ކޮވިޑް ޖެހި ފަރުވާ ދިނުން ލަސްވެގެން މި މަހުގެ އެއްވަނަ ދުވަހުގެ ރޭ ފާތުމަތު މިޝްކާ މަރުވި މައްސަލަ ތަހުގީގުކޮށް ނިންމާ ފައިނަލް ރިޕޯޓާއެކު ހެލްތު މިނިސްޓަރު އަހްމަދު ނަސީމް މަޖިލީހުގެ ޖެންޑާ އެންޑް ހިއުމަން ރައިޓްސް ކޮމިޓީއަށް ހާޒި ރުކުރަން ނިންމައިފި އެވެ.
އެ މައްސަލައިގައި މި މަހުގެ ހަތް ވަނަ ދުވަހު ވެސް އެ ކޮމެޓީއަށް މިނިސްޓަރު ހާޒިރުކުރި އެވެ. ނަމަވެސް މިޝްކާގެ މުޅި ތަހުގީގު އަދިވެސް ނުނިމޭތީ އާއި ބަލަންޖެހޭ ކަންކަން އެބަހުރި ކަމަށް ވިދާޅުވުމުން އެއް ހަފުތާ ފަހުން މިނިސްޓަރު ހާޒިރުކޮށް ސުވާލު ކުރަން ކޮމެޓީން ނިންމި އެވެ.
އެ މުއްދަތު ފާއިތުވެ ދިޔައިރު ވެސް މިނިސްޓަރު ހާޒިރެއް ނުކުރެ އެވެ.
ހިއުމަން ރައިޓްސް އެންޑް ޖެންޑާ ކޮމެޓީގެ ނާއިބު މުގައްރިރު ވައިކަރަދޫ ދާއިރާގެ މެމްބަރު ހުސެއިން ޒިޔާދު އަވަސްއަށް ވިދާޅުވީ މިނިސްޓަރު ނަސީމް މި ހަފުތާ ހާޒިރު ކުރައްވާނެ ކަމަށެވެ. ނަމަވެސް އަދި ސީދާ ދުވަހެއް އަދި ކަނޑައަޅާފައި ނުވާ ކަމަށެވެ.
"މިދިޔަ ހަފުތާގެ ބުރާސްފަތި ދުވަހު ވެސް އަޅުގަނޑުމެން ބެލިން ކޮމެޓީގެ ބައްދަލުވުމެއް ބޭއްވޭތޯ. ނަމަަވެސް އެކި ސަބަބުތަކާހުރެ ބައްދަލުވުން ކުރިއަށް ނުގެންދެވުނު" ޒިޔާދު ވިދާޅުވި އެވެ.
ހެލްތު މިނިސްޓްރީން ބުނީ މިޝްކާއަށް ސިއްހީ ހިދުމަތް ފޯރުކޮށް ދިނުމުގައި އަމަލުކޮށްފައިވަނީ އިމަޖަންސީ ހާލަތުގައި އަމަލުކުރާ ގޮތަށް ނޫން ކަމަށާ އަދި އެމްބިއުލާންސް ޓްރިގާ ކުރަންޖެހޭ ވަގުތު އެކަން ވެސް ކޮށްފައި ނުވާ ކަމަށެވެ. އިމަޖެންސީއެއްގެ ގޮތުގައި ރިޕޯޓް ކުރެވުނު ހިސާބުން އެމްބިއުލާންސް އެކްޓިވޭޓް ނުކުރެވި ދެ ގަޑިއިރާއި 26 މިނެޓް ވަނީ ހޭދަވެފަ އެވެ. އަދި އަމަލު ކުރަަން ޖެހޭ އުސޫލުތަކާއި އެއްގޮތަށް އެމްބިއުލާންސް ފޮނުވަން އަންގާފައިވެސް ނުވާ ކަމަށާ ކޯލް ސެންޓަރަށް ލިބިފައިވާ ކޯލްތަކަށް ބަލާއިރު މިޝްކާގެ ހާލަތު ސީރިއަސް ކަމާއި އެހީއަށް ބޭނުންވެފައިވާ އަވަސް މިންވަރު ކޯލް ސެންޓަރަށް ބެލިފައި ނުވާ ކަމަށެވެ
އެ މައްސަލައިގައި މިހާތަނަށް އެއްވެސް މުވައްޒަފަކަށް ފިޔަވަޅު އަޅާފައެއް ނުވެ އެވެ.