ދުވަސް ނުފުރާ އުފަންވި ކުދިންގެ ތެރެއިން ދުނިޔޭގައި ހުރި އެންމެ ހަގު ކުއްޖާގެ ގިނިސް ވޯލްޑް ރެކޯޑް މިހާރު އޮތީ ރިޗަޑް ސްކޮޓް ވިލިއަމް ހަޗިންސަން އަށެވެ. އޭނާ އުފަންވާނެ ކަމަށް ޑޮކްޓަރުން ލަފާ ކުރާ ތާރީހަށް ވުރެ އެތައް މަހެއް ކުރިން މި ކުއްޖާ އުފަންވުމުން ޑޮކްޓަރުން ބުނީ ކުއްޖާގެ ފުރާނަ ސަލާމަތްވުމުގެ އޮތީ ސުން ޕަސެންޓް ކަމަށެވެ. މާނައަކީ ޑޮކްޓަރީ ރޮނގުން ބަލާއިރު މި ކުއްޖާ ދުނިޔޭގައި ހުރުމުގެ ކުޑަ ވެސް ފުރުސަތެއް ނެތޭ އެވެ. ނަމަވެސް ދިމާވި ހުރިހާ ގޮންޖެހުން ތަކަކުން އަރައިގަނެ، ޖޫން 5، 2021 ގައި މި ކުއްޖާގެ ފުރަތަމަ އުފަން ދުވަސް ވަނީ ފާހަގަ ކޮށްފަ އެވެ.
އެމެރިކާގެ މިނިއަޕޮލިސްގައި ދިރިއުޅޭ ރިކް އާއި ބެތު ހަޗިންސަން އަށް ލިބުނު މި ކުއްޖާ އުފަންވީ ޖޫން 5، 2020 ގައެވެ. އަސްލު ޑިއު ޑޭޓަކީ ނުވަތަ އޭނާ އުފަންވާނެކަމަށް ލަފާ ކޮށްފައިވާ ތާރީޚަކީ އޮކްޓޯބަރު 13، 2020 އެވެ. ވިހަން އެތައް މަހެއް އޮއްވާ ކުއްލިއަކަށް ބެތުގެ ބަނޑުގައި ރިހެން ފެށުމުން ހޮސްޕިޓަލަށް ގޮސް ރިހުން ކަނޑުވަން އުޅެ އުޅެ ވެސް އެކަމެއް ނުކުރެވުނެވެ. އެންމެ ފަހުން ޑޮކްޓަރުންނާއި ބެތު އެއްބަސްވީ ކުއްޖާ ގުދުރަތީ ގޮތުން ވިހެއުން ހުއްޓުވަން މަސައްކަތް ނުކޮށް ވިއްސާށެވެ. އަދި ވިހެއުމަށްފަހު ކުއްޖާގެ ފުރާނަ ސަލާމަތް ކުރަން ޑޮކްޓަރުންގެ ގާބިލްކަން ހުރި އެންމެ މައްޗަކަށް މަސައްކަތް ކޮށްދޭން ޑޮކްޓަރުން އެއްބަސްވި އެވެ.
ބަލިވެ އިންތާ 21 ހަފުތާ އާއި ދެ ދުވަހުން ތުއްތު ރިޗަޑް އުފަންވީއިރު އޭނާގެ މަންމަގެ އަތްތިލަ މަތީގައި ރީތިކޮށް ބާއްވާލެވޭހާ ކުޑަ އެވެ. އެހެންވެ ރިޗަޑް އަކީ 131 ދުވަސް ޕްރިމެޗުއާކޮށް ވިހޭ ކުއްޖެއްގެ ގޮތުގައި ރެކޯޑް ކުރެވިފައި ވެއެވެ. ވިހޭއިރު ރިޗަޑްގެ ބަރުދަނަކީ 340 ގްރާމެވެ. ދިގުމިނުގައި ހުރީ 26 ސެންޓިމީޓަރުކަމަށް ގިނިސް ވޯލްޑް ރެކޯޑްސްގެ ބަޔާނުގައި ބުނެފައި ވެއެވެ.
ކުއްޖާގެ ފުރާނަ ސަލާމަތް ކުރެވޭނެކަމުގެ ކުޑަ ވެސް ފުރުސަތެއް އޮތްކަމަށް ޑޮކްޓަރުންނަށް ނުފެންނާތީ އެމީހުން ބެތު އާއި އޭނަގެ ފިރިމީހާ އަށް މިކަން ވަރަށް ރަނގަޅަށް ކިޔައިދިނެވެ. އަދި ދިމާވެދާނެ ދެރަ ގޮތަކަށް ތައްޔާރުވެގެން ތިބުމަށް ނަސޭހަތް ދިނެވެ.
"ރިޗަޑްގެ ހަޔާތުގެ ފުރަތަމަ ހަފުތާ ތަކަކީ ވަރަށް އުނދަގޫ ދުވަސްތަކަކަށް ވާނެކަމަށް އަހަރެންނަށް ޔަގީންވި. ނަމަވެސް އަހަރެންގެ ހިތް ބުނަނީ ހަމަ އޭނާ ސަލާމަތް ވެދާނޭ،" ރިޗަޑް އަށް ފަރުވާ ދީ އޭނާ ބެލެހެއްޓުމުގައި އެންމެ އިސް ރޯލެއް އަދާ ކުރެއްވި ޗިލްރަންސް މިނެސޯޓާ ހޮސްޕިޓަލުގެ ނިއޯނެޓޮލޮޖިސްޓް ޑރ. ސްޓޭސީ ކާން ވިދާޅުވި އެވެ.
ރިޗަޑް އަކީ ދުވަސްނުފުރާ ވިހޭ ކުދިންގެ ތެރެއިން ފުރާނަ ސަލާމަތްވީ އެންމެ ހަގު ކުއްޖާގެ ގޮތުގައި ގިނިސް ވާލްޑް ރެކޯޑްސް އިން ބަލައިގަނެފައިވަނީ އޭނާއަށް އެއް އަހަރު ފުރުނު ދުވަހު އެވެ. ދުނިޔޭގެ ރެކޯޑު ފޮތަށް ރިޗަޑްގެ ނަން އެރުމަކީ ބެތު އާއި ފިރިމީހާއަށް ލިބުނު ވަރަށް ބޮޑު ސަޕްރައިޒެކެވެ. އަދި އެކަމާ އެމީހުން ތިބީ ވަރަށް އުފަލުންނެވެ. މި ޚާއްސަ ރެކޯޑާއެކު އެމީހުން ދުނިޔެއަށް ދޭން ބޭނުންވާ މެސެޖަކީ ދުވަސް ނުފުރާ ކިތަންމެ ކުޑަކޮށް އޮއްވާ ކުއްޖަކު އުފަންވިޔަސް އެ ކުއްޖާ އަށް ދުނިޔޭގައި ހުރުމުގެ ފުރުސަތު އޮވެދާނެ ކަމާއި އެކަމަށް ގަދައަޅާ މަސައްކަތް ކުރަން ޖެހޭ ކަމެވެ.
މުއުޖިޒާތެއް ފަދަ ގޮތަކަށް ރިޗަޑް ސަލާމަތްވެ އޭނާގެ ފުރަތަމަ އުފަން ދުވަސް ފާހަގަކުރުމުގެ ފުރުސަތު ލިބުމުގެ ހުރިހާ ކްރެޑިޓެއް ޑރ. ކާން ދެއްވަނީ ރިޗަޑްގެ މައިންބަފައިންނަށެވެ. ރިޗަޑް އޮފް ހޮސްޕިޓަލުގެ ނިއޮނެޓަލް ވޯޑުގައި މަސައްކަތްކުރި ޓީމު ވަރުބަލިކަމެއް ނެތި ކުރި ބުރަ މަސައްކަތް ވެސް އޭނާ ފާހަގަ ކުރި އެވެ. މިފަދަ ކުއްޖަކަށް އަޅާލައި ބަލަހައްޓަން އެތައް ބަޔެއްގެ އެހީތެރިކަން އަބަދާ އަބަދު ލިބުމުގެ މުހިއްމުކަން ޑޮކްޓަރު ފާހަގަ ކުރެއްވި އެވެ.
ދުވަސްނުފުރާ ވިހޭ އެންމެ ތުއްތު ކުއްޖާގެ ރެކޯޑް ކުރިން އޮތީ ޖޭމްސް އެލްގިން ގިލް އަށެވެ. ކެނެޑާގެ އޮޓަވާގެ ބްރެންޑާ އާއި ޖޭމްސް ގިލް އަށް ލިބުނު މި ކުއްޖާ އުފަންވީ ބަނޑަށް 21 ހަފުތާ އާއި ފަސް ދުވަހުންނެވެ. ނުވަތަ 128 ދުވަސް ޕްރިމެޗުއާ ކޮށެވެ. ކުއްޖާ އުފަންވެފައިވަނީ މޭ 20، 1987 ގައެވެ.