މައިކްރޮސޮފްޓް ވިންޑޯޒް 10 އަށް ހިލޭ ސަޕޯޓް ދިނުން އޮކްޓޯބަރު 14، 2025 ގައި ހުއްޓާލާނެ އެވެ. މިއާ އެކު ވިންޑޯޒް 8.1 އަދި ވިންޑޯޒް ސެވަންއަށް ވެސް ސަޕޯޓް ދިނުން މައިކްރޮސޮފްޓުން މުޅިން ހުއްޓާލާނެ އެވެ.
އެހާ ހިސާބަށް ދާންދެން މި އޮތް ވަގުތުގައި ވިންޑޯޒް 10 ހުރިހާ މާނައެއްގައި ބޭނުންކުރެވޭނެ އެވެ. ޑެސްކްޓޮޕް ކޮމްޕިއުޓަރުގައި، ލެޕްޓޮމް އަދި ޓެބްލެޓްގައި، އެއްވެސް މައްސަލައެއް ނެތި ބޭނުންކުރެވޭނެ އެވެ.
ވިންޑޯޒް 10 އަށް ހިލޭ ސަޕޯޓް ހުއްޓާލުމާ އެކު، ވިންޑޯޒް 10 ބޭނުންކުރަން ޖެހޭ މައިކްރޮސޮފްޓް ސާވިސްތަކުގައި މައްސަލަޖެހުމަކީ އެކަށީގެންވާ ކަމެއް ކަމަށް މައިކްރޮސޮފްޓުން އޮތީ ބުނެފަ އެވެ.
މި ގޮތުން އޮކްޓޯބަރު 14، 2025 އަށް ފަހު ވިންޑޯޒް 10 ގައި މައިކްރޮސޮފްޓް 365 އެޕްލިކޭޝަންތައް ބޭނުމެއް ނުކުރެވޭނެ އެވެ. ސެކިޔުރިޓީ އަޕްޑޭޓް އަދި ހެކަރުން ރައްކާތެރިވުމަށް އެއްވެސް ފަރުވާއެއް ނުލިބޭނެ އެވެ.
ވިންޑޯޒް 10 އަށް ސެކިޔުރިޓީ ސަޕޯޓް ނުލިބިއްޖެ ނަމަ، ވިންޑޯޒް 10ގެ ރައްކާތެރިކަން ކަށަވަރެއް ނުކުރެވޭނެ އެވެ. އަދި މިކަމުގެ ސަބަބުން ވިންޑޯޒް 10 ބޭނުންކުރާ މީހުންނަށް ލިބޭ ގެއްލުމަކަށް މައިކްރޮސޮފްޓް ޒިންމާއެއް ނުވާނެ އެވެ.
ރިޕޯޓްތައް ބުނާ ގޮތުން އެއް ބިލިއަނަށް ވުރެ ގިނަ މީހުން ވިންޑޯޒް 10 ބޭނުންކުރެ އެވެ. މީގެ ތެރޭގައި ހިލޭ ބޭނުންކުރާ މީހުން ގިނަ އަދަދަކަށް ހިމެނެ އެވެ.
މައިކްރޮސޮފްޓުން ވިންޑޯޒް 10 އަށް ސަޕޯޓް ހުއްޓާލަނީ ވިންޑޯޒް 11 އަށް ބަދަލުކުރުވުމަށެވެ. ވިންޑޯޒް 10 ގައި ހުރި ފަސޭހަކަމާ ހެދި، ވިންޑޯޒް 11 އަށް ބަދަލުވާން ގިނަ ބަޔަކު ބޭނުމެއް ނުވެ އެވެ.
ވިންޑޯޒް 10 ބޭނުންކުރާ ގިނަ މީހުންގެ މިހާރުގެ ހާލަތަށް ބަލާއިރު، ވިންޑޯޒް 10 ބޭނުންކުރާ ގިނަ ކޮމްޕިއުޓަރުތަކުގައި ވިންޑޯޒް 11 ނުހިނގާނެ އެވެ. ވިންޑޯޒް 11 އަށް ބަދަލުވާން އެދޭ ނަމަ ފުރަތަމަ ކުރަން ޖެހޭ ކަމަކަށް ވާނީ މުޅިން އާ އަދި ވިންޑޯޒް 11 ހިންގޭ ވަރުގެ ކޮމްޕިއުޓަރެއް ގަތުމެވެ.