ސޯލް، (ބީބީސީ) - ޒަމާންވީ ދެބަސްވުންތަކަށް ހައްލެއް ހޯދަން އޭޝިޔާގެ ތިން ބާރުން ތިން އަހަރު ތެރޭގައި ބާއްވާ ފުރަތަމަ ބައްދަލުވުމަށް ތައްޔާރުވަމުން އެބަ ދެއެވެ.
ޖަޕާނާއި ޗައިނާގެ އިތުރުން ދެކުނު ކޮރެއާ ބައިވެރިވާ މި ބައްދަލުވުން އޮންނާނީ ދެކުނު ކޮރެއާގެ ވެރިރަށް ސޯލްގައެވެ.
ތިން ގައުމުގެ މެދުގައި ހުރި ދެބަސްވުން ތަކަށް ބަލާއިރު، ދެވަނަ ބޮޑު ހަނގުރާމައިގެ ޒަމާނުއްސުރެ ނުނިމި ހުރި މައްސަލަތައް ވެސް ހިމެނެއެވެ. ޗައިނާއާއި ދެކުނު ކޮރެއާއިން ދެކޭ ގޮތުގައި ދެވަނަ ބޮޑު ހަނގުރާމައިގާ ޖަޕާނުން ހިންގި ޖަރީމާތަކުގެ ބަދަލު ދިނުމަށް އެގައުމުން އެކަށީގެންވާ މަސައްކަތެއް ނުކުރެއެވެ.
އަނެއް މައްސަލައަކީ ޖަޕާނާއި ކޮރެއާއިން އެމެރިކާއާއި އެކު ބާއްވާ ގާތް ގުޅުމެވެ. ޗައިނާއާއި އެމެރިކާގެ ޒަމާންވީ ދެކޮޅުވެރިކަމުގެ އަސަރު ޖަޕާނާއި ކޮރެއާއަށް ވެސް ކުރެއެވެ. އެކަމަކު ޖަޕާނާއި ކޮރެއާއަށް އެމެރިކާ މުހިންމުވާ މިންވަރަށް ވިޔަފާރީގެ ކުރިމަގަށްޓަކައި ޗައިނާ ވެސް މުހިންމެވެ.
މީގެ އިތުރުން، އުތުރު ކޮރެއާގެ ނިއުކްލިއާ މައްސަލައިގާ ތިން ގައުމުން ނެރޭ ވަރުގަދަ ސްޓޭޓްމަންޓެއްވެސް މި ބައްދަލުވުމުގެ ތެރޭން ފައިދާ ވާނެ ކަމަށް ބެލެވެއެވެ.
މި ތިން ގައުމުން 2012 ވަނަ އަހަރާ ހަމައަށް އަހަރަކު އެއްފަހަރު ބައްދަލުކުރަމުން ދިޔައެވެ. އެހެން ނަމަވެސް އޭގެ ފަހުން މި ބައްދަލުވުންތައް ވަނީ ހުއްޓިފައެވެ. ތިން ގައުމުން މިހާރު ގަބޫލުކުރާ ގޮތުގައި، ހިތްހަމަ ނުޖެހުންތަކެއް ހުއްޓަސް މި ބައްދަލުވުންތައް ކުރިއަށް ގެންދިއުން ކޮންމެހެން ބޭނުމެވެ. ހާއްސަކޮށް އިގްތިސާދީ ކަންކަމުގައި ތިންގައުމުގެ މެދުގައި ދައްކަން ހުރި ވާހަކަތައް ގިނައެވެ.
އޭޝިޔާގެ ދެ ގައުމެއްގެ ދެ ލީޑަރުން ސަލާމް ކުރަނީ: އޭޝިޔާގެ ބާރުތައް ބައްދަލުވަނީ ކޯޅުންތަކަށް ނިމުން ގެނައުމަށް -- ފޮޓޯ: ބީބީސީ