ދަނބިދޫ ބަންދު ކޮށްފި

ކޮވިޑް-19 ގެ ދެ ކޭހެއް ފެނިގެން ލ. ދަނބިދޫއަށް އަރާ ފޭބުން މަނާކޮށް އެ ރަށް އެޗްޕީއޭގެ މޮނިޓަރިންއަށް ގެންގޮސްފި އެވެ.

އެ ރަށުން ޕޮޒިޓިވްވެފައި ވަނީ ލ. މާމެންދޫ ކްލަސްޓާއާ ގުޅުންހުރި ދެ މީހެކެވެ. އެޗްޕީއޭއިން ބުނީ ކޮންޓެކްޓް ޓްރޭސިންގެ މަސައްކަރް ނިމެންދެން މާމެންދޫއަށް އަރާ ފޭބުން މަނާކޮށްފައިވާ ކަަމަށެވެ.

އަތޮޅުތަކުގެ ތެރޭގައި ޕޮޒިޓިވް ކޭސްތައް އިތުރުވަމުން ދާއިރު މާމެންދޫން ގިނަ ބަޔަކު ވަނީ ކޮވިޑަށް ޕޮޒިޓިވް ވެފައެވެ. އިއްޔެ އެކަނިވެސް އެ ރަށުން 77 މީހަކު ޕޮޒިޓިވްވި އެވެ. މިވަގުތު 23 ރަށެއް އޮތީ ބަންދު ކޮށްފަ އެވެ.

މޮނިޓަރިންގައިވާ ރަށްތައް

މިދިޔަ ފަސް ދުވަހަކީ ރާއްޖޭގައި ރެކޯޑް އަދަދަކަށް މީހުން ޕޮޒިޓިވްވި ފަސް ދުވަހެވެ. މިދިޔަ ސައުވީސް ގަޑިއިރަކީ ރާއްޖެއިން މިހާތަނަށް އެންމެ ގިނަ ބަޔަކު ޕޮޒިޓިވްވީ ސައުވިސް ގަޑިއިރެވެ. އިއްޔެ އެކަނިވެސް 386 މީހަކު ޕޮޒިޓިވްވެފައިވެއެވެ. އޭގެ ކުރިން ދެ ދުވަހަކުވެސް ޕޮޒިޓިވް ނަންބަަރު 300 އިން މައްޗަށް ގޮސްފައިވެއެވެ.

ރާއްޖެއިން މިހާތަނަށް 28،588 މީހަކަށް ބަލި ޖެހިފައިވާއިރު އެކްޓިވް ކޭސްތަކުގެ އަދަދަދު ވަނީ 4،000 އިން މަތީގައެވެ. ކޮވިޑް ޖެހިގެން 71 މީހަކު މަރުވެފައިވެއެވެ.