ރާއްޖެ އަބަދުވެސް ކުރިއަށް ދާނީ "ގައުމީ އިސްލާމީ ވިސްނުމެއް" ގައި ކަމަށް ކުރީގެ ރައީސް މައުމޫން އަބްދުލް ގައްޔޫމް ވިދާޅުވެއްޖެ އެވެ.
ކުރީގެ ރައީސް އަދި ދީނީ އިލްމުވެރިޔާ މައުމޫން މިހެން ވިދާޅުވީ މިއަދު ކުރެއްވި ޓްވީޓެއް މެދުވެރި ކުރައްވަ އެވެ. އެ މަނިކުފާނު ވިދާޅުވީ ވޭތުވެ ދިޔަ ދިގު މުއްދަތުގައި ވެސް ރާއްޖެ ކުރިއަށް ދިޔައީ ގައުމީ އަދި އިސްލާމީ ވިސްނުމުގައި ކަމަށެވެ.
"މުސްތަގުބަލުގައި ވެސް ރާއްޖެ ކުރިއަށް ދާނީ އިރާދަ ކުރެއްވިއްޔާ ހަމަ ގައުމީ އަދި އިސްލާމީ ވިސްނުމުގައި" އެމަނިކުފާނުގެ ޓްވީޓުގައި ވިދާޅުވި އެވެ.
އެ މަނިކުފާނު މާނަ ކުރައްވާ "ގައުމީ އިސްލާމީ ވިސްނުން" ތަފުސީލްކޮށް ދެއްވައި ދެވަނަ ޓްވީޓެއް ކުރައްވާފައެއް ނުވެއެވެ.
ރައީސް މައުމޫން މިފަދައިން ވިދާޅުވެފައިވާއިރު އެ މަނިކުފާނުވެސް ހިމެނި ވަޑައިގަންނަވާ މި ސަރުކާރު އައި ފަހުން ރާއްޖޭގައި އިސްލާމް ދީނާއި ގުޅުވައި އަންނަ ތަފާތު އެތައް މައްސަލަތަކެއް ވަނީ ފެންމަތިވެފަ އެވެ.
ރާއްޖޭގައި އިސްލާމް ދީނަށާއި ކީރިތި ރަސޫލާއަށް ފުރައްސަރަ ކުރުން އާންމު ކަމަކަށް ހަދާފައިވާއިރު އިސްލާމްދީނަށް ވަރަށް ބޮޑަށް ފުރައްސާރަކޮށް ހައްދުފަހަނައަޅާފައިވާ ހަރުކަށި ޖަމާއަތެއް ކަމަށްވާ އެމްޑީއެން އިން ނެރުނު ރިޕޯޓެއްގެ މައްސަލަ ވަރަށް ބޮޑަށް ހޫނުވެފައި ވެއެވެ. އަދިި އެ ޖަމިއްޔާއަށް ނިސްބަތްވާ ގިނަ ބަޔަކު ސަރުކާރާރާއި ދައުލަތުގެ އިސް މަގާމުތަކުގައި އެބަތިއްބެވެ.
ހަައްދުފަހަނައެޅި ހަރުކަށި އެމްޑީއެންގެ ރިޕޯޓު ނެރުނު މީހުންނާއި މެދު ފިޔަވަޅެއް އަޅާފައި ނުވާ މައްސަލަ އާއި ރާއްޖޭގައި އިސްލާމް ދީނަށް ފުރައްސާރަ ކުރަމުންދާ ދިއުމާ ހެދި ރާއްޖޭގެ ގިނަ ދީނީ އިލްމުވެރިންނާއި އާންމު ރައްޔިތުން ވަނީ ވަރަށް ބޮޑަށް ހިތްހަމަ ނުޖެހިފަ އެވެ.