ކެންސަރު ބަލީގައި އެމެރިކާގެ ސުޕްރީމް ކޯޓު ފަނޑިޔާރު ރޫތު ބޭޑާ ގިންސްބާގް 87، އަވަހާރަ ވެއްޖެ އެވެ.
އެކަމަނާ އަވަހާރަވުމާ ގުޅިގެން ސުޕްރީމް ކޯޓުން ނެރުނު ބަޔާނުގައި އެކަމަނާގެ ގެކޮޅުގައި އިއްޔެ އަވަހާރަވެފައިވާ ކަމަށާއި އެވަގުތު އަރިހުގައި އާއިލާގެ މެމްބަރުން ތިއްބެވި ކަމަށް ބުނެފައި ވެއެވެ. ސުޕްރީމްކޯޓުގެ އެ ބަޔާނުގައި ރޫތު ބޭޑާ ސިފަ ކުރައްވާފައި ވަނީ ވަރުބަލިކަމެއް ނެތް އަދި އަޒުމް ވަރުގަދަ އިންސާފުގެ ޗެމްޕިއަންއެއް ގޮތުގަ އެވެ.
ސުޕްރީމް ކޯޓުގެ ފަނޑިޔާރު ކަމަށް ގިންސްބާގް ވަޑައިގެންނެވީ 1993 ގައި ރައީސް ބިލް ކްލިންޓަންގެ ވެރިކަމުގަ އެވެ. އޭނާއަކީ އެ ކޯޓަށް އައްޔަން ކުރި ދެވަނަ އަންހެން ފަނޑިޔާރެވެ.
ގިންސްބާގް ގާނޫނީ ދާއިރާގައި މަސައްކަތް ކުރެއްވި 60 އަހަރު ތެރޭގައި އަންހެނުންނާއި ވޯޓުލުމުގެ ހައްގުތައް ދިފާއު ކުރުމަށް ކުރެއްވި މަސައްކަތްތަކުގެ ސަބަބުން ތަފާތު ސިޔާސީ ފިކުރުގެ މީހުންގެ ތާއީދު ލިބިފައި ވެއެވެ.