ފިޝަރީޒް މިނިސްޓަރުގެ މަގާމަށް އައްޔަނުކުރެއްވި ޑރ. ހުސައިން ރަޝީދު ހަސަންގެ ހިއްސާއެއް ކުންފުންޏެއްގައި އޮތުމުން އޭނާގެ ހުވައާ މެދު ސުވާލު އުފައްދަވައިފަ އެވެ.
ކުރިން އެންވަޔަރަންމަންޓް މިނިސްޓަރުގެ މަގާމުގައި ހުންނެވި ޑރ. ހުސައިން ފިޝަރީޒް މިނިސްޓަރުގެ މަގާމަށް އައްޔަނުކުރެއްވީ މިމަހުގެ ފަސް ވަނަ ދުވަހު އެވެ. އަދި އެ މަގާމަށް ޑރ. ހުސައިން އައްޔަނުކުރަން ފެނޭތޯ ބަލަން ދިރާސާކުރުމަށް މަޖިލީހުގެ މިނިވަން މުވައްސަސާތަކުގެ ކޮމެޓީއަށް ފޮނުވީ މި މަހުގެ 18 ވަނަ ދުވަހު އެވެ.
މިއަދު ކުރިއަށް ދިޔަ އެ ކޮމިޓީގެ ބައްދަލުވުމުގައި، ބައެއް މެމްބަރުން ވަނީ ޑރ. ހުސައިންގެ ހިއްސާ ކުންފުންޏެއްގައި އޮންނާތީވެ މަގާމުގެ ހުވަޔާ ދޭތެރޭ ސުވާލު އުފައްދަވާފަ އެވެ.
މަޖިލީހަށް ލިބިފައިވާ ޑޮކިއުމަންޓްތަކާ ހަވާލާދީ ދިއްދޫ ދާއިރާގެ މެމްބަރު އަބްދުﷲ ވަހީދު ވިދާޅުވީ ޑރ. ހުސައިންގެ ނަން، ކުންފުންޏެއްގެ ފައުންޑިން ޝެއާހޯލްޑަރެއްގެ ގޮތުގައި މިހާރުވެސް އެބައޮތް ކަމަށެވެ. ނަމަވެސް އެއީ ކޮން ކުންފުންޏެއް ކަމަށް ވިދާޅެއް ނުވެ އެެވެ. އެހެންކަމުން އޭނާ އެދިވަޑައިގެންނެވީ އެކަމުގައި މަޖިލީހުގެ ކައުންސެލް ޖެނެރަލްގެ ލަފައެއް ހޯދުމަށެވެ.
"އޭރުން ވާގޮތަކީ މެމްބަރުންގެ މެދުގައި ސުވާލެއް އުފެދުނަސް އަޅުގަނޑުމެން ނިންމި ނިންމުމުގައި ބިނާކުރި ކައުންސެލް ޖެނެރަލްގެ ލަފާ ފެންނަން އޮންނާނެ. ސީދާ ސާފުކޮށް ކައުންސެލް ޖެނެރަލް ދެކޭ ގޮތް އޮތުން މުހިންމު ކަމަށް އަޅުގަނޑު ފާހަގަކުރަނީ،" ވަހީދު ވިދާޅުވި އެވެ.
ގާނޫނުއަސާސީގައިވާ ގޮތުން ވަޒީރުންގެ މަޖިލީހުގެ އެއްވެސް މެމްބަރަކު ސަރުކާރުގެ އެހެން މަގާމެއް އަދި ވިޔަފާރި ފައިދާއެއް ލިބޭފަދަ މަގާމެއް ފުރައިގެން ނުވާނެ އެވެ. އަދި ވިޔަފާރިއެއް ހިންގުމުގައި އަމަލީ ގޮތުން ބައިވެރިވެ އާމްދަނީ ހޯދުމަށް ފަންނީ މަސައްކަތެއްގައި އަމަލީ ގޮތުން ޝާމިލްވެ އާމްދަނީއެއް ލިބޭ ފަދަ އެހެން އެއްވެސް މަސައްކަތެއް ކޮށް އެހެން އެެއްވެސް ފަރާތެއްގެ ވަޒީފާއެއް އަދާކުރުން ވަނީ މަނާވެ އެވެ.
ކޮމިޓީގައި ވާހަކަފުޅު ދައްކަވަމުން މަނަދޫ ދާއިރާގެ މެމްބަރު ހާރޫން އިދުރީސް ވިދާޅުވީ ގާނޫނުއަސާސީގައި ވަރަށް ސަރީހަކޮށް ވަޒީރަކަށް އެހެން ވިޔަފާރިއެއްގައި ބައިވެރިނުވެވޭނެ ކަމަށް އޮއްވައި ޑރ. ހުސައިން މަގާމަށް އައްޔަނުކުރަން ފެނިވަޑައި ނުގަންނަވާ ކަމަަށެވެ.
ނަމަވެސް ދަނގެތީ ދާއިރާގެ މެމްބަރު މުހައްމަދު ނާޒިމު ވިދާޅުވީ ކުންފުންޏެއްގެ ޝެއާ ހޯލްޑަރެއްގެ ގޮތުގައި މީހަކު ހުރި ނަމަވެސް ގިނަ ފަހަރު ކުންފުނީގެ މާލިއްޔަތާ ގުޅޭ ކަންކަމުގައި ޒިންމާ ނަަގަނީ މެނޭޖިން ޑިރެކްޓަރު ކަމަށެވެެ. އެހެންކަމުން ޑރ. ހުސައިން ކުންފުންޏެއްގެ ޝެއާ ހޯލްޑަރަކަށްވެ ހުރެ ވަޒީރެއްގެ ގޮތުގައި ހުރުން މައްސަލައެއްް ކަމަށް ދެކެވަޑައިނުގަންނަވާ ކަމަށެވެ.
އެ މައްސަލައިގައި މެމްބަރުންގެ ހިޔާލު ތަފާތުވުމުން ކައުންސެލް ޖެނެރަލްގެ ގާނޫނީ ލަަފައެއް ހޯދަން އެއްވެސް މެމްބަރަކު އިއުތިރާޒެއް ނުކުރައްވަ އެވެ. އެހެންކަމުން އެކަމުގައި ގާނޫނީ ލަަފައެއް ލިބެންދެން ޑރ. ހުސައިންއަށް ރުހުން ދިނުން މަޑުޖައްސާލަން ކޮމިޓީން މިއަދު ނިންމި އެވެ.
ޑރ. ހުސައިންއަށް ރުހުން ހޯދަން ކޮމިޓީއަށް ފޮނުވިއިރު އެންވަޔަރަންމަންޓް މިނިސްޓަރުގެ މަގާމަށް އައްޔަނުކުރެއްވި އައިމިނަތު ޝައުނާއަށް ރުހުން ދޭންވެސް ކޮމިޓީ އަށް އޮތީ ފޮނުވާފަ އެވެ. ކޮމިޓީގައި ބައިވެރިވި ހަތް މެމްބަރުންގެ ރުހުމާއެކު ޝައުނާ މިނިސްޓަރު ކަމަށް އައްޔަނުކުރަން މިއަދު ފާސްކުރި އެވެ.