއާލް ސޮސިއެޑާޑް އާއި އެތުލެޓިކް ކުލަބު ބިލްބާއޯ އެވެ. މިދިޔަ 10 އަހަރުގައި، ގަދަ ތިނެއް އޮންނަނީ މެޑްރިޑްގެ ދެ ކުލަބާއި ބާސާއަށް ހިތަކަށް ލިބިފަ އެވެ. އެހެންވެ ސްޕެއިންގައި ބޮޑު ކުލަބަކަށް ބެލެވިފައި އޮތީ އެ ތިން ކުލަބެވެ.
"ބޮޑު ކުލަބު" ގެ ނަން ހޯދަން ސެވިއްޔާގެ ޗާޓް މޮންޗީ ކުރަހާލީ އެހެން ގޮތަކަށެވެ. އޭނާ ބެލީ ތައްޓަށް ވާދަ ކުރާނެ ކުލަބަކަށް ސެވިއްޔާ ހެދުމަށެވެ. އޭނާ ސަމާލުކަން ދިނީ ޔޫރަޕްގެ ދެ ވަނަ ފަންތީގެ މުބާރާތުގެ ގަދަ ބާރަކަށް ސެވިއްޔާ ހެދުމަށެވެ. "ބޮޑު ކުލަބު" ގެ މަގާމު ސެވިއްޔާއަށް ހޯދެން އޮތީ އެ މަގުންކަން މޮންޗީ ދެނެގަތެވެ. ޔޫރޮޕާ ލީގްގެ ފައިނަލު ބުރު ކުރިއަށް ދިޔަ ޖަރުމަންގެ ކްލޯންގައި ހުރެ އޭއެފްޕީއަށް ދިން އިންޓަވިއުގައި މޮންޗީ ދެއްކީ އެ ވާހަކަ އެވެ.
"ޔޫރޮޕާ ލީގާއި ސެވިއްޔާ އާ ދެމެދު އޮތް ތާރީހީ ގުޅުމަކީ 'ލޯބީ ވާހަކައެއް' ހެން އަހަންނަށް ހީވަނީ،" އޭއެފްޕީއަށް ދިން އިންޓަވިއުގައި މޮންޗީ ބުންޏެވެ. "އިތުރު އެއްވެސް ބަޔަކު ޕްލޭނެއް ނުކުރާނެ ޔޫރޮޕާ ލީގް ކާމިޔާބު ކުރާކަށް އަހަރެމެން މި ތައްޔާރުވާ ގޮތާއި އަހަރެމެން ޕްލޭން ކުރާ މިންވަރަކަށް، ކޮންމެ ޓީމަކަށް ވެސް ޔޫރޮޕާ ލީގް ކާމިޔާބު ކުރެވިދާނެ، ނަމަވެސް ސެވިއްޔާގެ މިއޮތް އަޒުމާއި އެކަމަށް އޮތް ޝައުގުވެރިކަމާއި ޔޫރޮޕާ ލީގް މަގަބޫލު ކަން އެހެން އެއްވެސް ކުލަބެއްގައި ނޯންނަ ވަރަށް މި ކުލަބުގައި އޮންނާނެ، ޔޫރޮޕާ ލީގަކީ ސެވިއްޔާ ބޮޑު ކުލަބަކަަށް ހަދައިދިން މުބާރާތް."
ސެވިއްޔާގެ ސްޕޯޓިން ޑައިރެކްޓަރު ކަމާ މޮންޗީ ހަވާލުވީ، ދެހާސް ވަނަ އަހަރު އެ ކުލަބު ދެ ވަނަ ޑިވިޝަނަށް ރެލިގޭޓް ވުމުންނެވެ. އެ ޓީމު ނިސްބަތްވާ އަންދަލޫސިއާގެ ވާދަވެރި ކުލަބު ރެއާލް ބެޓިސް އާއި އެތުލެޓިކޯ މެޑްރިޑްވެސް އެ އަހަރު ދެ ވަނަ ޑިވިޝަނަށް ރެލިގޭޓް ވި އެވެ. ސެވިއްޔާ އާއި ބެޓިސް ފުރަތަމަ އަހަރުން ޕްރަމޯޓްވި އެވެ. އެޓެލެޓިކޯ ކޮލިފައި ނުވެ ދެ ވަނަ ޑިވިޝަންގައި އިތުރަށް މަޑުކުރަން ޖެހުނީ އެވެ. މޮންޗީ ހަވާލުވެ ސްކޮއުޓިން ނެޓްވޯލެއް އެކުލަވާލި އެވެ.
ރެއާލްގެ ކެޕްޓަން ސާޖިއޯ ރާމޯސް އާއި ބްރެޒިލްގެ ޑެނީ އަލްވޭސް، އެޑްރިއާނޯ، ހެސޫސް ނާވަސް އަދި އިވާން ރެކިޓިޗް އަކީ ސެވިއްޔާގެ ސްކޮއުޓިން ނެޓްވޯކްގެ ތެރެއިން ރެކްރޫތްވި ފާޙގަ ކުރެވޭ ކުޅުންތެރިންނެވެ. އެ ކުޅުންތެރިން އެހެން ކުލަބުތަކަށް ވިއްކައިގެން ސެވިއްޔާއަށް ބޮޑު ފައިދާއެއް މޮންޗީ ހޯދައިދިނެވެ.
ފުރަތަމަ ޑިވިޝަނަށް އަލުން އައިސް، މޮންޗީ ސިފަ ކުރާ "ބޮޑު ކުލަބުގެ" ސަފަށް ސެވިއްޔާ ގެންދިއުމަށް އޭނާ މަސައްކަތް ކުރީ ތަށި ހޯދުމުގެ ޕްލޭނާ އެކު އެވެ. ޓޮޕް ޑިވިޝަންގައި އޭގެ ކުރިން ސެވިއްޔާއަށް ތައްޓެއް ހޯދިފައި ވަނީ 1947 ވަނަ އަހަރު އެވެ. މޮންޗީގެ ވިސްނުން ޔޫރޮޕާ ލީގަށް ގެންދިޔަ އެވެ. ޔޫރޮޕާ ލީގްގެ ފުރަތަމަ ތަށި ސެވިއްޔާއިން ހޯދީ މިޑްލްސްބަރާ ބަލިކޮށް 2006 ވަނަ އަހަރު އެވެ. އެއީ ގާތްގަނޑަކަށް 60 އަހަރު ފަހުން ސެވިއްޔާއަށް ލިބުނު ފުރަތަމަ ތައްޓެވެ.
އޭގެ ފަހުން ޔޫރޮޕާ ލީގް ހޯދަމުން އެ މުބާރާތުގެ ރަސްކަން ސެވިއްޔާއަށް ފޮރޯޅުނެވެ. ތަފާތު ތިން ކޯޗުންނާއެކު އެ މުބާރާތުގެ ތަށި ހަފަހަރު ހޯދިއިރުވެސް، ކުލަބުގައި ބަދަލު ނުވެ ހުރި މީހަކީ މޮންޗީ އެވެ. ހުއަންޑޭ ރާމޯސްގެ ކޯޗް ކަމުގައި ޖެހިޖެގެން ދެ އަހަރު އެ މުބާރާތް ކާމިޔާބު ކުރި އެވެ. އުނައި އެމެރީގެ ކޯޗް ކަމުގައި ޖެހިޖެހިގެން ތިން ފަހަރު އެ މުބާރާތް ކާމިޔަބު ކުރި އެވެ. ރޯމާގައި ދެ އަހަރު މަސައްކަތް ކުރުމަށް ފަހު ސެވިއްޔާއާ އަލުން މޮންޗީ ގުޅުނީ މިދިޔަ ސީޒަންގަ އެވެ. މިހާރުގެ ކޯޗް ހުލެން ލޮޕެޓެގީވެސް ސެވިއްޔާގެ މަގާމަށް ގެނައީ މޮންޗީގެ ހިޔާލަށެވެ.
މޮންޗީ އާއި ލޮޕެޓެގީ ގުޅުންވީ ކުރިން އޭނާ އާއެކު މަސައްކަތް ކުރި އެހެން ކޯޗުންނަށް ވުރެ ބަދަހި ގުޅުމަކަށެވެ. ލޮޕެޓެގީ ޓީމާ ހަވާލުވި ފަހުން މޮންޗީ ދިން އިންޓަވިއުއެއްގައި ބުނެފައި ވަނީ ކުޅުންތެރިންގެ ފަރާތުން، ލޮޕެޓެގީ ޑިމާންޑް ކުރާ ވަރު ފެނިފައި އޭނާ ހައިރާންވާ ކަމަށެވެ. އަދި ލޮޕެޓެގީއަކީ ޒަމާނީ ފުޓްބޯޅަށް ފަރިތަ ކޯޗަކަށް ވުމަކީވެސް ލޮޕެޓެގީއާ މެދު މޮންޗީ ޝައުގުވެރިވި އެއް ސަބަބެވެ.
ޓީމުގެ ފަރުދާގެ ފުރަގަހުގައި މޮންޗީ ހުރެގެން 10 ތަށި ހޯދައިފި އެވެ. ޔޫރޮޕާ ލީގްގެ ހަ ތަށީގެ އިތުރުން، ބާސެލޯނާ ބަލިކޮށް 2006 ވަނަ އަހަރު ހޯދި ޔޫއެފާ ސްޕަ ކަޕާއި 2007 އަދި 2010 ގައި ކާމިޔާބު ކުރި ޝްޕެނީޝް ކަޕް އަދި 2007 ވަނަ އަހަރު ހޯދި ސްޕެނިޝް ސުޕަ ކަޕެވެ. ޔޫރޮޕާ ލީގް ކާމިޔާބު ކުރުމުން އަންނަ މަހު ފަހު ކޮޅުގައި ކުޅޭ ޔޫއެފާ ސުޕަ ކަޕްގައިވެސް ސެވިއްޔާ ވާދަ ކުރާނެ އެވެ. އެއީ މޮންޗީގެ ސްޕޯޑީން ޑައިރެކްޓާޝިޕްގައި އެ ޓީމު ކުޅޭނެ 20 ވަނަ ފައިނަލެވެ.
ކުޅުންތެރިން ރެކްރޫޓް ކުރުމުގެ އިތުރަށް، މޮންޗީގެ އެންމެ ހާއްސަ ހުނަރަކީ ޓްރާންސްފާ ޑީލްތަކެވެ. ޔޫރަޕްގެ ބޮޑެތި އެހެން ކުލަބުތަކުން 100 މިލިއަން ޔޫރޯއަށް އެއް ކުޅުންތެރިޔަކު ގެންނައިރު، 100 މިލިއަން ޔޫރޯ ހަރަދުކޮށް ބޮޑެތި ޓީމުތަކާ ވާދަ ކުރެވޭ ވަރުގެ ސްކޮޑެއް ސެވިއްޔާގައި އެކުލަވާލަ އެވެ. ނިމިދިޔަ ސީޒަނަށް ސެވިއްޔާއިން ވަނީ 100 މިލިއަން ޔޫރޯ ޓްރާންސްފާގައި ހޭދަ ކޮށްފަ އެވެ.