ނިމިގެންދިޔަ ރިޔާސީ އިންތިހާބުގައި އެމްޑީޕީ އިސްވެ އޮތް ކޯލިޝަން ވެރިކަމަށް އައީ އަށާރަ ވަނަ ރައްޔިތުންގެ މަޖިލީހުގައި އެންމެ އަޑު ގަދަވި 12 މެންބަރުންގެ ފޮޓޯ ވިއްކައިގެން ކަމަށް ވިދާޅުވެ ދިއްދޫ ދާއިރާގެ މެންބަރު އަބްދުލްލަތީފް މުހައްމަދު އެމްޑީޕީއަށް ފާޑުވިދާޅުވެއްޖެ އެވެ.
އެ 12 މެންބަރުންނަކީ އޭރު ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަމުގެ ގަރާރުގައި ސޮއި ކުރެއްވި ޕީޕީއެމްއަށް ނިސްބަތްވި މެންބަރުންނެވެ. ގަރާރުގައިވާ ސޮއި ނުނެގުމުން އެ މެންބަރުންގެ ގޮނޑި ބަންޑާރަ ނައިބު ސުޕްރީމް ކޯޓަށް ވަޑައިގެން ގެއްލުވާލި އެވެ.
އޭގެ ފަހުން ވެސް ސުޕްރީމް ކޯޓުން އެ 12 މެންބަރުންގެ ގޮނޑިއާމެދު ގިނަ ނިންމުންތަކެއް ނިންމި އެވެ. އެެންމެފަހުން 12 މެންބަރުންގެ މައްސަލާގައި ވަކިވަކިން ސުޕްރީމް ކޯޓުން ނިންމީ ގޮނޑި ނުގެއްލޭ ކަމަށެވެ. ޕީޕީއެމް ދޫކުރައްވައި އެ ހުރިހާ މެންބަރުން ވެސް ފަހުން މަސައްކަތް ކުރެއްވީ އިދިކޮޅު ކޯލިޝަނުގަ އެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަ ކޮށްލަން ހަމަލާއެއް ދިން އިރު ސިފައިން ދެމުން ދިޔަ ސެކިޔުރިޓީ ބްރީޗްވި ގޮތް ބަލާ އިންކުއަރީއަށް ވަކިވަކި ސިފައިން ކޮމެޓީއަށް ހާޒިރު ނުކުރެވޭނެ ކަމަށް މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް) އިން އެންގި އެންގުމުގައި ސޮއި ކުރައްވާފައިވާ ޑިފެންސް މިނިސްޓްރީގެ ނައިބު ހަސަން ޒަމީލުގެ މައްސަލަ ބަލައިދިނުމަށް އެދި ރައީސް ނަޝީދު ހުށައެޅުއްވި މައްސަލަ އިމްތިޔާޒު ކޮމެޓީން ބޭރު ކޮށްލުމަށް ނިންމި ނިންމުމުގައި އެމްޑީޕީގެ ބައެއް މެންބަރުން ބައިވެރިވެވަޑައިގެންފައިވާތީ އެކަމަށް ރައީސް ނަޝީދުގެ ވަފާތެރި މެންބަަރުން ގެންދަވަނީ ފާޑުވިދާޅުވަމުންނެވެ. އަދި އެ މެންބަރުން މަގާމުތަކަށް ވަޑައިގެންނެވީ ރައީސް ނަޝީދުގެ ފޮޓޯ ޖައްސަވައިގެން ކެންޕެއިން ކުރައްވައިގެން ކަމަށް ވިދާޅުވިއެވެ.
އެ ކަމަށް އިޝާރާތް ކުރައްވާ ދިއްދޫ ދާއިރާގެ ކުރީގެ މެންބަރު އަބްދުލްލަތީފް ވިދާޅުވީ 2018 ވަނަ އަހަރު އޮތް ރިޔާސީ އިންތިހާބުގައި އެމްޑީޕީ ވެރިކަމަށް އައީވެސް 12 މެންބަރުންގެ ފޮޓޯ ވިއްކައިގެން ކަމަށެވެ. އަދި ރައީސް ނަޝީދު ޖަލުން މިނިވަން ކުރީވެސް 12 މެންބަރުންގެ މަސައްކަތުން ކަމަށެވެ.
"އެ ބާރަ މެންބަރުންނަށް ދާއިރާގެ މަޖިލީސް ގޮނޑި ދޭނެ ކަމަށް ނަޝީދު ވައުދުވެފައި ފަހުން ކަންތައްތައް ކުރި ގޮތްވެސް މިވަގުތު ހަނދާންކޮށްލުން ރަނގަޅު،" ނަޝީދުގެ ވަފާތެރި މެންބަރުން މިހާރު ދައްކަވާ ވާހަކަތަކަށް ރައްދު ދެއްވާ ލަތީފް ވިދާޅުވިއެވެ.
ރައީސް ނަޝީދު ރާއްޖެ ވަޑައިގެން 12 މެންބަރުންނާ އެމްޑީޕީގެ އޮފީހުގައި ބައްދަލުކުރައްވާ އެ މެންބަރުންނަށް އޭރު ތަމްސީލު ކުރެއްވި ގޮނޑިތައް ހޯއްދަވައި ދެއްވަން ކޯލިޝަނުން އެކުގައި މަސައްކަތް ކުރާނެ ކަމަށް ވަނީ ވިދާޅުވެފައެވެ. ނަމަވެސް ސަރުކާރުންވެސް އަދި އެމްޑީޕީންވެސް ފަހުން އެ މެންބަރުންނަށް އެއްވެސް ފުރުސަތެއް ތަނަވަސްކޮށްދީފައެއް ނުވެއެވެ. އަދި އެ މެންބަރުން ނިކުންނެވި ދާއިރާތަކަށް އެމްޑީޕީން ކެންޑިޑޭޓުންވެސް ނެރެފައިވެއެވެ.
ލަތީފަކީ މި ސަރުކާރު ގެނައުމަށް ބުރަކޮށް މަސައްކަތް ކުރެއްވި ބޭފުޅެކެވެ. އިދިކޮޅުގެ މަސައްކަތަށް އޭރު ލިބުނު އެންމެ ބޮޑު ހިތްވަރަކީ މަޖިލީހުގެ 12 މެންބަރަކު އިދިކޮޅު ޕާޓީތަކާއެކު މަސައްކަތް ކުރަން ފެށުމެވެ. އެ ޓީމުގައި ވަރަށް އިސް ދައުރެއް ލަތީފު އަދާކުރިއެވެ.
ނަމަވެސް ރައީސް ސޯލިހަށް ވެރިކަމަށް ވަޑައިގެންނެވުމުން އެ މެންބަރުންނާމެދު އަމަލުކުރެއްވި ގޮތުން ގިނަ މެންބަރުން މިހާރު ތިބީ ސަރުކާރާ ދުރުގައެވެ. އިދިކޮޅު ހަރަކާތްތަކުގައި މިހާރު އެންމެ ވަރުގަދަ އެއް ބޭފުޅަކީ ލަތީފެވެ. ޕީޕީއެމް އާއި ޕީއެންސީގެ މަގުމަތީ ހަރަކާތްތަކާއި އިހުތިޖާޖު އަދި އެއްވުންތަކުގައި އެންމެ ކުރީ ސަފުގައި ހުންނަވާ އެއް ބޭފުޅަކީ ލަތީފެވެ.