"ޔޭ ރިޝްތާ ކިޔާ ކެހެލާތާ ހޭ" ގައި މުހިއްމު ރޯލެއް ކުޅުނު ބަތަލާ ދިވްޔާ ބަޓްނާގަރް ކޮވިޑް-19 ޖެހިގެން މަރުވެއްޖެ އެވެ. އުމުރުން 34 އަހަރުގެ ދިވްޔާ މަރުވީ ވެންޓިލޭޓާ ސަޕޯޓުގައި ވެސް އޮންނަތާ އެތައް ހަފުތާއެއް ފަހުންނެވެ.
ޓީވީގައި މަސައްކަތްކުރާ ދިވްޔާގެ ބައެއް އެކުވެރިން ކަމަށްވާ ދެވޮލީނާ ބަޓާޗާޖީ އާއި ޝިލްޕާ ޝިރޯދްކަރް ވަނީ އެމީހުންގެ އެކުވެރިޔާގެ މަރުގެ ހިތާމަ ފާޅުކޮށް ސޯޝަލް މީޑިއާގައި ޕޯސްޓުތައް ޖަހާފަ އެވެ. ދެވޮލީނާގެ މެސެޖުގައި ދިވްޔާ އަކި އޭނާގެ އެންމެ ގާތް އެއް އެކުވެރިޔާ ކަމަށާއި އެއްވެސް މީހަކު ނެތަސް އޭނާއާ އެކުގައި އަބަދުވެސް ދިވްޔާ ހުރި ކަމަށް ބުނެފައި ވެއެވެ.
ޝިލްޕާ އާއެކު ދިވްޔާ ވަނީ "ސިލްސިލާ ޕިޔާރް ކާ"ގައި މަސައްކަތް ކޮށްފަ އެވެ. ޝިލްޕާގެ މެސެޖުގައި ދިވްޔާގެ ކުއްލި މަރުން ހިތް ހަލާކުވެފައިވާ ކަމަށް ބުނެފައި ވެއެވެ.
ގަގަން ކިޔާ މީހަކާ ދިވްޔާ ކައިވެނި ކޮށްފައި ވަނީ ދާދި ފަހުންނެވެ. މި ކައިވެނި ދިވްޔާ ކުރީ އޭނާގެ މަންމަ އާއި އާއިލާގެ މީހުންގެ ނުގަބޫލުގަ އެވެ. ކައިވެންޏަށްފަހު ގަގަން ދިވްޔާ އަށް ވަރަށް އަނިޔާކުރާ ކަމަށް އޭނާގެ އެކުވެރި ޓީވީ އެކްޓަރުން މިހާރު ދަނީ އެކި އޮންލައިން ނޫސްތަކަށް މައުލޫމާތު ދެމުންނެވެ.
ދިވްޔާ ބަލިވީ ގަގަން އާއި ދިވްޔާ މައްސަލަޖެހި ގަގަން ގެއިން ނުކުމެގެން ދިޔުމުން ގޭގައި އެކަނި މާއެކަނި އުޅެނިކޮށެވެ. އޭނާ ބަލިކަން އެނގުމުން ދިއްލީގައި ދިރިއުޅޭ ދިވްޔާގެ މަންމަ އާއި ކޮއްކޮއަށް އޭނާ ބަލިކަން އެނގިގެން މުމްބައި އަށް އައިސް ދިވްޔާ ހޮސްޕިޓަލަށް ގެންދިޔައިރުވެސް ވަރަށް ހާލުބޮޑު ކަމަށް އެމީހުން ބުނެފައި ވެއެވެ. ދިވްޔާ މަރުވިއިރު މަސައްކަތްކުރަމުން ދިޔައީ "ތެރަ ޔާރް ހޫނ މައި" ކިޔާ ކޮމެޑީ ޝޯއެއްގަ އެވެ.
"ޔޭ ރިޝްތާ ކިޔާ ކެހެލާތާ ހޭ"ގެ އިތުރުން "އުޅާން"، "ސަންސްކާރް"، "ޖީތް ގައީ ތޯ ޕިޔާ މޯރޭ"، "ވިޝް"، އަދި ސާނވަރޭ ސަބްކޯ ޕްރީތޯ" ގައި ދިވްޔާ މުހިއްމު ރޯލުތަކެއް ވަނީ ކުޅެފަ އެވެ.