ދިރާގު ބިޒްނަސްތަކަށް ދޫކުރާ، "ބިޒް ފައިބަ ބްރޯޑްބޭންޑް" ޕެކޭޖްތަކަށް ބޮޑު ބަދަލެއް ގެނެސްދީފި އެވެ.
ރާއްޖޭގެ އެންމެ ބޮޑު މުއާސަލާތީ ކުންފުނި، ދިރާގުން ބުނި ގޮތުގައި މި ބަދަލާއެކު، އިތުރު ހަރަދަކާ ނުލާ އިތުރު ޑޭޓާ އާއި އެންމެ ހަލުއި ސްޕީޑް އަދި އެއް އަހަރު ދުވަހަށް ހިލޭ ވަޗުއަލް މީޓިން ރޫމް ހިދުމަތް ލިބިގެންދާނެ އެވެ. މި ބަދަލާއެކު ކުދި އަދި މެދު ފަންތީގެ ވިޔަފާރިތަކަށް އިތުރު ލުއިތަކެއް ވެސް ލިބޭނެ އެވެ.
މި ބަދަލާއެކު، އިތުރު ހަރަދަކާ ނުލާ 40 ޕަސެންޓާއި 100 ޕަސެންޓާ ދެމެދުގެ އަދަދަކަށް އިތުރު ޑޭޓާ އާއި އެންމެ ހަލުއި ސްޕީޑް ލިބިގެންދާނެ އެވެ.
ބިޒްނަސް ކަސްޓަމަރުންނަށް އެހީތެރިކަން ދިނުމުގެ ގޮތުން ބިޒް ފައިބަ ބޭސިކް 10އެމް، ޕެކޭޖުން މަތީގެ ޕެކޭޖުތައް ބޭނުން ކުރާ ވިޔަފާރިތަކަށް އެއް އަހަރު ދުވަހުގެ ނިޔަލަށް ހިލޭ ވާޗުއަލް މީޓިން ރޫމް ލިބޭނެ އެވެ. މިއީ "ކްލައުޑް ހޮސްޓެޑް" ހިދުމަތެއްގެ އިތުރުން، އޯޑިއޯ އަދި ވީޑިއޯ ކޯލް ވެސް ކުރެވޭ ހިދުމަތެކެވެ.
ވިޔަފާރިތަކަށް މިހާރު ވާޗުއަލް މީޓިންތައް ބޭނުން އިރެއް ވަންދެން ކޮންމެ ވަގުތެއްގައި ވެސް ހިލޭ ބޭއްވޭނެ އެވެ. މިއާއެކު، ވިޔަފާރިތަކުގެ މަސައްކަތްތެރި ކަމަށް އިތުރު ފުރިހަމަ ކަމެއް ގެނެސްދިނުމަށް ދިރާގުން ވަނީ މައިކްރޯސޮފްޓް އޮފީސް 365 އެޑް-އޮންސް ވިޔަފާރި ތަކަށް ހާއްސަކޮށްގެން ތައާރަފުކޮށްފަ އެވެ. އޮފީސް 365 ގައި ހިމެނޭ އެންމެ ފަހުގެ އެޕް ތަކާއި، ކްލައުޑް ހިދުމަތުގެ އިތުރުން ދުނިޔޭގެ ފެންވަރުގެ ސެކުއިރީޓީގެ ސަބަބުން ވިޔަފާރިތަކަށް މަސައްކަތުގައި އިތުރު ކުރިއެރުމާއި ފަސޭހަ ލިބެ އެވެ.
ދިރާގުގެ ޑިރެކްޓަރު ބިޒްސަސް ސޮލިއުޝަންސް މުސްތާގް އަހުމަދު ދީދީ ވިދާޅުވި ގޮތުގައި، ނިއު ނޯމަލްގައި މަސައްކަތް ކުރަން ޖެހިފައިވާ މި ދަނޑިވަޅުގައި ވިޔަފާރިތައް ވަނީ ޑިޖިޓަލް ޓެކްނޮލޮޖީއަށް ވަރަށް ބޮޑަށް ބަރޯސާވާން ޖެހިފަ އެވެ. އެހެންކަމުން ބިޒް ފައިބަ ޕެކޭޖްތަކަށް ގެނައި ބަދަލުގެ އިތުރުން، ދިރާގުން ފޯރުކޮށްދޭން ގަސްތުކޮށްފައިވާ އިތުރު ވެލިއު އެޑެޑް ސާވިސްތަކުގެ ސަބަބުން ދިރާގުގެ ބިޒްނަސް ކަސްޓަމަރުންގެ ޑިޖިޓަލް ކޭޕަބެލިޓީސް އާއި ޑިޖިޓަލް ތަޖުރިބާ އިތުރަށް ފުރިހަމަވެގެން ދާނެ އެވެ.