ވެކްސިނާ ދެކޮޅަށް އެކި ވާހަކަތައް ފަތުރަމުން ގެންދިޔަ ވެބްސައިޓެއް ބްލޮކް ކޮށްފި އެވެ.
ކޮވިޑްގެ ބަލިމަޑުކަމާއި ގުޅިގެން އެ ބަލިން ރައްކާތެރިވުމަށް ވެކްސިން ޖަހަން ފަށާފައިވާ ދަނޑިވަޅުގައި ރާއްޖޭގައި ދިވެހި ބަހުން މައުލޫމާތު ގެނެސްދޭ ވެބްސައިޓަކުން ގެންދިޔައީ ވެކްސިނާ ދެކޮޅަށް ތަފާތު ވާހަކަތައް ފަތުރަމުންނެވެ. މި ވެބްސައިޓްގެ މައްސަލަ މޯލްޑިވްސް މީޑިއާ ކައުންސިލުން ވަނީ ކޮމިއުނިކޭޝަން އޮތޯރިޓީ އާއި މޯލްޑިވްސް ޕޮލިސް ސާވިސްގެ ސަމާލު ކަމަށް ގެންގޮސްފަ އެވެ.
މީޑިއާ ކައުންސިލުން ދައުލަތުގެ އިދާރާތަކުގެ ސަމާލު ކަމަށް އެކަން ގެނައީ މިދިޔަ މަހުގެ 20 ވަނަ ދުވަހު އެވެ. ވެބްސައިޓް ބްލޮކް ކުރުން ލަސްވާތީ އިއްޔެ ވެސް މީޑިއާ ކައުންސިލުން ކަންބޮޑުވުން ފާޅުކުރި އެވެ. އޭގެ ފަހުން އެ ވެބްސައިޓަށް ނުވަދެވޭ ގޮތް ހަދާފައިވަނީ ރޭގެ ވަގުތެއްގަ އެވެ.
މި ވެބްސައިޓުން ގެންދިޔައީ ވެކްސިން ޖެހުމުގެ ސަބަބުން ސިއްހީ ގިނަ މައްސަލަތަކެއް ދިމާވާ ކަމަށް ބުނެ ވެކްސިން ނުޖަހަން ބާރު އަޅަމުންނެވެ. އަދި ވެކްސިންއާމެދު ބިރުވެރިކަން އުފެއްދުމަށް ތަފާތު އެކި ލިޔުންތައް ގެނެސްދީފައި ވެއެވެ.
ރާއްޖޭގައި ކޮވިޑް ވެކްސިން މިހާތަނަށް 33،000 ވުރެ ގިނަ މީހުން ޖަހާފައި ވެއެވެ. އޭގެ ތެރޭގައި ދައުލަތުގެ އިސްވެރިންނާއި ދީނީ އިލްމުވެެރިން ވެސް ހިމެނިވަޑައިގަންނަވަ އެވެ. ދީނީ އިލްމުވެރިން ގެންދަވަނީ ރައްކާތެރިކަމަށްޓަކައި ވެކްސިން ޖެހުމަށް އިލްތިމާސް ކުރަމުންނެވެ.
ރާއްޖޭގައި ކޮވިޑް ވެކްސިން ޖަހަން ފެށި ނަމަވެސް ވެކްސިން ޖަހަން މަޖުބޫރެއް ނޫނެވެ.