ރާއްޖޭގެ މަތީތައުލީމާއި ތަމްރީނުގެ ބިލު، ރައީސް އިބްރާހިމް މުހައްމަދު ސޯލިހު މިއަދު ތަސްދީގު ކުރައްވައިފި އެވެ.
ރައީސް ސޯލިހު ތަސްދީގު ކުރެއްވި މަތީ ތައުލީމާބެހޭ ބިލަކީ މިދިޔަ މަހުގެ 28 ވަނަ ދުވަހު ރައްޔިތުންގެ މަޖިލީހުން ފާސްކުރި ބިލެކެވެ.
މި ގާނޫނުގައި، މަތީ ތައުލީމުގެ ފެންވަރު ކަށަވަރުކޮށް ވަޒަން ކުރަން ކުރަންޖެހޭ އެންމެހާ މަސައްކަތްތައްކޮށް، މަތީ ތައުލީމާއި ތަމްރީނުދޭ މަރުކަޒުތަކުން ދޫކުރާ ސަނަދުތަކުގެ ފެންވަރު ބެލުމުގެ މަސައްކަތްތައް ކުރުމަށްޓަކައި "މޯލްޑިވްސް ކޮލިފިކޭޝަންސް އޮތޯރިޓީ" ގެ ނަމުގައި ސަރުކާރުގެ ވަކި އިދާރާއެއް އުފެދޭނެ ކަމަށް ބަޔާންކޮށްފައި ވެއެވެ.
ގާނޫނަށް އަމަލުކުރަން ފެށުމާއެކު ގާނޫނުގެ ކުރިން މޯލްޑިވްސް ކޮލިފިކޭޝަންސް އޮތޯރިޓީގައި މަސައްކަތްކުރަމުން އައި ހުރިހާ މުވައްޒަފުން އަލަށް އުފައްދާއިދާރާއަށް ބަދަލުކުރާނެ ކަމަށް ވެސް ގާނޫނުގައި ބުނެ އެވެ. އަލަށް އުފެއްދި އޮތޯރިޓީގެ ކަންކަމުގައި ރައްޔިތުންގެ މަޖިލީހަށް ޖަވާބުދާރީ ވާނީ ހަޔާ އެޑިއުކޭޝަން މިނިސްޓަރެވެ.
މި ގާނޫނުގެ ބޭނުމަކީ ރާއްޖޭގެ މަތީ ތައުލީމުގެ ފެންވަރު ރަގަޅުކޮށް، ތައުލީމު ފޯރުކޮށްދޭ މަރުކަޒުތަކުގެ ހިދުމަތްތައް ކުރިއެރުވުމެވެ. އެހިދުމަތްތައް ފޯރުކޮށްދިނުމުގައި އަމަލުކުރާނެ އުސޫލުތަކާއި މަތީ ތައުލީމު ތަރައްގީކޮށް ކުރިއެރުވުމާއި ގުޅޭ އުސޫލުތައް މި ގާނޫނުގައި ވެއެވެ.
މި ގާނޫނުގެ މައިގަނޑު މަގްސަދަކީ ހަމަހަމަކަމާއެކު ދިވެހިންނަށް ތައުލީމީ ފުރުސަތުތައް ހުޅުވައިލުމާއި މަތީ ތަޢުލީމާއި ތަމްރީނު ދިނުމުގެ ނިޒާމެއް ރާއްޖޭގައި ގާއިމުކުރުމެވެ. އަދި ރާއްޖޭގައި ފޯރުކޮށްދޭ މަތީ ތައުލީމަކީ ފެންވަރު ރަނގަޅު، ކަނޑައެޅޭ މިންގަނޑެއްގެ ތެރެއިން ދެވޭ ހިދުމަތެއްގެ ގޮތުގައި ހެދުމެވެ.