ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހް އުތުރުގެ ތިލަދުންމަތީ ދެކުނުބުރީގެ ތިން ރަށަކަށް ވަޑައިގަތުމަށް ނިންމަވައިފި އެވެ.
ރައީސުލްޖުމްހޫރިއްޔާގެ އޮފީހުން ދެންމެ ބުނީ ރތިލަދުންމަތީ ދެކުނުބުރީގެ ބައެއް ރަށްތަކަށް މި ޖުލައި މަހުގެ 16 އިން 18 އަށް ރައީސް ސޯލިހް ދަތުރުފުޅު ކުރެއްވުމަށް ހަމަޖެހިފައިވާ ކަމަށެވެ. ރައީސުލްޖުމްހޫރިއްޔާގެ ސިޔާސަތަކީ ރައްޔިތުންނާ ގާތުން މަސައްކަތްކޮށް ކައުންސިލްތަކުގެ ބައިވެރިވުމާ އެކު ތަރައްގީގެ މަޝްރޫއުތަކާއި ހިދުމަތްތައް ފޯރުކޮށްދިނުން ކަމަށްވެސް ބުންޏެވެ.
ރައީސް މިފަހަރު ވަޑައިގަންނަވަނީ އުތުރުގެ ކުޅުދުއްފުށި ސިޓީ އާއި ހދ. ކުމުންދޫ އާއި ހދ. ހަނިމާދޫ އަށެވެ.
ކޮވިޑް-19 ގެ ބަލިމަޑުކަން ކުރިމަތިވުމާ ހަމައަށް ރައީސުލްޖުމްހޫރިއްޔާ ގިނަ ކައުންސިލްތަކަކާ ބައްދަލުކުރައްވާފައިވާ ރައީސް އޮފީހުން ފާހަގަކޮށްފައިވެއެވެ. މިހާތަނަށް ޖުމުލަ 127 ބައްދަލުވުމެއް ލޯކަލް ކައުންސިލްތަކާ އެކު ބާއްވަވައި 69 ރަށަކަށް އެ މަނިކުފާނު ވަނީ ޒިޔާރަތްކުރައްވާފައެވެ.
ކޮވިޑް ފެތުރުން ކޮންޓްރޯލް ކުރެވި ހާލަތަށް އައިސްފައިވާ ބަދަލާއެކު އިތުރު ރަށްރަށަށް ޒިޔާރަތްކުރައްވާ ތަރައްގީގެ މަޝްރޫއުތަކާ އަދި ރައްޔިތުންގެ ކަންބޮޑުވުންތައް އެ މަނިކުފާނު ގާތުން ބައްލަވަމުން ގެންދަވާނެ ކަމަށެވެ.