މާޔޫރީ ކޮންގޯ ބޮލީވުޑަށް ތައާރަފްވީ 1995 ގައި ރިލީޒްކުރި "ނަސީމް" އިން ނަމަވެސް އޭނާގެ މަގްބޫލުކަން އިތުރުވީ 1996 ގައި ޖުގަލް ހަންސްރާގް އާއެކު ކުޅުނު "ޕާޕާ ކެހެތޭ ހޭ" އިންނެވެ.
މާޔޫރީ އާއި ޖުގަލްގެ "ގަރްސޭ ނިކަލް ތޭހީ ކުޗް ދޫރް ޗަލްތޭހީ" މި ލަވަ އަދިވެސް ގިނަ ބައެއްގެ ހަނދާނުގައި ހުންނާނެ އެވެ.
މި ފިލްމުގެ ފަހުން "ބޭތާބީ"، "ހޯގީ ޕިޔާރް ކީ ޖީތު" ފަދަ ފިލްމުތައް މާޔޫރީ ކުޅުނެވެ. ނަމަވެސް 2009 ގައި ކުއްލިއަކަށް އެކްޓިން އަށް އަލްވަދާއު ކިޔައި ފިލްމީ ފަރުދާއިން މާޔޫރީ ވަނީ ގެއްލިފަ އެވެ. އޭނާ އެންމެ ފަހުން ފެނިފައި ވަނީ ކަރީނާ ކަޕޫރާއި ސައިފް އަލީ ޚާންގެ "ގުރުބާން" ގެ ވަރަށް ކުޑަ ކުޑަ ރޯލަކުންނެވެ.
ފިލްމު ކުޅުން ހުއްޓާލާފައި މާޔޫރީ "ކުސުމް'، "ކަހީނ ކިސީ ރޯޒް" ފަދަ ބައެއް ޓީވީ ސީރީޒްތަކުގައި ވެސް މަސައްކަތް ކުރި އެވެ.
ބޮލީވުޑް ފިލްމުތަކާއި ޓީވީ ސިލްސިލާތަކުގައި ގިނަ ދުވަސް ތަކަކު މަސައްކަތް ކުރުމަށް ފަހު މާ ރަނގަޅު ކާމިޔާބެއް ނުލިބުމުން 2003 ގައި އޭނާ ކައިވެނިކޮށް ދަރިން ލިބުމަށް ފަހު އެމެރިކާއަށް ދިރިއުޅުން ބަދަލުކޮށް އަލުން އެމްބީއޭގެ ޑިގްރީއަކަށް ކިޔަވައި އެމެރިކާގައި ވަޒީފާ އަދާކުރަން ފެށި އެވެ. އަދި ފިލްމީ ރޮނގުން ނުލިބުނު ކާމިޔާބު މާޔޫރީ ވަނީ ދެ ވަނަ އަށް ޚިޔާރުކުރި ކެރިއަރުން ހޯދާފަ އެވެ.
މާޔޫރީ އަކީ މިހާރު ގޫގުލް އިންޑިއާގެ އިންޑަސްޓްރީ ހެޑްގެ ވަޒީފާ އަދާކުރާ ކާމިޔާބު މީހެކެވެ.