އިންތިގާލީ އިންސާފުގެ އޮފީހަށް މައްސަލަ ހުށަހަޅަން ބޭނުންވާ ފަރާތްތަކަށް މިއަދުން ފެށިގެން އެ ފުރުސަތު ހުޅުވާލައިފި އެވެ.
އިންތިގާލީ އިންސާފުގެ ގާނޫނު ބުނާ ގޮތުން 1953 ން ފެށިގެން 17 ނޮވެމްބަރު 2018 އާ ހަމައަށް ދައުލަތުގެ މުއައްސަސާއަކުން ނުވަތަ ދައުލަތުގެ މުއައްސަސާއެއްގެ އިސް ވެރިއެއްގެ ފަރާތަކުން ނިޒާމީ ސިފައެއްގައި ރާވައިގެން ހިންގާފައިވާ އިންސާނީ ހައްގުތަކާއި އަސާސީ މިނިވަންކަމާ ހިލާފު މައްސަލަތައް ހުށަހެޅޭނެ އެވެ.
މިއަދުން ފެށެގެން އޮގަސްޓް މަހުގެ 13 ވަނަ ދުވަހުގެ ނިޔަލަށް މައްސަލަތައް ހުށަހެޅުމަށް ވަނީ ހުޅުވައިލާފަ އެވެ. އެ އޮފީހުން ބުނީ މައްސަލައެއް ހުށަހަޅަން ބޭނުންވާނަމަ އޮފީހުގެ މައްސަލަ ހުށަހަޅާ ފޯމް އަދި ބަދަލު ހޯދަން އެދޭނަމަ، ބަދަލު ހޯދުމަށް އެދޭ ފޯމް ހުށަހަޅަން ޖެހޭނެ ކަމަށެވެ.
އިންތިގާލީ އިންސާފުގެ އޮފީހުން ކުރިން ބޭއްވި ނޫސްވެރިންގެ ބައްދަލުވުމުގައި އޮމްބަޑްސްޕާސަން ޖިހާދާ އަނީސް ވިދާޅުވީ ބޭނުމަކީ ދައުލަތުގެ މުއައްސަސާތަކުގެ ތެރެއިން ހިންގާފައިވާ އިންސާނީ ހައްގުތަކާއި އަސާސީ މިނިވަން ކަމަށް އަރައިގަތުމުގެ އަމަލުތައް ތަހުގީގުކޮށް އެކަން ކަމަށް އިންސާފު ހޯދައިދިނުން ކަމަށެވެ.
އަނިޔާ ލިބުނު ފަރާތްތަކަށް ސިއްހީ، އިގްތިސޯދީ، އިޖުތިމާއީ ގޮތުންނާއި ނަފުސާނީ ގޮތުން ލިބިފައިވާ ގެއްލުމުން އަރައިގަތުމަށް ދައުލަތުގެ އެކި މުއައްސަސަސާތަކާ ގުޅިގެން ސައިކޯސޯޝިއޯ ސަޕޯޓު ފޯރު ކޮށްދިނުމުގެ މަސައްކަތް އެ މުއައްސަސާއިން ކުރާނެ އެވެ.
އެ އޮފީހަށް ހުށަހަޅާ މައްސަލަތައް ދެ އަހަރުގެ ތެރޭގައި ބަލައި ނިންމަން އިންތިގާލީ އިންސާފުގެ ގާނޫނުގައި ބުނެ އެވެ.