ސްލޮވޭނިއާ (ރޮއިޓާސް) - ޔޫރަޕަށް ކުރިމަތިވެފައިވާ ރެފިއިޖީން ތޮއްޖެހުމުގެ މައްސަލަ ކޮންޓްރޯލުން ނެއްޓެމުން ދާއިރު، އަވަސް ހައްލެއް ނުހޯދިއްޖެ ނަމަ ޔޫރަޕިއަން ޔޫނިއަން ރޫޅިދާނެ ކަމަށް ސްލޮވޭނިއާއިން ބުނެފިއެވެ.
ޔޫރަޕްގެ ގައުމުތަކުން ރެފިއުޖީންގެ މައްސަލައިގާ އެއް ގައުމު އަނެއް ގައުމަށް ތުހުމަތުގެ އިނގިލިދިއްކޮށް ޒިންމާއިން ރެކެމުން ދާތީ، މެންބަރު ގައުމުތައް އެއްބަސްވާ އުސޫލުތަކެއް ކަނޑައެޅުމުގައި އަދިވެސް ވަނީ ނާކާމިޔާބު ވެފައެވެ. އަވަށްޓެރިންނާ އަޅާބަލާއިރު ކުޑަ ގައުމެއް ކަމަށްވާ ސްލޮވޭނިއާއިން ކަންބޮޑުވީ ހަންގޭރީން އެގައުމުގެ ދެކުނު ބޯޑަރު ބަންދުކުރުމުން ސްލޮވޭނިއާއަށް ރެފިއުޖީން ތޮއްޖެހެން ފެށުމުންނެވެ.
"މިއަދު މި މައްސަލައަށް ހައްލެއް ނުހޯދައިފިނަމަ، ކުރެވެން ހުރި ހުރިހާ ކަމެއް މިއަދު ނުކޮށްފިނަމަ، ދެން ފެންނާނީ އީޔޫގެ ނިމުން." ބޮޑުވަޒީރު ވިދާޅުވިއެވެ.
މީގެ ދިހަ ދުވަސް ކުރިން ހަންގޭރީން ބޯޑަރު ފެންސު ބިނާކޮށް ނިމުނު ފަހުން ސްލޮވޭނިއާއަށް 62000 ރެފިއުޖީން އައިސްފައި ވެއެވެ. އައްޔެ އެކަނިވެސް އެގައުމު ހުރަސްކުރި ރެފިއުޖީންގެ އަދަދު 14000 އަށްވުރެ ގިނައެވެ.
ހަނގުރާމަ އާއި އަނިޔާވެރި ސަރުކާރު ތަކުގެ އަނިޔާއިން ސަލާމަތްވެ އާ ދިރިއުޅުމެއް ހޯދުމަށް ޖަރުމަނަށާއި ޔޫރަޕުގެ އުތުރަށް ދަތުރު ފަށާ މެދުއިރުމަތީ މީހުން ދަނީ އެއްދުވަހުން އަނެއް ދުވަހަށް އިތުރު ވަމުންނެވެ. ކަނޑުމަގުން އެކަނި ވެސް 7 ލައްކައެއްހާ ރެފިއުޖީން މި އަހަރު މެދުއިރުމައްޗާއި އެފްރިކާއި އޭޝިޔާއިން ޔޫރަޕަށް އެތެރެވެފައި ވެއެވެ. ރެފިއުޖީންގެ ދަތުރުތަކުގައި އެތައް ބަޔަކު ވަނީ މަރުވެފައެވެ. 63 ރެފިއުޖީންނާއި އެކު ދަތުރުކުރި ވައިޖަހާ ޑިންގީއެއް ގްރީސް ކައިރިއަށް ބަންޑުން ޖަހާލައި އިއްޔެވެސް ވަނީ އަންހެނަކާއި ދެކުދިން މަރުވެ ހަތް މީހުން ގެއްލިފައެވެ.
ރެފިޖީންތަކެއް ޔޫރަޕް ގައުމެއްގެ ބޯޑަރު ހުރަސް ކުރަނީ: ޔޫރަޕަށް ތޮއްޖެހެމުންދާ ރެފިއުޖީންގެ މައްސަލަ ވަނީ ބޮޑުވެފައި --