ދެވަނަ ހާފުގައި ޖެހި ދެ ގޯލާއެކު ޗެކް ރިޕަބްލިކުން ނެދަލެންޑްސް މުބާރާތުން ކަޓުވާލައި ރޮއްވާލައިފި އެވެ.
ޕުސްކަސް ސްޓޭޑިއަމްގައި މިރޭ ކުޅުނު މެޗު ޗެކްރިޕަބްލިކުން ކާމިޔާބު ކުރީ 2-0 ގެ ނަތީޖާއަކުންނެވެ. މިއާއެކު މުބާރާތުގެ ފުރަތަމަ ހަތަރު މެޗުން މޮޅުވެ ނެދަލެންޑްސް އަށް އެމީހުންގެ ތާރީހު އާ ކުރެވޭ ގޮތެއް ނުވި އެވެ. މި ނަތީޖާ އާއެކު ނެދަލެންޑްސް މުބާރާތާއި ވަކިވަން ޖެހުނު އިރު ޗެކް ރިޕަބްލިކް ވަނީ ކުއާޓާގެ ޖާގައެއް ޔަގީން ކޮށްފަ އެވެ.
މެޗުގެ ފުރަތަމަ ހާފުގައި ގިނަ ވަގުތު ބޯޅަ ހިފަހައްޓައިގެން ކުޅުނީ ނެދަލެންޑްސް ޓީމުންނެވެ. ނަމަވެސް ރީތި ކުޅުމެއް ފެނިފައި ވަނީ ޗެކް ރިޕަބްލިކް ޓީމުންނެވެ. ދެ ޓީމުން ވެސް ކުޅެމުން ދިޔައީ ދާދި އެއް ވަރެއްގެ އެހާ އަވަސް ނޫން ގޭމެކެވެ. އަދި މަސައްކަތް ކުރީ އަރިމަތިން ގިނަ ހުރަސްތަކެއް ނަގައި އިދިކޮޅު ގޯލަށް ނުރައްކާ ކުރުމަށެވެ.
ފުރަތަމަ ހާފު ނިމުނީ އެއްވެސް ޓީމަކަށް ގޯލެއް ނުޖެހި އެވެ. ނެދަލެންޑްސްގެ ޑަމްފްރީސް އަށާއި ޑިލައިޓަށް ރަނގަޅު ފުރުސަތު ތަކެއް ލިބުނު ނަމަވެސް އޭގެ ބޭނުން ނުހިފުނެވެ. އަދި ޗެކް ރިޕަބްލިކްގެ ސީޗެކް އާއި ޗިކް އަށް ލިބުނު ފުރުސަތުތައް ވެސް ވަނީ ބޭކާރު ވެފަ އެވެ.
ދެވަނަ ހާފު ފެށިގެން މާ ގިނައިރުތަކެއް ނުވަނީސް ނެދަލެންޑްސްގެ ޑިފެންޑަރު ޑިލައިޓް ޕެނަލްޓީ އޭރިއާ ކައިރިން ބޯޅައިގައި އަތްލުމުން އޭނާއަށް ވަނީ ރަތް ކާޑު ދައްކާފަ އެވެ. ވީއޭއާރު ބެލުމަށް ފަހު މެޗުގެ 55 ވަނަ މިނެޓުގައި އޭނާއަށް ރަތް ކާޑު ދެއްކުމުން ނެދަލެންޑްސްގެ ޑިފެންސްލައިން ވަނީ ރޫޅި ހާލި ވެފަ އެވެ.
އެއާއެކު ޗެކުން ވަނީ ނެދަލެންޑްސްގެ ގޯލަށް ގިނަ ހަމަލާތަކެއް ފޮނުވާލާފަ އެވެ. އެގޮތުން ނެދަލެންޑްސްގެ ޕެނަލްޓީ އޭރިއާ ތެރޭގައި ހުރެފައި ކަޑެރަބެކް ފޮނުވާލި ބޯޅަ ގޯލަށް ވަނަ ނުދީ ސަލާމަތް ކޮށްދިނީ ޑަމްފްރިސް އެވެ.
ޗެކް ރިޕަބްލިކަށް މެޗުގެ ލީޑު ހޯދައިދިނީ މިޑްފިލްޑަރު ތޯމަސް ހޯލްސް އެވެ. މަތިމަތިން އައި ކޯނަރު ޗެކުގެ ކުޅުންތެރިއެއް ބޮލުންޖަހާ ހޯލްސް އަށް ފޮނުވާލި އެވެ. އޭނާ އެބޯޅަ ބޮލުން ޖަހާ ގޯލުގެ ތެރެއަށް ފޮނުވާލީ ގޯލުގެ ކުރިމަތީގައި ހުރި ނެދަލެންޑްސްގެ ތިން ޑިފެންޑަރުން ފޫއަޅުވާލާފަ އެވެ.