އެމެރިކާ ސިފައިން ހަނގުރާމައިގެ މައިދާންތަކުގައި މަރުވި އަދަދަށް ވުރެ އަމިއްލައަށް މަރުވި އަދަދު ވަރަށް ބޮޑަށް އިތުރުވެފައިވާ ކަމަށް ދިރާސާއަކުން ދައްކައިފި އެވެ. ބްރައުން ޔުނިވާސިޓީން ބުނީ ޓެރަރިޒަމާ ދެކޮޅަށް ސެޕްޓެމްބަރު 11، 2001 އަށް ފަހު އެމެރިކާއިން ފަށައިގެން އުޅޭ ހަނގުރާމައާ ގުޅިގެން 30،177 ސިފައިން އަމިއްލައަށް މަރުވެފައިވާ ކަމަށެވެ. ހަނގުރާމައިގެ މައިދާންތަކުގައި އަސްލު މަރުވެފައި ވަނީ 7،057 ސިފައިން ކަމަށް ވެސް ވަނީ ބުނެފަ އެވެ.
ބްރައުން ޔުނިވާސިޓީއަކީ އެމެރިކާގެ ރޯޑް އައިލޭންޑްގައި ހުންނަ ޕްރައިވެޓް ޔުނިވާސިޓީއެކެވެ. މިޔުނިވާސިޓީގެ ނަމުގައި ދިރާސާކުރި ޓީމުން ބުނީ ހަނގުރާމައަށް ފަހު ނަފުސާނީ ގޮތުން ބަލިކަށިވެ ދިރިއުޅުމާ މެދު އިތުބާރު ގެއްލި ހާހުން ސިފައިން މަރުވެފައިވާ ކަމަށެވެ.
ދިރާސާގައި ބުނެފައި ވަނީ އަމިއްލައަށް މަރުވި އަދަދު އަދި އިތުރުވާނެ ކަމަށާއި އެގޮތަށް މަރުވާ މީހުންގެ ރެކޯޑް ބަލަހައްޓާފައި ވަނީ ގުޅުން ހުރި ހުރިހާ އެންމެން ހިމަނައިގެން ނޫން ކަމަށެވެ. ޓެރަރިޒަމާ ދެކޮޅަށް ކުރާ ހަނގުރާމައިގައި ގުޅުން ހުރި މަސައްކަތްތަކުގައި ވެސް އެތައް ބަޔަކު އަމިއްލައަށް މަރުވެފައިވާ ކަމަށް ދިރާސާގައި ބުނެފައިވެ އެވެ.
ހަނގުރާމަތަކާ ގުޅިގެން މީހުން މަރުވާ އަސްލު ސަބަބު ރަސްމީ އިދާރާތަކުން ހާމައެއް ނުކުރެ އެވެ. އެހެން ނަމަވެސް މިނިވަން ޖަމާއަތްތަކުން ހޯދާފައި ހުންނަ ސަބަބުތަކަށް ބަލާއިރު ސިފައިން އެންމެ ގިނައިން އަމިއްލައަށް މަރުވަނީ ނަފުސަށް އިތުބާރު ގެއްލިގެންނެވެ.
ހަނގުރާމައިގެ މައިދާންތަކުން ލިބޭ ގެއްލުންތަކުގެ ސަބަބުން އަތްފައި ގެއްލި އަދި ބޭނުންތެރި އެހެނިހެން ގުނަވަންތައް އުނިވެ ޒުވާން އުމުރު ހޭދަކުރަން ޖެހުމުން ވެސް އެތައް ބަޔަކު ވަނީ އަމިއްލައަށް މަރުވެފަ އެވެ.
ޒުވާން ފިރިހެނުންނަށް ހަނގުރާމަތަކުގައި ލިބޭ ގެއްލުންތަކުގެ ސަބަބުން – އައިއީޑީއެއް ގޮވައި ނުވަަތަ ރޯޑް މައިނަކަށް އެރި ދަށްބަނޑު އެއްކޮށް ގޮވައި ހަލާކު ވުމުން ވެސް، ތަހުޒީބީ ބޭސްވެރިކަމުން އެމީހުންނަށް ދިރިތިބެވޭ ގޮތް ހަދައިދެ އެވެ. އެހެން ނަމަވެސް އެފަދަ އުނި ހާލަތްތަކަށް ކެތްނުކުރެވި ގިނަ ފަހަރު އިޚުތިޔާރު ކުރަނީ އަމިއްލައަށް މަރުވުމެވެ.