ހިސާބު ކިޔަވަން ޝައުގުވެރިވާ ކުދިންނަށް މައިކްރޮސޮފްޓް އެޖް، ހާއްސަ ސަމާލު ކަމެއް ދޭން އެބަ އުޅެ އެވެ. ބުނެވޭ ގޮތުގައި މައިކްރޮސޮފްޓްއިން މިހާރު މަސައްކަތް ކުރަނީ ކޮންމެ ވައްތަރެއްގެ އީކްއޭޝަނެއް ހަވާލު ކުރި ނަމަވެސް ހައްލު ކޮށްދެވޭ ވަރުގެ ޓޫލްއެއް އެޖްގައި ގާއިމު ކުރުމަށެވެ.
މައިކްރޮސޮފްޓްއިން އިންޓަނެޓް އެކްޕްލޯރާ ދޫކޮށް "ކްރޯމިއަމް އިންޖީން" އަށް ބިނާކޮށް ވެބް ބްރައުޒާއެއް އުފެއްދުމަކީ މޮޅަށް ކުޅުނު ކުޅިއެކެވެ. މައިކްރޮސޮފްޓަށް މީގެ ކުރިން މަލާމާތްކުރި މީހުން ވެސް މިހާރު ބުނަނީ އެޖް ހަމަ ވަރަށް ފައްކާ ކަމަށެވެ.
އެޖް މިހާރު ގުނާލެވެނީ ގޫގުލް ކްރޯމް، މޮޒިއްލާ ފަޔާފޮކްސް އަދި އޮޕެރާ ފަދައިން މަގަތު ސަފު ބްރައުޒާތަކުގެ ތެރޭގަ އެވެ. ވާދަވެރިންނާ އެއްހަމައަކުން އަޅާކިޔަން ބެލި ނަމަވެސް ބައެއް މީހުންނަށް އެޖް މިހާރު ވަރަށް ކަމުދެ އެވެ.
މައިކްރޮސޮފްޓް އެޖް ބްރައުޒާއާ ބެހޭ ގޮތުން މިގޮތަށް ލީކުވާ މައުލޫމާތުން އެނގެނީ، އެޖް ބޭނުންކުރާ މީހުން ސަޕްރައިޒްކޮށްލަން ފީޗާތަކެއް އުފައްދަމުން އަންނަ ކަމެވެ.
ހިސާބު ކިޔަވާ ކުދިންނަށް އަމާޒުކޮށް އުފައްދާ "މެތު ސޯލްވާ" ޓޫލް އަކީ ނަމްބަރު ހަދާ ނިމުމުން ޖަވާބު ބަލާލަން އެދޭ ކުދިންނަށް ވެސް ވަރަށް ބޮޑު ފަސޭހައަކަށް ވާނެ ކަމަށް މައިކްރޮސޮފްޓްއިން ބުނެ އެވެ. މިއީ އައިޖީސީއެސްއީ ހަދާ ކުދިންނަށް ނަމްބަރުގެ ސްޓެޕްތައް ވެސް ބުނެދެވޭ ފެންވަރުގެ ސޮފްޓްވެއާ އެޕްލިކޭޝަނެއް ކަމަށް ބުނެވެ އެވެ.
މި ޓޫލް ބީޓާ މަރުހަލާއިން ނެރެ އާންމު ބްރައުޒާގައި ހިމަނާނެ ކަމަށް ވަނީ އަދި ދުވަސްކޮޅެއް ފަހުންނެވެ. އެހެން ނަމަވެސް ޓެސްޓް ކޮށްލަން އެދޭ ކުދިންނަށް "މައިކްރޮސޮފްޓް އެޖް އިންސައިޑާ ޗެނަލްސް" އިން ލުއި ގޮތެއް ފެނިދާނެ ކަމަށް ބެލެވެ އެވެ.