ހުޅަނގު އައްސޭރީގައި އަލްޖަޒީރާ ޚަބަރު ނެޓްވޯކް ހިންގުން ފަލަސްތީން އޮތޯރިޓީ (ޕީއޭ) އިން ވަގުތީ ގޮތުން މަނާކޮށްފި އެވެ.
އަލްޖަޒީރާ މަނާކުރަން ޖެހުނީ ޚަބަރު ގެނެސްދިނުމުގައި ހަމަނުޖެހުން އުފެދޭ ގޮތަށް ކޮންޓެއްޓްތައް ބައްޓަކުރާތީ ކަމަށް ފަލަސްތީން އޮތޯރިޓީން ބުންޏެވެ. ފިތުނަ ފަސާދައަށް މަގުފަހިވާ ގޮތަށް ކޮންޓެންޓްތައް ތައްޔާރުނުކުރުމަށް މީގެ ކުރިންވެސް އަލްޖަޒީއަށް ޚަބަރަށް އަންގާފައި ވާނެ ކަމަށް ވެސް ޕީއޭއިން ބުންޏެވެ.
ޣައްޒާ ހަނގުރާމައާ ގުޅުންހުރި ޚަބަރުތައް ގެނެސް ދިނުމުގައި އަލްޖަޒީރާގެ ސިޔާސަތަކީ މީހުންގެ ލޭކެއްކުވުން ކަމަށްވެސް ޕީއޭއިން ބުންޏެވެ. މިއީ ހަމަނުޖެހުން އިތުރުވެ، ދުޝްމަނުންގެ ހަމަލާތައް އިތުރުވާ ސަބަބެއް ކަމަށްވެސް ޕީއޭގެ ބަޔާނުގައި ވެއެވެ.
ފަލަސްތީންގެ އެތެރޭގެ ހާލަތު ގެނެސްދިނުމުގައި ވެސް އަލްޖަޒީރާ އަދުލުވެރި ނޫން ކަމަށް ޕީއޭއިން ބުންޏެވެ. އަލްޖަޒީރާ ފެންނަނީ ވަކި ބަޔަކަށް ވާގިވެރިވާ ބާރެއް ގޮތުގައި ކަމަަށްވެސް ޕީއޭގެ ބަޔާނުގައި ވަނީ ބުނެފަ އެވެ.
މިދިޔަ ޑިސެމްބަރު މަހު އަލްޖަޒީރާއިން ގެނެސްދިން ޚަބަރެއްގައި ބުނެފައިވާ ގޮތުން ފަލަސްތީން އޮތޯރިޓީއަށް ބާރު އޮންނަ ސިފައިންގެ ފައުޖަކުން، ޖެނިން ބްރިގޭޑްސްގެ ނަމުގައި ހަރަކާތްތެރިވާ ހަނގުރާމަވެރިންގެ ޖަމާއަތަކާ ދެކޮޅަށް އޮޕަރޭޝަނެއް ހިންގި އެވެ.
އަލްޖަޒީރާއިން މި ޚަބަރު ގެނެސްދިނީ ގިނަ ބަޔަކަށް އޮޅޭ ގޮތަށް އަދި ޕީއޭގެ ސިފައިން ކުރީ ކޮށްގެން ވާނެ ކަމެއް ނޫން ކަމަށް ދޭހަވާ ގޮތަށެވެ.
ހުޅަނގު އައްސޭރީގައި އަލްޖަޒީރާ ހިންގުން މަނާކުރުމާ ގުޅިގެން، ގަތަރުގައި ހުންން އަލްޖަޒީރާގެ އިދާރާއިން ވަނީ ނުރުހުން ފާޅުކޮށްފަ އެވެ. އަދި މިއީ އިޒުރޭލަށް ބާރުދޭ ބަޔަކު ކުރި ކަމެއްގެ ގޮތުގައި ވަނީ ފާހަގަކޮށްފަ އެވެ.
ފަލަސްތީން އޮތޯރިޓީން އަލްޖަޒީރާ މަނާކުރީ ވަގުތީ ގޮތުން ނަމަވެސް، ވަކި މުއްދަތެއް ހާމައެއް ނުކުރެ އެވެ. އަލްޖަޒީރާއިން ޚަބަރުތައް ޕީއޭ ގަބޫކުރާ ފެންވަރަކަށް ބަދަލުކުރުމުން މި ބަންދުން ނެއްޓިދާނެ ކަމަށް ބެލެވެ އެވެ.
އަލްޖަޒީރާ ބަންދުކޮށްފައި ވަނީ ފަލަސްތީން އޮތޯރިޓީގެ ބާޜު އޮންނަ ސަރަހައްދުގައި ކަމަށް ވުމުން، ހަމާސްގެ ބާރުގެ ދަށުގައި އޮންނަ ޣައްޒާ ފަދަ ސަރަހައްދުތަކުގައި އަލްޖަޒީރާ އަދިވެސް ހިންގާނެ އެވެ.