ޕޫޖާ ބަޓް އަކީ 90ގެ އަހަރުތަކުގައި ބޮލީވުޑްގައި ވަރަށް ގަދަޔަށް ފިޔަޖެހި ބަތަލާ އެކެވެ. އޭނާގެ ރަން ޒަމާނުގައި ރީތި މޮޅު ފިލްމުތަކެއް ކުޅެފައި ވެއެވެ. ނަމަވެސް އެހެން ބަތަލާއިންނާއި ޕޫޖާގެ ތަފާތުތަކެއް ހުއްޓެވެ. ވާދަވެރި ބަތަލާއިންނާ ޚިލާފަށް ޕޫޖާ ކުޅެފައިވަނީ މަދު ފިލްމު ތަކެކެވެ.
އެގޮތުން އޭނާ ކުޅުނު ހުރިހާ ފިލްމަކީ ވެސް އެ ފިލްމެއް ކުޅެން އޭނާގެ ހިތް އެދިގެން ކުޅުނު ފިލްމުތަކެވެ. ބޮޑު ޕްރޮޑިއުސަރެއް ވީމަ ނުވަތަ މޮޅު ޑައިރެކްޓަރެއް ނުވަތަ މަޝްހޫރު އެކްޓަރެއް އުޅޭތީ އޭނާ އެއްވެސް ފިލްމެއްގައި ބައިވެރިއެއް ނުވެ އެވެ. ޕޫޖާ ކުޅެފައިވާ ކޮންމެ ފިލްމަކީ ވެސް އޭނާގެ އެކްޓިން ހުނަރު މޮޅަށް ދައްކާލެވޭ ފިލްމުތަކަށް ވުމެވެ.
އެ ދުވަސްވަރު ފިލްމީ މަސައްކަތް ކުރުމަށްފަހު ޕޫޖާ ފިލްމު އިންޑަސްޓްރީން ގެއްލުނީ އެވެ. އެތައް އަހަރެއް ފަހަރުން ޑައިރެކްޓަރެއްގެ ހައިސިއްޔަތުން ބައެއް ފިލްމު އުފެއްދުމުގެ މަސައްކަތް ކޮށްފައި ވެއެވެ.
މިހާރު 49 އަހަރު ފުރިފައިވާ ޕޫޖާ، އަނެއްކާވެސް އެކްޓަރެއްގެ ހައިސިއްޔަތުން މަސައްކަތްކުރަން ވަނީ ފަށާފަ އެވެ. އެގޮތުން އޭނާ ބަތަލާގެ ރޯލު އަދާކުރާ ވެބް ސީރީޒް "ބޮމްބޭ ބޭގަމްސް" މިއަދުން ފެށިގެން ނެޓްފްލިކްސް އިން ދައްކަން ފަށާނެ އެވެ.
ޕޫޖާ ބުނީ 90ގެ އަހަރުތަކާ ބަލާއިރު އެކްޓަރުންނާ މާ ރަނގަޅު ޗޮއިސްތައް މިހާރު އެބަހުރި ކަމަށެވެ. އޭނާ ފިލްމު ކުޅެން ފެށި ދުވަސްވަރު އެ މަސައްކަތުގައި އުޅުނު ގިނަ މީހުންނާ އޭނާއާ ރަނގަޅު ގުޅުމެއް ގާއިމް ކުރެވޭ ގޮތް ނުވި ކަމަށް ޕޫޖާ އެއްބަސްވި އެވެ.
އެކްޓަރު-ޑައިރެކްޓަރު-ޕްރޮޑިއުސަރު ޕޫޖާ ހިންދީ ފިލްމު އިންޑަސްޓްރީއަށް ނުކުތީ 1989ގައި ރިލީޒްކުރި "ޑެޑީ" އިންނެވެ. ޕޫޖާ ބުނީ އޭނާ ކުޅޭ ފިލްމުތަކުގައި ކުޅޭ ކެރެކްޓާތަކަކީ އެއާއެކު އޭނާއަށް ދިރިއުޅެވެން ޖެހޭނެ ކެރެކްޓާ ތަކެއް ކަމަށެވެ.
ޕޫޖާގެ ފިލްމީ ކެރިއަރުގެ އެންމެ ފާހަގަކޮށްލެވޭ ފިލްމުތަކުގެ ތެރޭގައި "ދިލް ހޭ ކެ މާންތާ ނެހީ"، "ސަޅަކް"، "ޕިރް ތެރީ ކަހާނީ ޔާދް އާއީ"، "ސާ" އަދި "ޒަޚަމް" ހިމެނެ އެވެ.
އޭގެ ފަހުން ޕޫޖާ ޕްރޮޑިއުސްކޮށް ޑައިރެކްޓްކުރި "ތަމަންނާ"، "ސުރް"، "ޕާޕް" އަދި "ހޮލިޑޭ" ރިލީޒްކޮށްފައި ވެއެވެ.
މިދިޔަ އަހަރު ރިލިޒްކުރި "ސަޅަކް 2"ގައި ޕޫޖާ ބައިވެރިވި ނަމަވެސް އޭނާ އެ ފިލްމުގައި ބައިވެރިވީ މެހެމާނެއްގެ ގޮތުގަ އެވެ. "ބޮމްބޭ ބޭގަމްސް" އިން އޭނާ ފުރިހަމަ އެކްޓަރެއްގެ ގޮތުގައި ބާރުގަދަ ރޯލަކުން ފެންނާނެ އެވެ.
"އަހަރެންގެ ވާދަވެރިންނާ ބަލާއިރު އަހަރެން ކުޅުނީ މަދު ފިލްމުތަކެއް. މުޅި ކެރިއަރުގައި ވެސް 23 ވަރަކަށް ފިލްމުގައި އަހަރެން މަސައްކަތްކުރީ. އަހަރެންނާއެކު އެ ދުވަސްވަރު ފިލްމު ކުޅުނު ބަތަލާއިން 80 ނުވަތަ 90 ވަރަކަށް ފިލްމު ކުޅެފައިވާނެހެން ހީވަނީ. ނަމަވެސް އަހަރެން ޚިޔާރުކުރީ އަހަރެން ކުޅޭ ހިތްވާ ކަހަލަ ރޯލުތައް އެކަނި،" ޕޫޖާ ބުންޏެވެ.
ޕޫޖާގެ "ބޭގަމް ޖާން" އަކީ މުޖުތަމައުގައި ދިރިއުޅޭ ފަސް ވައްތަރެއްގެ ފަސް އަންހެނަކު ބޮމްބޭގައި ދިރިއުޅެން ކުރާ މަސައްކަތް ދައްކުވައިދޭ ސީރީޒް އެކެވެ. މި ސީރީޒް ޑައިރެކްޓްކޮށްފައިވަނީ އަލަންކްރިތާ ޝްރިވަސްތަވް އެވެ.