އިދިކޮޅު ޕްރޮގްރެސިވް ކޮންގްރެސް ކޯލިޝަނުން މިއަދު ބޭއްވި އެއްވުމުގެ ތެރެއިން ބޯ ފެޅުނު މީހަކަށް ފަރުވާ ދޭން ފަށައިފި އެވެ.
މުޒާހަރާ ކުރާނަމަ ހުއްޓުވާނެ ކަމަށް ބުނެ ފުލުހުން އިންޒާރު ދީފައިވަނިކޮށް މިއަދު ބޭއްވި މުޒާހަރާގެ ތެރެއިން ބައެއް މީހުންނަށް އަނިޔާވެފައިވެއެވެ. ޕީޕީއެމްގެ އިސް އެކްޓިވިސްޓެއް ކަމަށްވާ މޫސަގެ ބޯ ވަނީ ފަޅައިގެން ގޮސްފައެވެ. އޭނާގެ ބޯ ފެޅުނީ މުޒާހަރާގެ ބައިވެރިއަކު ހައްޔަރު ކުރަން ފުލުހުން މަސައްކަތް ކުރަނިކޮށް އޭނާގެ ގައިގައި ޖެހި ވެއްޓުމުންނެވެ.
ފުލުހުން ބުނީ މޫސަ ވެއްޓުނީ ފުލުހުންނަށް ފިލަން އުޅުނު މީހާގެ ގައިގައި ޖެހިގެން ކަމަށެވެ. އަދި އޭނާގެ ބޯ ފެޅުމުން ހޮސްޕިޓަލަށް ގެންގޮސް ފަރުވާ ދެމުންދާ ކަމަށެވެ.
މުޒާހަރާ ހުއްޓުވަން ވަރަށް ގިނަ އަދަދެއްގެ ފުލުހުން މަގުމަތީ ހަރަކާތްތެރިވި އެވެ. އަދި ފުލުހުންގެ ބެލުމުގެ ދަށަށްވެސް ގިނަ ބަޔަކު ގެންގޮސްފައިވެއެވެ. ފުލުހުން ބުނީ މިހާތަނަށް 28 މީހަކު ހައްޔަރުކޮށްފައިވާ ކަމަށެވެ. މުޒާހަރާގެ ތެރެއިން ބައެއް މީހުންނަށް އަނިޔާވެފައިވެއެވެ. އޭގެ ތެރޭގައި ނައިފަރު ދާއިރާގެ މެންބަރު އަދި ޕީޕީއެމްގެ ނާއިބު ރައީސް އަހުމަދު ޝިޔާމް ހިމެނިވަޑައިގަންނަވައެވެ. ޝިޔާމަށް އަނިޔާވީ ފުލުހުން އޭނާ ހައްޔަރު ކުރަން އުޅުމުގެ ތެރޭގައެވެ.