ފުލުހުންގެ އެދުމަށް ކްރިމިނަލް ކޯޓުން އަމުރުކޮށް ފްރީޒް ކޮށްފައި ހުރި، ކުރީގެ ރައީސް އަބްދުﷲ ޔާމީން އަބްދުލްގައްޔޫމްގެ، ބޭންކް އެކައުންޓްތައް ދޫކޮށްލަން ސުޕްރީމް ކޯޓުން މިއަދު ހުކުމް ކޮށްފި އެވެ.
ސުޕްރީމް ކޯޓުން ކުރި ހުކުމުގައި ބުނީ ރައީސް ޔާމީން އެކައުންޓްތައް ފްރީޒް ކުރުމަށް ކުރިމިނަލް ކޯޓުން ނެރެފައިވާ އަމުރު ގޯސް ކަމަށެވެ.
ރައީސް ޔާމީންގެ އެކައުންޓްތައް ފްރީޒް ކުރަން ކްރިމިނަލް ކޯޓުން އަމުރެއް ނެރެފައި ވަނިކޮށް މިދިޔަ އަހަރުގެ މާޗް މަހު ހައި ކޯޓުން ވެސް ވަނީ އެ އަމުރު ބާތިލުކޮށް، އެކައުންޓްތައް ދޫކޮށްލާފަ އެވެ. ނަމަވެސް އެ މައްސަލަ ދައުލަތުން ސުޕްރީމް ކޯޓުގައި އިސްތިއުނާފް ކުރީ އެވެ.
އިސްތިއުނާފުގެ މި މައްސަލަ ސުޕްރީމް ކޯޓުގައި ހިންގައި މިއަދު ނިންމި އިރު ހުކުމުގައި ބުނީ މޯލްޑިވްސް އިސްލާމިކް ބޭންކްގައި ރައީސް ޔާމީންގެ އަމިއްލަފުޅު ނަމުގައި ހުޅުވާފައިވާ އަށް އެކައުންޓެއް ފްރީޒް ކުރަން ފުލުހުންގެ ފަރާތުން ހުށަހެޅިއިރު އެ ފައިސާ އާއި އެމްއެމްޕީއާރުސީގެ ހިޔާނާތާ ގުޅުމެއް އޮތް ކަން ފާހަގަކުރެވިފައި ނުވާތީ ކްރިމިނަލް ކޯޓުގެ އަމުރަށް ތާއީދު ނުކުރެވޭ ކަމަށެވެ. އަދި އެ މައްސަލާގައި ހައިކޯޓުން ކޮށްފައިވާ ހުކުމް ދަމަހައްޓާ ކަމަށެވެ.
މިމައްސަލަ ބެއްލެވީ ފަނޑިޔާރު ހުސްނުއްސުއޫދާއި ފަނޑިޔާރު އައިޝާ ޝުޖޫން އާއި ފަނޑިޔާރު ޑރ. އަޒްމިރަލްދާ ޒާހިރެވެ. ރިޔާސަތުގައި އިންނެވި ފަނޑިޔާރު ސުއޫދެވެ.
ތިން ފަނޑިޔާރުންގެ އިއްތިފާގުން މިއަދު ނިންމެވީ އެކައުންޓްތައް ފްރީޒު ކުރުމަށް ކުރިމިނަލް ކޯޓުން ކުރި އަމުރަށް ތާއީދު ކުރެވެން ނެތް ކަމަށާއި އެ އެކައުންޓްތައް ދޫކޮށްލުމަށެވެ. އަދި އެކައުމްޓްތައް ފްރީޒް ކުރީ އެސްކްރޯ އެކައުންޓަށް ޖަމާކުރި އެއްމިލިއަން ޑޮލަރުގެ މުއާމަލާތްތަކާއި ގުޅިގެން ކަމަށް ބުނި ނަމަވެސް ފްރީޒް ކުރި އަށް އެކައުންޓަކީ އެ ފައިސާ އާއި ގުޅޭ އެއްޗެއްކަން ދައުލަތަށް ޝަރީއަތުގައި ސާބިތު ކޮށް ދެވިފައި ނުވާ ކަމަށެވެ. އެހެން ކަމުން އެކައުންޓްތައް ފްރީޒްކުރަން ނެރުނު އަމުރަކީ ގާނޫނާއި ހިލާފު އަމުރެއް ކަމަށް ވެސް ހުކުމުގައި ބުނެފައިވެ އެވެ.
ހުކުމް އިއްވަމުން ފަނޑިޔާރު ސުއޫދު ވިދާޅުވީ ދައުލަތަށް ނެގިދާނެ ކަމަށް ގަބޫލު ކުރެވޭ ފައިސާތަކެއް ހުރި އެކައުންޓެއް ފްރީޒް ކުރަން އެދެވިދާނެ ކަމަށެވެ. އެކަމަކު ތުހުމަތުވާ ފައިސާއަށްވުރެ ގިނަ ފައިސާ ދައުވާ ލިބޭ ފަރާތުގެ އެކައުންޓުގައި ހުރި ނަމަވެސް ފްރީޒް ކުރުމަށް އެދެވޭނީ ހަމައެކަނި ތުހުމަތުވާ ފައިސާއަށް ކަމަށެވެ. އަދި ހުރިހާ ފައިސާއަކާމެދު ތުހުމަތު ވާނަމަ އެކަން ކޯޓަށް ލިޔުމުން ހުށަހަޅަން ޖެހޭއިރު ރައީސް ޔާމީންގެ މުޅި މިލްކިއްޔާތު ފްރީޒް ކުރަން އެދިފައި ވަނީ ގާނުނާ ހިލާފަށް ކަމަށެވެ.
ރައީސް ޔާމީންގެ އަމިއްލަ އެކައުންޓަކުން އެ މަނިކުފާނާއި އޭސީސީ އާއި ދެމެދު ހަދާފައިވާ އެސްކްރޯ އެކައުންޓަށް އެއް މިލިއަން ޑޮލަރު ޖަމާ ކުރުމުން އެ ފައިސާ އާމެދު ޝައްކެއްވާ ކަމަށް ދައުލަތުން މީގެ ކުރިން ކުރިމިނަލް ކޯޓުގައި ވެސް އަދި ހައިކޯޓުގައި ވެސް ފާހަގަ ކޮށްފައި ނުވާ ކަމަށް ސުޕްރީމް ކޯޓުގެ ހުކުމުގައި ބުނެފައި ވެއެވެ.
މީގެ ކުރިން ބޭއްވި ޝަރީއަތުގެ މަޖިލީހުގައި ރައީސް ޔާމިން ވިދާޅުވީ އެ މަނިކުފާނެ އެކައުންޓުގައި 100 މިލިއަން ރުފިޔާ ހުރުމަކީ އެކަމާ ފުލުހުން ކަންބޮޑުވާން ޖެހޭ ވަރުގެ ކަމެއް ނޫން ކަމަށާއި ތަހުގީގު ކުރަމުން ދަނީ އެއް މިލިއަން ޑޮލަރުގެ މައްސަލާގައި ކަމަށެވެ. އަދި ތަހްގީގީ މަރުހަލާގައި ވެސް އިތުރު ފައިސާ އަކާއި ގުޅޭ ގޮތުން އެމަނިކުފާނާއި ފުލުހުން ސުވާލު ކޮށްފައި ނުވާ ކަމަށާއި އާމްދަނީ ލިބެނީ އެމަނިކުފާނަށް ލިބޭ މުސާރައިން އެކަނި ކަމަށް ފުލުހުން ދެކެގެން ވެސް ނުވާނެ ކަމަށެވެ.
ރައީސް ޔާމީންގެ އެކައުންޓްތައް ފްރީޒުކުރި އަމުރު ހައިކޯޓުން ބާތިލު ކުރީ އެ އަމުރަކީ ޖިނާއީ އިޖުރާއަތުގެ ގާނޫނުގެ 72 ވަނަ މާއްދާ 73 ވަނަ މާއްދާގައި ބުނާ އިޖުރާއަތްތަކާ ހިލާފަށް ނެރެފައިވާ އަމުރެއް ކަމަށް ކަނޑައެޅުމަށް ފަހު އެވެ. އެ ދެ މާއްދާއަކީ މީހެއްގެ އެކައުންޓް ފްރީޒު ކުރަން އަމުރު ނެރުމުގެ އިޖުރާއަތްތައް ބަޔާންކުރާ ދެ މާއްދާ އެވެ. ސުޕްރީމް ކޯޓުން މިއަދު ނިންމެވީ ހައިކޯޓުގެ ހުކުމް ދަމަހައްޓާށެވެ.