މާލޭގެ ވިޔަފާރި ބަނދަރުގައި ކޮންޓެއިނަރު ހިލޭ ބެހެއްޓޭ މުއްދަތު ކުޑަކުރަން މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ނިންމައިފި އެވެ.
ކޮންޓެއިނަރު ހިލޭ ބެހެއްޓޭ މުއްދަތު ކުޑަކުރަން ނިންމާފައިވާކަން ހާމަކުރެއްވީ އެމްޕީއެލްގެ ސީއީއޯ މުހައްމަދު ވަޖީހު އިބްރާހީމް އެވެ.
ދުނިޔޭގެ އެންމެ ބޮޑު ޝިޕިން ކުންފުނި -- މެޑިޓެރޭނިއަން ޝިޕިން ކޮމްޕެނީ (އެމްއެސްސީ) ގެ ބޯޓެއް ފުރަތަމަ ފަހަރަށް ރާއްޖެ އައުން ފާހަގަކުރުމަށް ބޭއްވި ރަސްމިއްޔާތުގައި ވަޖީހު މިއަދު ވިދާޅުވީ މާލޭގެ ވިޔަފާރި ބަނދަރުގައި މުދާ ބެހެއްޓުމަށް އޮތީ ވަރަށް ކުޑަ ޖާގައެއް ކަމަށެވެ.
އެ ގޮތުން މާލެ ވިޔަފާރި ބަނދަރުގައި އެއްފަހަރާ ބެހެއްޓޭނީ 2،200 ކޮންޓެއިނަރު ކަމަށް އޭނާ ވިދާޅުވި އެވެ.
ދުނިޔޭގެ ބޮޑެތި ކާގޯ ބޯޓުފަހަރު ރާއްޖެ ގެނެވޭނީ ބަނދަރުގައި ޖާގަ އޮވެގެންކަން ފާހަގަކުރައްވާ ވަޖީހު ވިދާޅުވީ ބަނދަރުގެ ޖާގަ ތަނަވަސްކުރުމަށް ކާގޯ ގެނެސް ބެހެއްޓޭނެ ވަގުތު ވަރަށް އަވަހަށް ކުޑަކުރާނެ ކަމަށެވެ.
މާލޭ ވިޔަފާރި ބަނދަރުގެ ގަވާއިދުގައިވާ ގޮތުން މާލެ ވިޔަފާރި ބަނދަރަށް ބާލާ ޑިރެކްޓް ޑެލިވަރީ މުދާ ފިޔަވައި އެހެން މުދާ ހިލޭ ބެހެއްޓޭނީ 10 ދުވަހު އެވެ.
ވަޖީހު ވިދާޅުވީ ވަކި ފިނިހޫނުމިނެއްގައި ބަހައްޓަންނުޖެހޭ މުދާ ބެހެއްޓޭ މުއްދަތު ހަތް ދުވަހަށް އަދި އެހެނިހެން ކޮންޓެއިނަރު ބެހެއްޓޭ މުއްދަތު ފަސް ދުވަހަށް ކުޑަކުރާނެ ކަމަށެވެ.