ހަ ދާއިރާއަކުން އަށް ޒުވާނަކު "ޒުވާނުންގެ އެވޯޑު" ހޯދައިފި

ގައުމަށާ މުޖުތަމައަށް ހިދުމަތްކޮށް، އެކި ދާއިރާތަކުން ހަރުދަނާ މަސައްކަތް ކުރާ ޒުވާނުންނަށް ސަރުކާރުންދޭ "ޒުވާނުންގެ އެވޯޑު" އަށް މީހަކަށް ދީފި އެވެ.

ޒުވާނުންގެ ދުވަސް ފާހަގަކުރުމަށް މިރޭ ދަރުބާރުގޭގައި ބޭއްވި ހާއްސަ ޖަލްސާއެއްގައި އިނާމުހޯދި ޒުވާނުންނަށް އެވޯޑު ހަވާލުކޮށްދެއްވީ، ރައީސުލް ޖުމްހޫރިއްޔާގެ ހާއްސަ މަންދޫބެއްގެ ގޮތުގައި ޖަލްސާއަށް ވަޑައިގެންނެވި ޝަރަފުވެރި މެހެމާން އިކޮނޮމިކް މިނިސްޓަރު މުހައްމަދު ސައީދު އެވެ.

މިއަހަރު ޒުވާނުންގެ އެވޯޑު ދީފައިވަނީ ޖުމްލަ ހަ ދާއިރާ އަކުންނެވެ. ހަ ދާއިރާއިން އަށް ޒުވާނަކަށް މިރޭ އެވޯޑު ދިނެވެ.

އެވޯޑު ދިން ދާއިރާތަކާ އެވޯޑު ހާސިލް ކުރި ފަރާތްތައް:

- ވިޔަފާރިއާ އިގްތިސޯދުގެ ދާއިރާ: އަބްދުﷲ ނިޔާމް ހަސަން
- އުފެއްދުންތެރިކަމުގެ ދާއިރާ: އިބްރާހިމް މަމްދޫހް (މަންޑޭ)
- މަސްތުވާތަކެއްޗާ ދެކޮޅަށް މަސައްކަތް ކުރުމުގެ ދާއިރާ: ނަސްރުﷲ ނިޔާޒް
- ކުޅިވަރަށް ހިދުމަތްކުރުމުގެ ދާއިރާ: މޫސާ އިބްރާހިމް އަދި ހަފްސީ އަބްދުﷲ
- ދަރުމަވެރިކަމުގެ ދާއިރާ: ދިމްނާ ފާކިރް
- މިނިސްޓްރީ އޮފް ޔޫތު އެންޑް ސްޕޯޓްސް ދެއްވާ ހާއްސަ އެވޯޑް: ހަސަން ސާއިދު އަދި އަބްދުﷲ ނަޝާތު

މިރޭގެ ރަސްމިއްޔާތުގައި ޔޫތު މިނިސްޓަރު ދެއްވާ ހާއްސަ އެވޯޑު ހޯދާފައިވަނީ އޭޝިއަން އޮލިމްޕިކްސް ގައި 100 މީޓަރު ދުވުމުން ރާއްޖެއަށް އެއްވަނަ ހޯދައިދިން ހަސަން ސާއިދާއި، ރާއްޖޭގެ މިނިވަންކަމަށް 50 އަހަރު ފުރޭ ރަން ޔޫބީލްއާ ގުޅިގެން އެމްއެމްއޭ އިން ނެރުނު ރަންދިހަ ފަހެއް ގެ ނޫޓް ސީރީޒް އާ، އަލަށް ނެރޭ ދިވެހި ފައިސާގެ ނޫޓުތައް ޑިޒައިންކުރި ހުނަރުވެރިޔާ އަބްދުﷲ ނަޝާތު އެވެ.

ޒުވާނުންގެ އެވޯޑަށް ކުރިމަތިލެވޭނީ އުމުރުން 18-35 ދެމެދުގެ މީހުންނަށެވެ. މިރޭގެ ޖަލްސާގައި އެވޯޑި ހޯދި ޒުވާނުންނަށް ވަނީ ސެޓްފިކެޓާ އެކު 25،000ރ ގެ ފައިސާގެ އިނާމެއް ދީފަ އެވެ.