ރިސޯޓް ހަދަން ތ. އަތޮޅުން ދޫކުރި ރަށްތަކެއް ނުހެދި އަހަރުތަކެއް ވެފައިވާތީ އެ ރަށްތަކާމެދު ގޮތްތަކެއް ނިންމަންޖެހޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ އެމްޑީޕީގެ ރަށްވެހި ފަތިސް ކެންޕެއިން ބައްދަލްވުމުގައި ވާހަކަފުޅު ދައްކަވަމުންނެވެ. ރޭގެ ބައްދަލުވުން ހާއްސަކޮށްފައި ވަނީ ތ އަތޮޅަށެވެ.
ބައްދަލްވުމުގައި ބައިވެރިވި އެ އަތޮޅުގެ އެމްޑީޕީގެ ކެންޑިޑޭޓުން ވަނީ އެ އަތޮޅުގައި ޓޫރިޒަމް ދޫކުރި ރަށްތަކެއް ނުހެދި އަހަރުތަކެއް ފާއިތުވެފައިވާތީ ކަންބޮޑުވުން ފާޅު ކޮށްފައެވެ. އެކަމަށް ހައްލު ހޯދާދިނުމަށް ކެންޑިޑޭޓުން ވަނީ ރައީސް ސޯލިހުގެ އަރިހުގައި އެދިވަޑައިގެންފައެވެ.
ތ. އަތޮޅުގައި ނުހެދި ހަ ރަށެއް އެބައޮތެވެ. އެއީ ރުއްތިބި އާއި ކަޅުދިޔަފުށި އާއި އޮޅުގިރި އާއި އެލާ އަދި އޮޅުގިރި އަދި އެއްކުރުފުށި ފިނޮޅެވެ. މީގެން ބައެއް ރަށްރަށަކީ މީގެ 10 އަހަރު ކުރިން ޓޫރިޒަމަށް ތަރައްގީ ކުރުމަށް ދޫކުރި ރަށްތަކެކެވެ. އަދި ބައެއް ރަށްރަށް ނުހެދިވާތާ ފަސް އަހަރަށްވުރެ ދިގު މުއްދަތެއް ހޭދަވެއްޖެ އެވެ. މީގެ އިތުރުން ކަޅުފަހަލަފުއްޓަކީވެސް ކުރިން ޓޫރިޒަމަށް ދޫކުރި ރަށެކެވެ. ނަމަވެސް މިދިޔަ ސަރުކާރުގައި ވަނީ އެރަށް ހަވާލުކުރި ކުންފުނި އަތުން އަތުލާފައެވެ.
ބައްދަލްވުމުގައި ވާހަކަދައްކަވަމުން ރައީސް ސޯލިހް ވިދާޅުވީ އެރަށްރަށް ނުހެދި ހުރުމަކީ އެމަނިކުފާނުގެ ވަރަށް ބޮޑު ކަންބޮޑުވުމެއް ކަމަށެވެ. އަދި އެރަށްރަށާ މެދު ޓޫރިޒަމް މިނިސްޓްރީން ގޮތްތަކެއް ނިންމަން ޖެހޭ ކަމަށް ވިދާޅުވިއެވެ. އެރަށްރަށް މިހާރު ދޫކޮށްފައިވާ ކޮންޓްރެކްޓްގެ އަތުން ރަށް އަތުލާ އެހެން ބަޔަކަށް ހަވާލުކޮށްގެން ނަމަވެސް ރަށްތައް ނިންމާ ހުޅުވަން ޖެހޭ ކަމަށް ވިދާޅުވިއެވެ.
"ޓޫރިޒަމް މިނިސްޓްރީން މިކަމާމެދު ވިސްނާފަ ގޮތެއް ނިންމަންޖެހޭ. ނުކުރެވޭ ކަމަށްވަންޏާ ނަގާފައި އަލުން ދިނުން ނޫނިއްޔާ އެހެން ވިސްނުންތަކެއް އެބަ ގެންގުޅެންޖޭ. ދިރާސާތަކެއް އަޅުގަނޑުމެން އެބަ ކުރަން،" ރައީސް ވިދާޅުވިއެވެ.