ޕެރިޝަބަލް އާއި ޖެނެރަލް ކާގޯ އުފުލާ ބޯޓުތައް އިންޑިއާގެ ޓުޓިކޮރިންއިން ކުޅުދުއްފުށި ސިޓީއަށް ސީދާ ދަތުރުތައް ފެށުމުގެ މަސައްކަތް ކުރަމުންދާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) ބުނެފި އެވެ.
އެމްޕީެއެލްއިން އެކްސްގައި އިއްޔެ ކުރި ޕޯސްޓެއްގައި ބުނީ ކުޅުދުއްފުށީ ސިޓީގެ ވިޔަފާރި ވެރިންނާ އެ ކުންފުނީގެ އިސްވެރިން ބައްދަލުކުރައްވާފައިވާ ކަމަށެވެ. އަދި އިންޑިއާއިން ދާއިމީ ގޮތަކަށް ކުޅުދުއްފުށި ސިޓީއަށް ޕެރިޝަބަލް މުދާ އެތެރެކުރެވޭ ގޮތް ހެދުމަށް މަސައްކަތް ކުރުމަށް މަޝަވަރާ ކޮށްފައިވާ ކަމަށެވެ.
އެމްޕީއެލްއިން 2020 ވަނަ އަހަރު ވަނީ އިންޑިއާގެ ކޮޗިންއިން ކުޅުދުއްފުޓަށް ފެށި ދަތުރުތައް ވަގުތީގޮތުން މެދުކަނޑާލާފަ އެވެ.
އެމްޕީއެލްއިން މިހާރު ދަނީ އިންޑިއާގެ ޓުޓިކޮރިން އިން އައްޑޫ ސިޓީއަށް ޕެރިޝަބަލް މުދާ އެތެރެކުރަމުންނެވެ.
މިދިޔަ ޖުލައި މަހުގެ ތެރޭގައި ފެށި މި ހިދުމަތުގެ ފުރަތަމަ ޝިޕްމަންޓްގައި 150 ޓަނުގެ މުދާ ވަނީ ރާއްޖެ ގެނެސްފަ އެވެ.