ސީރިއާގެ ޚާރިޖީ ވަޒީރު އަސްއަދު ހަސަން ޝިބާނީ، ރަސްމީ ދަތުރެއްގައި ސައޫދީ އަރަބިއްޔާއަށް ވަޑައިގެންފި އެވެ. މިއީ ސައޫދީ އަރަބިއްޔާގެ ޚާރިޖީ ވަޒީރު ފައިސަލް ބިން ފަރުހާންގެ ޚާއްސަ ދައުވަތަކަށް އޭނާ ކުރައްވާ ދަތުރެކެވެ.
ޝިބާނީ އަކީ ސީރިއާގައި އޮތް ބައްޝާރުލް އަސަދުގެ ވެރިކަން ވައްޓާލުމަށް ފަހު، އެ ގައުމުގައި އެކުލަވާލި ވަގުތީ ސަރުކާރުގެ ކެބިނެޓް ވަޒީރެކެވެ. ސީރިއާގައި ސަރުކާރެއް އެކުލަވުމަށް އިންގިތާލީ ބޮޑުވަޒީރެއް ވެސް ވަނީ ހަމަޖައްސާފަ އެވެ.
ސީރިއާގެ ޚާރިޖީ ވަޒީރާ އެކު، އެ ގައުމުގެ ދިފާއީ ވަޒީރު، މުރުހަފް އަބޫ ގަސްރާ އަދި އިންޓެލިޖެންސްގެ ވެރިޔާ އަނަސް ޚައްތާބު ވެސް ރިޔާޒަށް ވަޑައިގެންނެވި އެވެ.
ސީރިއާގެ ވަފުދަށް އެއާޕޯޓުން މަރުހަބާ ދެންނެވީ ފައިސަލް ބިން ފަރުހާންގެ ފަރާތުން، ވަޒީރުގެ ނައިބު، ވާލިދު އަލްޚުރައިޖީ އެވެ.
ސީރިއާގެ ލީޑަރަކީ ހައިއަތު ތަހުރީރުއްޝާމް (އެޗްޓީއެސް)ގެ ލީޑަރު އަހްމަދު ހުސައިން އައްޝަރާއު ނުވަތަ އަބޫ މުހައްމަދު އަލް ޖޫލާނީ އެވެ. އޭނާގެ ފަރާތުން ބޮޑުވަޒީރުގެ މަގާމާ އައްޔަންކުރައްވާފައި ވަނީ މުހައްމަދު އަލް ބަޝީޜު އެވެ. މިއީ ވަރަށް އަރިސް ދެ ބޭފުޅުން ކަމަށް ރިޕޯޓްތައް ބުނެ އެވެ.
ސީރިއާގައި އާންމު އިންތިޚާބެއް ބޭއްވުމަށް ދެ އަހަރެއްހާ ދުވަސް ނަގާނެ ކަމަށް އަހުމަދު އައްޝަރާއު ވިދާޅުވި އެވެ. އެހާ ތަނަށް އޮތް ވަގުތުގައި ސަރުކާރަށް އޮތް ޒިންމާ އަކީ ގަލްފު ގައުމުތަކާ އެކު ގުޅުން ބަދަހިކުރުމާއި ދުނިޔޭގެ ރުހުން ހޯދުމެވެ.
ސީރިއާގައި އިންސާނީ ހައްގުތައް ކަށަވަރުކުރުމާއި ތައުލީމު އަދި ސިއްހީ ފަރުވާދެވޭނެ ނިޒާމުތައް، ތުރުކީ އާއި ސައުދީ، ގަތަރު އަދި ޔުނައިޓެޑް އަރަބް އެމިރޭޓސްގެ އެހީތެރިކަމާ އެކު އެކުލަވާލައްވާނެ ކަމަށް ޝަރާއު ވިދާޅުވި އެވެ.