ކޮންޑެ ނާސްޓް ޓްރެވަލާސް މަޖައްލާގެ ކިޔުންތެރިން ހޮވި މި ސަރަހައްދުގެ އެންމެ ފުރިހަމަ 30 ރިސޯޓުގެ ތެރޭގައި، ތާޖު އެގްޒޯޓިކާ ރިސޯޓްސް އެންޑް ސްޕާ ހިމެނިއްޖެ އެވެ.
އިންޑިއާގެ އެންމެ ބޮޑު އެއް ކުންފުނި ކަމަށްވާ ތާޖު ކުންފުނިން ރާއްޖޭގައި ހިންގާ ތާޖު އެގްޒޯޓިކާ ރިސޯޓު ހިމެނިފައި ވަނީ "ކޮންޑެ ނާސްޓް ޓްރެވަލާ 2020 ރީޑާސް ޗޮއިިސް އެވޯޑްސް" ގެ ޓޮޕް 30 އިންޑިއަން އޯޝަން ރިސޯޓުގެ ތެރޭގައި އެވެ.
ތާޖު އެގްޒޯޓިކާ ރިސޯޓް އެންޑް ސްޕާ މޯލްޑިވްސްގެ ޖެނެރަލް މެނޭޖަރު ސަމްރާތު ދައްތާ ވިދާޅުވި އެ ރިސޯޓަށް ވޯޓް ދިން ހުރިހާ ފަރާތްތަކަށް ޝުކުރު އަދާކުރާ ކަމަށެވެ. އަދި ގޮންޖެހުން ބޮޑު މި އަހަރު މި ލިސްޓުގައި ހިމެނުމަކީ ކާމިޔާބީއެއްގެ ގޮތުގައި ވެސް އޭނާ ސިފަކުރެއްވި އެވެ.
ކ. އެނބޫދޫ ފިނޮޅުގައި ހިންގާ ތާޖު ރިސޯޓުގައި 64 މޫދު ވިލާ ހުރެ އެވެ. މީގެ އިތުރުން މި ރިސޯޓުގެ ހިތްގައިމު މޫދުގައި 62 ބީޗް ވިލާވެސް ހަދާފައިވެ އެވެ.
ކޮންޑެނާސްޓް ޓްރެވަލާ މެގަޒިންއަކީ އަހަރަކު އަށް ފަހަރު ނެރޭ މަޖައްލާ އެކެވެ. މި މަޖައްލާ ނެރެން ފަށާފައިވަނީ 1987 ވަނަ އަހަރުން ފެށިގެންނެވެ. މި މަޖައްލާގެ އެތައް އެވޯޑެއް ކޮންމެ އަހަރަކު ވެސް ރާއްޖެއަށް ލިބެ އެވެ.