އިންޑީޔާގެ ދެކުނުގެ ސްޓޭޓެއް ކަމަށްވާ އަންދްރަ ޕްރަދޭޝްގައި ގޮތް ނޭނގޭ ބައްޔެއް ފެތުރެން ފަށައިފި ކަމަށް ބީބީސީގައިވާ ރިޕޯޓެއް ބުނެފި އެވެ. މި ރިޕޯޓު ބުނާ ގޮތުގައި މި ބަލި ޖެހިގެން މިހާތަނަށް އެކަކު މަރުވެ 227 މީހުން ހޮސްޕިޓަލުގައި އެޑްމިޓްކޮށް ފަރުވާ ދެމުން އެބަގެންދެ އެވެ.
މި ބަލި ޖެހޭ މީހުންނަށް ފެންނަ ބަލީގެ އަލާމާތްތައް ތަފާތު ނަމަވެސް އެންމެ އާއްމުކަމަކަށް ދިމާވަނީ މޭ ނުބައިކުރުމާއި ފިޓް ޖެހުން އަދި ހޭނެތިގެން ވެއްޓުން ކަމަށް އެ މީހުންނަށް ފަރުވާ ކުރާ ޑޮކްޓަރުން ބުނެފައި ވެއެވެ. މިހާރު މިބަލީގެ ބާވަތް ދެނެގަތުމަށް ކަމާބެހޭ އޮފިޝަލުން ތަހުގީގު ފަށާފައިވާއިރު އެލޫރޫ ކިޔާ ޓައުނެއްގައި އެއްކޮށް ކަހަލަ ގޮތަކަށް މި ބަލި ވަނީ ފެތުރި އާންމުވެފަ އެވެ.
މި ބަލިމަޑުކަން ފެތުރެން ފަށާފައި މިވަނީ ކޮވިޑް-19 އިގެ ބަލިމަޑުކަމާ އިންޑިޔާ ވަރަށް ވަރުގަދަޔަށް ހަނގުރާމަ ކުރަމުން ދަނިކޮށެވެ. އިންޑިޔާއަކީ މިހާރު ދެވަނައަށް ކޮވިޑް ޖެހިފައިވާ މީހުން އެންމެ ގިނައިން ތިބި ގައުމެވެ. ޚާއްސަކޮށް މި ގޮތްނޭނގޭ ބަލި ފެތުރިގެން އުޅޭ އަންދްރާ ޕްރަދޭޝް ސްޓޭޓަކީ ކޮވިޑްގެ ކޭސްތައް ވެސް އެންމެ ގިނަ އެއް ހިސާބެވެ. އެ ސްޓޭޓުގެ 800،000 މީހުންނަށް މިހާތަނަށް ކޮވިޑް ޖެހިފައި ވެއެވެ. މިއީ އިންޑިޔާގައި ތިން ވަނަ އަށް ކޮވިޑް މީހުން އެންމެ ގިނަ ސްޓޭޓެވެ.
ނަމަވެސް ހަފުތާ ބަންދުގައި ކުއްލިއަކަށް ގިނަވެގަނެގެން އުޅޭ މި ބަލީގައި ހޮސްޕިޓަލުގައި އެޑްމިޓްކުރަން ޖެހުނު އެތައް ސަތޭކަ ބަޔަކާ ކޮވިޑާ އެއްވެސް ގުޅުމެއް ނެތެވެ. އެ ސްޓޭޓްގެ ހެލްތު މިނިސްޓަރު އަލާ ކަލީ ކްރިޝްނާ ސްރީނިވާސް ވިދާޅުވީ ގޮތް ނޭނގޭ ބަލި ޖެހިގެން އެޑްމިޓްކުރި ހުރިހާ އެންމެން ވެސް ކޮވިޑަށް ނެގެޓިވް ކަމަށެވެ.
"މި ބަލި ޖެހޭ މީހުން ހާއްސަކޮށް ކުޑަކުދިންނަށް އެންމެ ފުރަތަމަ ދިމާވާ ކަމަކީ ދެ ލޯ ކަރާ ކަހަލަ ގޮތްތަކެއް ވެފައި ހޮޑުލެވެން ފަށަނީ. އޭގެ ތެރެއިން ބައެއް މީހުން ވެއްޓި ފިޓް ޖެހި އަނގައިން ފޮނުއަރާގޮތް ވެސް ވޭ،" އެލޫރޫ ގަވަންމަންޓް ހޮސްޕިޓަލުގެ މެޑިކަލް އޮފިސަރު ދަ އިންޑިއަން އެކްސްޕްރެސް ނޫހަށް ދީފައިވާ އިންޓަވިއު އެއްގައި ބުނެފައި ވެއެވެ.
މިހާތަނަށް ބަލި ޖެހިގެން އެޑްމިޓް ކުރި މީހުންގެ ތެރެއިން 70 މީހަކު ހޮސްޕިޓަލުން ދޫކޮށްލާފައިވާ ކަމަށާއި 157 މީހަކަށް އަދިވެސް ހޮސްޕިޓަލުގައި ފަރުވާ ދެމުންދާ ކަމަށް ޑޮކްޓަރު ބުންޏެވެ.
އެ ސްޓޭޓްގެ ޗީފް މިނިސްޓަރު ވިދާޅުވީ މެޑިކަލް ޓީމުތައް މިހާރު އެލޫރޫއަށް ގޮސް މި ބަލީގެ އަސްލު ދެނެގަންނަން މަސައްކަތް ކުރަމުންދާ ކަމަށެވެ.
ސްރީނިވާސް ވިދާޅުވީ ގޮތުގައި ބަލި މީހުންގެ ލޭގެ ސާމްޕަލް ތަކަކުން ވައިރަލް އިންފެކްޝަނެއް ހުރި ކަމަކަށް ނުދައްކަ އެވެ.
"ބޯން ބޭނުންކުރާ ފެން ތަޣައްޔަރު ވެގެން ދިމާވި ކަމެއް ނޫން މީކީ. އެކަން އަހަރެމެން ޔަގީން ކޮށްދެން. އަދި ވައި ނުސާފު ވެގެން ވީކަމެއް ވެސް ނޫން. މިއީ ގޮތް ނޭނގޭ ބައްޔެއް. ލެބޯޓްރީ އެނަލިސިސް ހަދައިގެން މި ބަލީގެ އަސްލު ދެނެގަނެވޭނީ،" ސްރީނިވާސް ވިދާޅުވި އެވެ.