މަޖިލީހުގެ އަންހެން މެމްބަރުންނަށް ދަރިން ގޮވައިގެން އެކަހެރި ވެވޭނެ "މައިންގެ ކޮޓަރި" އެއް ހުޅުވުމުން ރައްޔިތުންގެ މަޖިލީހުގެ ފުރަތަމަ އަންހެން ނައިބު ރައީސް އަނީސާ އަހުމަދު އެކަމަށް ތައުރީފު ކުރައްވައިފި އެވެ.
ރައްޔިތުންގެ ހާއްސަ މަޖިލީހުގެ މެމްބަރު ކަމާއި މުލަކު އަތޮޅުގެ މެމްބަރުންކަން ވެސް ކުރައްވާފައިވާ އަނީސާ ވިދާޅުވީ މަޖިލީހުގެ އާއިމާރާތުގައި އަންހެން މެންބަރުންނަށް ތުއްތު ދަރިން ގޮވައިގެން އެކަހެރިވެވޭ ކަހަލަ ލައުންޖެއް ހުންނަން ޖެހޭނެ ކަމަށް ވަކާލާތު ކުރެއްވި ހަމަ އެކަނި މެންބަރަކީ އޭނާ ކަމަށެވެ. އަދި މަޖިލީހުގައި މައިންގެ ކޮޓަރިއެއް ހުޅުވުމުން އެކަމާ ވަރަށް ހިތަހަމަ ޖެހިވަޑައިގަންނަވާ ކަމަށެވެ.
ރައްޔިތުންގެ މަޖިލީހުގައި މިހާރު ހުޅުވައި ބޭނުން ކުރަން ފަށާފައިވާ މައިންގެ ކޮޓަރިއަކީ މަޖިލީހުގެ އަންހެން މެމްބަރުންގެ ތުއްޕުޅު ބޭފުޅުން ބެލޭނެ އެހެން އިންތިޒާމެއް ނެތް ނަމަ އެތަނަށް ގެނެސްގެން ބެލޭނެ ގޮތް ހެދުމަށް ގާއިމްކުރި ކޮޓަރިއެކެވެ.
މަޖިލީހުގެ ރައީސް މުހައްމަދު ނަޝީދު އިއްޔެ ވިދާޅުވީ އެ ކޮޓަރިއަކީ އެކަނި މައިންގެ ކޮޓަރިއެއް ނޫން ކަމަށާއި އެއީ ދަރިންގެ ވެސް ކޮޓަރިއެއް ކަމަށެވެ. އަދި އެ ކޮޓަރީގައި ކުދިންނަށް ކުޅެވޭނެ އިންތިޒާމެއް ވެސް ހަމަަޖައްސާފައި ހުންނާނެ ކަމަށެވެ.
މަޖިލިސް އިމާރާތުގައި މައިންނަށް ހާއްސަކޮށް ކޮޓަރިއަށް ހަދާފައިވާއިރު އެ މަޖިލީހުގައި ތިބެނީ ހަތަރު އަންހެން މެމްބަރުންނެވެ. އެހެން ނަމަވެސް މަޖިލީހުގެ އިދާރާގައި ގިނަ އަދަދަކަށް އަންހެން މުވައްޒަފުން އުޅެ އެވެ.