ކޮވިޑް-19 އަށް ވެކްސިން ޖަހަން ސޯޝަލް ސެންޓަރަށް ދާ މީހުންގެ ކިއު ދިގުވެ، މިއަދު ވެކްސިން ޖަހަން އެ ސެންޓަރަށް ދާން ތިބި މީހުން މާދަމާ ވެކްސިން ޖަހަން ދާން އިލްތިމާސެއް ކޮށްފި އެވެ.
އެޗްޕީއޭއިން ބުނީ ސޯޝަލް ސެންޓަރުގެ ކިއު ދިގުވުމުން މާބޮޑަށް މީހުން ތޮއްޖެހެމުންދާ ކަމަށެވެ.
"ރައްކާތެރިކަމުގެ ފިޔަވަޅެއްގެ ގޮތުން މިއަދު ސޯޝަލް ސެންޓަރަށް ވެކްސިން ޖަހަން އަންނަ މީހުންނަށް ހުޅުވިފައި ހުންނާނީ 14:30 ވަންދެން." އެޗްޕީއޭގެ ޓުވީޓެއްގައި ވެއެވެ.
އިންޑިއާ ސަރުކާރުން ހަދިޔާކުރި އެ ގައުމުގެ ސިރަމް އިންސްޓްޓިއުޓްގައި ތައްޔާރުކުރި އޮކްސްފޯޑްގެ "ކޮވިޑް ޝީލްޑް" ވެކްސިން ޖަހަން ރާއްޖޭގައި ފެށީ މިދިޔަ ހޯމަ ދުވަހުއެވެ. އެ ވެކްސިންގެ 100،000 ޑޯޒް އިންޑިއާއިން ރާއްޖެއަށް ހަދިޔާ ކޮށްފައިވެ އެވެ.
މާލެ ސިޓީގެ ހޮސްޕިޓަލްތަކުގައި ވެކްސިން ދޭން ފަށާފައިވާއިރު ވިލިމާލޭގެ ޒުވާނުންގެ މަރުކަޒާއި ހުޅުމާލޭގައި ހުންނަ ކުރީގެ ފްލޫ ކްލިނިކްތަކުގައި ވެސް ދަނީ ވެކްސިން ޖަހައިދެމުން ނެވެ.
ވެކްސިން ދިނުމުގައި އެންމެ ފުރަތަަމަ އިސްކަންދީފައިވަނީ ފްރަންޓްލައިންގައި މަސައްކަތް ކުރާ ސިއްހީ ހިދުމަތްތެރީން ނަ ށެވެ. އަދި މިހާރު ޓޫރިޒަމް ދާއިރާގެ ބޭފުޅުންނަށާއި ޓީޗަރުންނާއި އުމުރުން ދުވަސް ވީ މީހުންނަށް ހާާއްސަ އިސްކަމެއްދީގެން ވެކްސިން ޖެހުމަށް ވެސް މިހާރު ދަނީ ތައްޔާރުވަމުން ނެވެ.