ރައީސް އިބްރާހީމް މުހައްމަދު ސޯލިހްގެ ސަރުކާރުން ހިޔާ ފްލެޓްތަކުގެ އަގުތައް ކަނޑައެޅުމުގައި ބަލާފައިވާ ކަންކަމުގެ ހުރިހާ މައުލޫމާތުތަކެއް ހިއްސާކުރުމަށް މާލެ ސިޓީ ކައުންސިލުން އެދިއްޖެ އެވެ.
މާލެ ސިޓީ ކައުންސިލުން މިކަމަށް އެދުނީ މިއަދު ސިޓީ ކައުންސިލާއި ޕްލޭނިން މިނިސްޓްރީއާއި ދެމެދު ކުރިއަށް ގެންދިޔަ މަޝްވަރާ ބައްދަލުވުމުގަ އެވެ.
މިބައްދަލުވުމުގައި މައިގަނޑު ގޮތެއްގައި މަޝްވަރާ ކުރެވުނީ ހިޔާ ފްލެޓްތަކުގެ އަގުތައް މިސަރުކާރުން ކަނޑައަޅާފައިވާ އަދަދަށް ވުރެ ކުޑަކުރުމާ ގުޅޭގޮތުންނެވެ.
ބައްދަލުވުމަށްފަހު ޕްލޭނިން މިނިސްޓަރު މުހައްމަދު އަސްލަމާއި މާލޭގެ މޭޔަރު ޑރ. މުހައްމަދު މުއިއްޒު މިއަދު ވަނީ ޕްލޭނިން މިނިސްޓްރީގައި ހިޔާ ފްލެޓްތަކާ ގުޅޭ އެންމެ ފަހުގެ މައުލޫމާތު ހިއްސާކުރައްވާފަ އެވެ.
ނޫސްވެރިންގެ މިބައްދަލުވުމުގައި މޭޔަރު މުއިއްޒު ވިދާޅުވީ ހައުސިން މިނިސްޓަރު ކަމުގައި އެމަނިކުފާނު ހުންނެވި ދުވަސްވަރު އަޅާފައިވާ ހިޔާ ފްލެޓްތަކުގެ އަގުތައް ކަނޑައެެޅީ ހައުސިން މިނިސްޓްރީއާއި ރައީސް އޮފީހާއި އެޗްޑީސީ ގުޅިގެން ކަމަށެވެ. އަގުތައް ހަދާފައިވާނީ ވަރަށް ރަނގަޅަށް ހުރިހާ ކަމެއްވެސް ބެލެވި، ރައްޔިތުންނަށް ފައިސާ ދެއްކުމުގައި އެންމެ ލުއި ގޮތަކަށް ކަމުގައިވެސް ވިދާޅުވި އެވެ.
ރައީސް އަބްދުﷲ ޔާމީންގެ ސަރުކާރުގައި ހިޔާ ފްލެޓަކަށް މަހަކު ދައްކަން ކަނޑައަޅާފައިވަނީ 5،500 ރުފިޔާ އެވެ. ނަމަވެސް މިސަރުކާރު ވެރިކަމާ ހަވާލުވުމަށްފަހު ވަނީ އެއީ ފްލެޓް ދޫކޮށްލެވޭނެ އަގެއް ނޫން ކަމަށް ބުނެ 7،500 ރުފިޔާ އަށް ފްލެޓްތަކުގެ މަހު ފީ ބޮޑުކޮށްފަ އެވެ.
މިބަދަލާ ގުޅިގެން މުއިއްޒު ވިދާޅުވީ ހިޔާ ފްލެޓްތަކުގެ އަގަށް ބަދަލު ގެނައުމުގައި މިސަރުކާރުން ބަލާފައިވާ ކަންކަމުގެ މައުލޫމާތު ހިއްސާކުރުމަށް މިއަދު އެދިފައިވާނެ ކަމަށެވެ. އަގަށް ބޮޑު ބަދަލެއް އަންނަންޖެހޭނެ ކަމަށް މުއިއްޒު މިއަދުވެސް ގަބޫލެއް ނުކުރައްވަ އެވެ. އެހެންވެ ވިދާޅުވީ ހިޔާ ފްލެޓްތަކުގެ އަގު ކުރިން ވެސް އޮތް އަދަދާ ދާދި އެއްވަރުގެ އަދަދަކަށް ބަދަލުވާނެ ކަމަށްވެސް އަދިވެސް އުއްމީދު ކުރައްވާ ކަމަށެވެ.
މުއިއްޒުގެ ވާހަކަތަކާ ގުޅިގެން މިނިސްޓަރު އަސްލަމް ވިދާޅުވީ ސަރުކާރުން މިހާރު ކަނޑައަޅާފައިވާ އަގަކީ އެންމެ ކުޑަކުރެވޭނެ ވަރަކީ ކޮބައިތޯ ބަލައި ކުރެވުނު މަސައްކަތުން ކުޑަކުރެވެން އޮތް އެންމެ ކުޑަ އަދަދު ކަމަށެވެ. ކުރީގެ ސަރުކާރުން ހިޔާ ފްލެޓް ތަކުގެ އަގު ހެދިއިރު އެކަން ކުރި ގޮތް ރަނގަޅު ނޫން ކަމަށް މިއަދުވެސް އަސްލަމް ތަކުރާރުކޮށް ވިދާޅުވި އެވެ. ނަމަވެސް މޭޔަރު މުއިއްޒު އެ ވާހަކަތައް ދޮގުކުރެއްވި އެވެ.
މިނިސްޓަރު އަސްލަމް ވިދާޅުވީ މިހާރު ކަނޑައަޅާފައިވާ އަދަދު ކުޑަކުރާނަމަ ދެން އެކަން ކުރެވޭނީ ހިޔާ މަޝްރޫއާ ގުޅިފައިވާ ކަމާ ގުޅޭ ހުރިހާ އިދާރާއަކަށް ވެސް އެކަން ހުށަހަޅައިގެން ކަމަށެވެ. އެގޮތަށް އެކަން ކުރަން ޖެހެނީ ހިޔާ މަޝްރޫއަކީ ލޯނު ނަގައިގެން ކޮށްފައިވާ މަސައްކަތަކަށް ވާތީ ހިޔާ ފްލެޓްތަކަށް ކޮންމެ ގޮތެއްވީ ނަމަވެސް ލޯނަށް ފައިސާ ދައްކަން ޖެހޭތީ ކަމަށްވެސް ވިދާޅުވި އެވެ.
ނޫސްވެރިންގެ މިބައްދަލުވުމުގައި ހުޅުމާލެ ދާއިރާގެ ކައުންސިލަރު އިބްރާހީމް ޝުޖާއު ވިދާޅުވީ ހިޔާ މަޝްރޫއަށް ނަގާފައިވާ ލޯނަކީ އެޗްޑީސީން ޒިންމާވާން ޖެހޭ އެއްޗެއްގެ ގޮތުގައި ހަމަޖެއްސުމަށްފަހު ސަރުކާރުން އެ ލޯނާ ދުރަށް ޖެހިލަން އުޅޭހެން ހީވާ ކަމަށެވެ. އެހެންވެ އެގޮތަށް ސަރުކާރުން އަމަލުނުކުރާނެ ކަމަށް އުއްމީދު ކުރައްވާ ކަމަށްވެސް ޝުޖާއު ވަނީ ވިދާޅުވެފަ އެވެ.
ހިޔާ މަޝްރޫއުގެ ތެރެއިން ފްލެޓް ލިބުނު މީހުންނާ އެކު އަންނަ މަހުގެ 14 ވަނަ އެއްބަސްވުންތަކުގައި ސޮއި ކުރަން މިހާރު ދަނީ ތައްޔާރުވަމުންނެވެ. އަދި މިއަހަރުގެ ތެރޭގައި ފްލެޓްތަކަށް މީހުންނަށް ވަދެވޭ ވަރަށް މަސައްކަތްތައް ނިންމަން ދަނީ މަސައްކަތް ކުރަމުންނެވެ.